Alkitab Mobile SABDA
[VER] : [NIAS]     [PL]  [PB] 
 <<  Yudas 1 >> 

1Ya'ami ira talifusõ si no tekaoni, ba fondrege ni'omasi'õ Lowalangi Ama, awõ wa nirorogõ khõ Yesu Keriso. Enoni Yesu Keriso, ya'o -- Yuda -- talifusõ Yakobo.

2Udõnadõna wa Ibe'e khõmi Lowalangi howuhowu fa'ahakhõ dõdõ ba fa'ohahau dõdõ irege fahõna.

3Ya'ami ira talifusõ ni'omasi'õ! Moroi sibai ba dõdõgu usura zura khõmi sanandrõsa ba wangorifi andrõ si no faoma falukha ita. Ba iada'e, i'o'ou sibai ndra'o tõdõgu ba wo'amenesi ya'ami faoma sura andre, ena'õ lõ mamalõ fasõndra ami ba wamati si no Ibe'e Lowalangi, si ha samuza ba zi sagõtõ fa'ara ba mbanua-Nia.

4Ba zi lõ aboto ba dõdõda, so niha si fatewu ba gotaluada. Niha si lõ sõkhi ira si no mamuyu'õ turia wa'ebua dõdõ andrõ khõ Lowalangida, ena'õ lasõndra ginõtõ ba wamalua somasi nõsira. Ba sanimba Yesu Keriso, samatõrõ ba sokhõ ya'ita. I'otarai mbõrõta, no ofõna te'ombakha'õ huku si gõna ya'ira ba Mbuku Ni'amoni'õ.

5Ba fefu da'õ no oi aboto ba dõdõmi. Ba hew̃a'ae si manõ, edõna ndra'o ufasugi ba dõdõmi hewisa wolau Zo'aya wangorifi niha Gizera'eli moroi ba danõ Miserai, ba aefa da'õ Ifakiko niha si lõ faduhu tõdõ ba gotaluara.

6Mitõngõni gõi mala'ika andrõ sanalu'i ola ba wamatõrõ nihonogõi khõra, irege larõi nahiara. Ba no irate mala'ika andrõ Lowalangi faoma rate si tebai tekiko ba nahia sogõmigõmi si tou. Ba da'õ lataha ira si lõ mamalõmalõ irugi wanguhuku si gõna ya'ira ba Luo sebua andrõ dania.

7Mifaigi gõi mbanua Zodoma ba Gomora awõ mbanua si fasui ya'ira, nihania no lafalua ngawalõ zi mane nifalua mala'ika andrõ. Lafalua ngawalõ wohorõ ba amuata si lõ sõkhi; fohorõ ba sogoro niha, irege tefakao ira faoma huku alitõ si lõ aetu, ena'õ tobali famangelama ba niha fefu.

8Si manõ gõi niha andrõ sangifingifi irege lafazõkhi horõ ba mbotora samõsa. Lõ ba dõdõra wa'abõlõ Lowalangi ba la'o'aya niwõwõi solakhõmi ba zorugo.

9Mikhaeli samõsa, satua mala'ika andrõ, lõ irai ilau zi mane da'õ. Me inõtõ fasoso ia khõ Gafõkha ba wamadõni ha niha zokhõ boto Moze andrõ, ata'u Mikhaeli wanguhuku Afõkha faoma fehede fango'aya. Awai niw̃a'õ Mikhaeli, "So'aya dania zangotu'õ ya'ugõ!"

10Fao fango'aya, la'uduni fefu hadia ia zi lõ aboto ba dõdõra. Si mane urifõ si lõ tõdõ ira, fangi'ilara hadia ia, ha bõrõ wangi'ila si fao khõra. Ba no da'õ zamobõrõ fa'atekikora.

11Tekiko ira! No la'o'õ lala nitõrõ Ga'ino. Ba wanõndra ana'a, latõrõ lala elungua, si mane Bileamo. Tekiko ira bõrõ wamadaõra, si mane Kora.

