1Ifoli dorofenia mala'ika si lima, ba u'ila sambua ndrõfi satoru moroi ba mbanua si yaw̃a ba gulidanõ. Ba tebe'e ba ndrõfi andrõ nono kusi mbawa danõ wa'amate.
2Ba ibokai dõfi mbawa danõ wa'amate andrõ, ba mõi baero zimbo moroi bakha hulõ zimbo mbaho geu sebua. Ba tobali ogõmi luo ba talu mbanua ba zimbo soroi mbawa danõ wa'amate andrõ.
3Ba moroi bakha ba zimbo andrõ mõi baero damo ba gulidanõ. Ba tebe'e wa'abõlõ ba damo andrõ si mane fa'abõlõ nibe'e ba dongo.
4Ba latenaw̃a ira wamakiko du'u, ba ma tõla geu, ba ma ngawalõ zinanõ bõ'õ. Awai zi tola lasuwõ ha niha si lõ hadõi tandro soroi Lowalangi ba gangangora.
5Ba lõ tetehegõ ba damo wamunu niha andrõ, ha lafakao manõ ira lima waw̃a wa'ara. Fa'afõkhõ ni'a'asogõ damo andrõ no timba wa'afõkhõ ni'a'asogõ duo dongo.
6Sagõtõ zi lima waw̃a wa'ara andrõ, la'alui lala ena'õ mate ira, ba lõ i'ila mate ira. Omasi mate ira ba itugu arõu khõra wa'amate.
7Ba fa'oromania damo andrõ hulõ kudo si no mama'anõ ba wanuwõ. Ba hõgõra so zi hulõ dakula ana'a. Bawara hulõ mbawa niha.
8Bura hulõ mbu ndra alawe, ifõra hulõ nifõ zingo.
9Tõtõ'ara ba no ibalugõ si hulõ mbaru si'õli. Li gafira ba hulõ li ruru gureta kudo soya si mandruo ba wanuwõ.
10Ba mo'i'o ira motuo hulõ gi'o ba tuo dongo. Ba ba gi'ora andrõ so wa'abõlõra ba wamakao niha si lima waw̃a wa'ara.
11Ba so razora samatõrõ ya'ira, ba razo andrõ ya'ia mala'ika mbawa danõ wa'amate andrõ. Tõinia ba li Heberai'o ya'ia Abadono; ba li Yunani ya'ia Afolio (eluahania "Samakiko").
12Fa'afõkhõ zi fõfõna andrõ no numalõ. Ba aefa da'õ so dombua tõ nasa wa'afõkhõ si lõ tola lõ alua.
13Ba aefa da'õ ifoli dorofenia mala'ika si õnõ. Ba urongo li si otarai zi õfa fatalinga naha wame'e sumange ana'a andrõ, si so fõna Lowalangi.
14Imane li andrõ ba mala'ika numero õnõ, "Efa'õ mala'ika si daõfa andrõ nibõbõ ba Nungo Nidanõ Eferata!"
15Ba te'efa'õ mala'ika si daõfa andrõ. Ba no tefa'anõ ira ba gamaudu za, ngaluo, baw̃a ba dõfi andrõ ba wamunu si sambua ni'otõlu niha fefu.
16Ba te'ombakha'õ khõgu wa fa'ato zanuwõ si fakudo andrõ ba dua ngaotu juta.
17Ba bakha ba gangilata, u'ila kudo andrõ awõ zi fakudo yaw̃a khõnia. Si fakudo yaw̃a khõnia no mamake baru si'õli soyo si hulõ holahola galitõ, ba sobalau si hulõ gara nila, ba sa'usõ hulõ mbalera. Ba hõgõ kudo andrõ hulõ hõgõ zingo, ba moroi ba mbawania mõi baero galitõ, simbo ba balera.
18Ba tebunu zi sambua ni'otõlu niha ba wamakao si tõlu balõ andrõ; ya'ia galitõ, simbo, ba balera si otarai mbawa kudo andrõ.
19Fa'abõlõ kudo andrõ so ba mbawara ba so gõi ba gi'ora. I'ora hulõ gulõ, mohõgõ. Ba faoma i'ora andrõ, lafakao niha.
20Ba si tosai niha si lõ mubunu ba ngawalõ wamakao andrõ, ba lõ lafalalini gera'erara moroi ba ngawalõ zi no lafazõkhi samõsa. Lõ, labõhõli wangalulu ba mbekhu, ba ba nadu ana'a, firõ, tambaga, kara ba eu si lõ mangila niha, ba si lõ mamondrongo li niha, ba ma si lõ mangila mowaõwaõ.
21Ba lõ gõi lafalalini gera'erara moroi ba wamunu niha, moroi ba wakelemusa, moroi ba wohorõhorõ ba moroi ba wanagõnagõ.
Download Audio MP3 (Wahyu 9):
Mobile (Low Quality) - CD (High Quality)
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel