1Pěmpẹ̌tawakal᷊iko i kamene, kuměndagu sěndinganeng i kamene. Dingangu pěmpẹ̌tatuměgal᷊ẹ̌ko l᷊ai měmpěnarimạu laonggọ mararohkẹ̌ e, limembo kate mědeạu makapěnubuetẹ̌ su taumata.
2Taumata kụ mẹ̌bẹ̌bisaram bawera makạdalinaụ e, taumata ene wal᷊inewe měbẹ̌bisara ringangu taumata, i sie měbẹ̌bisara ringangu Mawu Ruata. Tawẹ apa taumata makaěnna apan niwerane, watuụ Rohkẹ̌ u Ruata e makạdiadin sie makạberang kal᷊awọu apang kětạeng su kasingkạ u Ruata.
3Su sěmběkane ute taumata kụ makapěnubuetẹ̌ su taumata e, makapěnoghasẹ̌ si sire, waugu mamangung pěndang i sire, ringangu makapẹ̌gěllịu lahiborẹ̌ e si sire.
4I saing mẹ̌bẹ̌berang bera makạdal᷊inaụ, tumbạeng mạnoghasẹ̌ batangenge hala, arawe i saing mělẹ̌habaru hengetang bọu Ruata e makạtulung jamaatẹ̌ e mạbangung.
5Apạ e mapia kereu i kamene kěbị e mẹ̌bẹ̌berang haghim bera makạl᷊aherang. Kai limembong kapiane e ute kereu i kamene makahabaru manga kal᷊awọu hingidu Ruata e. U i sain měhabaru injilẹ̌ e, limembong kasěllahe wọu i sain mẹ̌bẹ̌bisara ringangu haghim bera makạl᷊aherange watụ u kai makạtualagẹ̌ apan nịbawerane e, takadeạu su kal᷊awọu jamaatẹ̌ e piạbe ual᷊ine.
6Kereu andene iạ duměnta su anunu kụ iạ e makawera ringangu haghim bera makạl᷊aherange, ute apawu gunane si kamene e? Mamben tala sarang kadidị-didị! Nẹ̌tatěntangu, kereu iạ e mapal᷊ahẹu pělahabaru Ruata e, arau iạ měnualagu apa-apa, mạanuen Duata e, arau iạ měhabaru hengetangu Mawu arau iạ maněntiro.
7Pakakasu musikẹ̌ e tawẹ himukude sarang kadodọ-dodọ, kere manga suling, dingangu kěcapi, u kereu manga notẹ̌ e tawe ipěnalang pakal᷊ětạ e, kereapa wue taumata e makakasingkạ u měnsang kawe lagu sude ipẹ̌kẹ̌kantarị e?
8Piạ haghine wal᷊ine: Kereu slompretẹ̌ e měngkate asal᷊e matiụ, ute kai i sai wue mapulu mẹ̌sasadia mẹ̌sekẹ?
9Kerene lai ual᷊ingu kasingkạ u makapẹ̌berang haghim bera makạl᷊aherange. Kereu i kamene ringangu kasingkạu e mẹ̌beram bawera tawe kal᷊aěnnaěnge, ute tawẹu sarang sěngkatau e makahěngang kai apa nịbawerane. Kěbị apan niwerang kamene e sarung mailang su kinoaěng.
10Su runia ini e měngkai makěpal᷊ẹ̌ haghim bera e, kai tawẹu sarang sěmbaụ e tạ mangal᷊ene.
11Kai kamageng iạ e tawe makaěnna wera iwẹ̌berang pẹ̌sěngkatau e, tangu i saịewen mẹ̌bẹ̌beram bera ene e kai kere tau raghị su těngoku e; kerene lai iạ e si sie.
12Kerene lai i kamene, iạ masingkạu i kamene e mambem piạ kapulu makaěbạ laonggọ Marohkẹ̌ e. Kai něngalembo wọu patikụ ene e, i kamene e pěmpẹ̌tatẹ̌gehẹ̌ bue sěngapam botonge, tadeạu mẹ̌pakẹu kapelesa gunang mẹ̌tul᷊ung dingangu měmangung jamaatẹ̌ iapasombọ.