12Ba ginõtõ wa'owulo ba wemanga nifaluami, ya'ira andrõ zi tobali da'i ba gotaluami. Manga ira si fao fa'olu'alu'a, ba lõ aila'aila, ba ha ya'ira ni'angeragõra. Si mane lawuo ni oloi'õ nangi ira ba si tebai manga'asogõ teu. Si mane eu ira, si tebai mowua, hew̃a'ae baw̃a wowua. Eu si no mudõni w̃a'a ba si no mate.

13Si mane dulu nasi sabõlõ ira, sanga'asogõ otu'otu, si manõ gõi wolaura amuata si mõi fangaila. Dõfi selungu ira si no Ifonahia Lowalangi ba wondrege zogõmigõmi si lõ mamalõmalõ.

14Henokhi, nga'õtõ si fitu i'otarai Gadamo, no irai ifa'ele'õ fõna zanandrõsa ba niha andre. Iw̃a'õ Henokhi, "Faigi, tohare dania Zo'aya awõ ngahõngahõnõ mala'ika-Nia ni'amoni'õ,

15ba wanguhuku niha fefu. Ihuku dania So'aya niha samazõkhi si lõ sõkhi ba si lõ faduhu tõdõ khõ-Nia. Ba Ya'ia dania zangetu'õ huku ba wehede fango'aya fefu si no law̃a'õ niha si so horõ si lõ sõkhi khõ-Nia!"

16Ya'ira andrõ zi kõkõkõkõ manõ, ba si fatahitahi. Latõrõ lala wangisõra ba horõ. Lasuno ira, ba lasuno niha, ena'õ lasõndra harera.

17Ba ya'ami ira talifusõgu, mitõrõ tõdõmi zi no lafa'ele'õ fõna ira sinenge Zo'aya ya'ita Yesu Keriso.

18No ofõna la'ombakha'õ khõmi wa ba ginõtõ Luo Safuria dania so niha sango'aya ya'ami; ya'ia niha solo'õ fangisõra si lõ sõkhi.

19Ya'ira andre niha samo'atumbukha fa'aboto bakha ba mbanua Niha Keriso ba nifatõrõ wangisõra samõsa. No niha si lõ Eheha Lowalangi ira.

20Ba ya'ami, ira talifusõgu bõi mo'aetufa mi'a'azõkhi wa'aurimi khõ Zo'aya; mi'amoni'õ sibai wamatimi andrõ. Ba mi'angandrõ balazi Geheha Lowalangi,

21ba mi'a'aro'õ ami ba wa'omasi Lowalangi ba wombasebase'õ fa'ahakhõ dõdõ Zo'aya ya'ita Yesu Keriso, same'e khõmi fa'auri sindruhu, si lõ aetu.

22Ba niha sangiwa tõdõ, mi'oroma'õ wa'ahakhõ dõdõ.

23Misõbi baero niha moroi bakha ba galitõ ba wangorifi ya'ira. Sanandrõsa ba niha bõ'õ ya miforoma'õ wa'omasimi si fao fangata'ufi, ba mi'ogorofi nukhara si no lata'unõi ba wangisõra andrõ si so horõ.

24Lowalangi, zabõlõ wondrorogõ ya'ami ena'õ bõi alau, ba si tola molohe ya'ami fõna dadaoma-Nia fondrege zalaw̃a, si fao fa'owuawua dõdõ ba si lõ sinegu hadia ia.

25Ha Ya'ia Lowalangi sangorifi ya'ita, balazi Yesu Keriso, So'aya ya'ita. Lowalangi solakhõmi Ia, sebua, sabe'e ba sabõlõ i'otarai gõtõ fõna, iada'e, ba irugi zi lõ aetu. Yaduhu!



Download Audio MP3 (Yudas 1):
Mobile (Low Quality) - CD (High Quality)

 <<  Yudas 1 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel Single Panel