Alkitab Mobile SABDA
[VER] : [NIAS]     [PL]  [PB] 
 <<  Yakobus 1 >> 

1Banua Lowalangi fefu, si no muzaewe ba zi sagõrõ ulidanõ! Fangowai moroi khõgu, Yakobo, enoni Lowalangi ba enoni Yesu Keriso.

2Ya'ami ira talifusõ! Na oya itõrõ ami fanandraigõ, ba mibali'õ fa'omuso dõdõmi da'õ.

3Bõrõ me no aboto ba dõdõmi, na aro wamatimi na itõrõ ami fanandraigõ, ba so khõmi wanaha tõdõ.

4Ya si lõ aetu wa'atedou wanaha tõdõ andrõ khõmi, irege maulu ba mo'ahonoa awõ wa lõ mo'ambõta ba ngawalõ hadia ia.

5Na so ba khõmi zambõ fa'atuatua, ba ya mu'andrõ khõ Lowalangi, ba Ibe'e khõnia, bõrõ me Ibe'e Lowalangi ba zi dozi niha sodanedane ba wa'ahakhõ dõdõ ba fa'omasi.

6Ba hiza, dozi sangandrõ, lõ tola lõ ya faduhu dõdõnia; tebai mangiwa dõdõ. Bõrõ me sangiwa tõdõ ba no hulõ ndrulu nasi, nifadauludaulu nangi, ni fangõrõngõrõ misa.

7Niha si manõ, lõ mo'arota wangerangerania, tebai ihalõ gangetula ba ngawalõ nifaluania.

8Bõrõ da'õ, bõi ya mutõtõna wa isõndra hadia ia moroi khõ Lowalangi.

9Niha Keriso si numana, ya'omuso dõdõnia na I'alaw̃a'õ ia Lowalangi.

10Ba Niha Keriso si kayo ya'omuso dõdõnia gõi na I'ide'ide'õ ia Lowalangi. Bõrõ me niha si kayo, taya si mane bowo ndru'u.

11Ba ginõtõ wa'atumbu luo ba ba wa'aukhu zino, aleu ndru'u andrõ irege atoru mbowonia ba ataya wa'asõkhinia. Si manõ gõi niha si kayo; tekiko ia ba wamalua halõw̃õnia.

12Ya'ahowu niha sanaha tõdõnia na itõrõ ia fanandraigõ. Na no aefa itaõgõ wamakao andrõ, itema luonia, ya'ia wa'auri si no Ifabu'u Lowalangi ba niha sangomasi'õ Ya'ia.

13Na fakitõ dõdõ niha ba wanandraigõ andrõ, bõi ya muw̃a'õ, "Moroi khõ Lowalangi wanandraigõ andrõ," me tebai itandraigõ Lowalangi si lõ sõkhi, ba lõ'õ gõi itandraigõ niha gofu haniha ia.

14Ba hiza, tola tetandraigõ niha, na adõni dõdõnia ba na tebõbõ ia ba wangisõ si lõ sõkhi.

15Ba na no te'o'õ wangisõ si lõ sõkhi andrõ ba i'adonogõ horõ; ba na no mufalua horõ andrõ, ba i'adonogõ wa'amate.

16Bõi telimo ami, ya'ami ira talifusõgu somasi ndra'o!

17Fefu mbuala si sõkhi ba so'ahonoa, no si otarai zorugo, ni'amualagõ Lowalangi, sanga'asogõ haga fefu ba mbanua si yaw̃a. Lowalangi zi lõ tebulõ ba si lõ manga'asogõ gofu hadia ia wa'ogõmigõmi.

18Nilau dõdõ-Nia samõsa wa no Ibali'õ Ono-Nia ita, moroi ba daroma li sindruhu andrõ. Ifalua da'õ, ena'õ tasõndra naha si sõkhi moroi ba nifazõkhi tanõ bõ'õ fefu.

19Mi be'e ba dõdõmi da'e, ya'ami ira talifusõgu, somasi ndra'o! Dozi niha lõ tola lõ alio ba wamondrongo, bõi fahulõ wehede ba alio wofõnu.

20Niha sofõnu ba tebai ilau zi sõkhi, si mõi fangomuso dõdõ Lowalangi.

21Andrõ mitibo'õ fefu zi no to'õlõ si ra'ira'iõ ba si lõ sõkhi. Tema'õ si fao fangide'ngide'õ daroma li nitanõ Lowalangi ba dõdõmi, si so fa'abõlõ ba wangorifi ya'ami.

22Mifalua hadia niw̃a'õ Lowalangi, bõi ha mifondrondrongo manõ, bõrõ me na ha si manõ ba no milimo ami samõsa.

23Niha samondrongo taroma li Lowalangi, ba lõ sa ifalua, ba no hulõ niha samaigi sikhalania ba zõrõmi.

24Na no aefa ihaogõ wamaigi ya'ia, mofanõ sa'ae ia, ba i'anema'õ olifu ia hewisa zikhalania.

25Oroisa Lowalangi andrõ ba no mo'ahonoa ba mofa'abõlõ ba wangefa'õ niha. Niha sangosisi'õ ba same'e ba dõdõnia ba samalua ya'ia, si tenga ha samondrongo, ma solifu, da'õ nifahowu'õ Lowalangi ba ngawalõ nilaunia fefu.

26Na so zanguma'õ tõdõnia, si lõ farõi ba agama ia, ba na lõ itaha lelania, ba no ilimo ia samõsa; ba no faya wamosumangenia Lowalangi.

27Folo'õ ba agama dali wamaigi Lowalangi Ama, ya'ia wanolo si lõ ama, si lõ ina, lakha mbanua si tefakao, ba fondrorogõ fa'auri zamõsana, ena'õ bõi gõna si ra'ira'iõ ba gulidanõ andre.



Download Audio MP3 (Yakobus 1):
Mobile (Low Quality) - CD (High Quality)

 <<  Yakobus 1 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel Single Panel