13Kai ene hakịu taumata apan měmpẹ̌bisaram bera makạl᷊aherange ute, harusẹ̌be mẹ̌dorong su Mawu Ruata e tadeạu onggotangbe lain kapelesa baụgu měnualagu apan niwerane ene.
14U kereu iạ mẹ̌kal᷊iomaneng su wera makạl᷊aherang, rohkẹ̌ku e mamben měkẹ̌kal᷊iomaneng, kai arawe tiněnnaku e tawẹ hal᷊ẹ̌ e.
15Kụ iạ e kai mẹ̌koạ e apa tangu? Iạ e sarung mẹ̌kal᷊iomaneng u rohkẹ̌ku, kai iạ e mal᷊aing mẹ̌kal᷊iomanengu laěnnaku. Iạ e sarung mẹ̌kantarị u rohkẹ̌ku, kai iạ mal᷊aing mapulu mẹ̌kantarị u laěnnaku e.
16Kereu i kau makitarimakasẹ su Mawu Ruata tumbạben dingangu rohkẹ̌ u samatang, dingangu piạ taumata wal᷊ine kụ tawe makaěnna wawera makạdal᷊inaụ kụ asal᷊e wọu Rohkẹ̌ u Ruata e, tangu taumata ene tawe makawera u, "Iạ e akorẹ̌ bue" sukakal᷊iomaneng tatarimakasẹ u ene; ual᷊ingu i sie wěga wue apang kụ niweranu.
17Maningbe kakal᷊iomaneng tatarimakasẹ u su Mawu e mapia kahěngang, kaiso kakal᷊iomaneng ene e mamben tawẹ gunane su taumata wal᷊ine.
18Iạ e makitarimakasẹ su Mawu Ruata u iạ sẹ̌saku e makạbisara su haghim bera makạl᷊aherange lembong kapiane wọi kamene kěbị.
19Kaiso su ral᷊ungu manga komol᷊angu jamaatẹ̌ e iạ e mapiang be mẹ̌bisara manga l᷊imang kamohong kụ kaěnnaěngu taumata e sul᷊ungke ringangu hiwune su kamohong e su wera makạl᷊aherang. Endọbeng iạ mapulu kerene mědeạu makapěněntiro taumata.
20Manga anạ u sěmbaụ! Piawe makoạ kere manga rariọ, su hal᷊ẹ̌ u sipirange. Su hal᷊ẹ̌ u kararal᷊akisẹ̌ e ute i kamene kěngkakoạ'e kere manga rariọ deng tal᷊awuọ. Kai arawe su hal᷊ẹ̌ u tiněnna e, i kamene e kěngkakoạko kere taumata seng matěllang.
21Su ral᷊ungu Winohẹ Susi e kạbawohẹ kere ini, "Mawu něhengetang, 'Ual᷊ingu pẹ̌baweram bera makạl᷊aherange Iạ e sarung měhengetang su manga umatẹ̌ ini e. Nangělembo kate ual᷊ingu taumata raghị e Iạ e sarung měluntinghẹ̌ su manga umatẹ̌-Ku; kai maningbe kerene e, i sire e tawe mapulu rumaringihẹ̌ bawera-Ku.'"
22Kụ tahawisarang haghim bera makạl᷊aherange kai tatialan taumatawe tạ pangangimange, bal᷊inewe waugu taumata mạngimang. Mase tahapěhabaru hengetangu Mawu e su taumata u kai tatialan taumata mạngimang, bal᷊inewe waugu taumata tạ pangangimange.
23Ual᷊ingu ene ute, kereu su ral᷊ungu komol᷊angu jamaatẹ̌ e, kal᷊awọu ral᷊ohon jamaatẹ̌ e mẹ̌bisarang haghim bera makạl᷊aherange, kutẹu wọu ene riměntạe pirang katau wọu l᷊ikude, arau i sire wal᷊ine tau Sahani, nal᷊ahẹ u i sire sarung mẹ̌ngiral᷊ingu i kamene kai seng pulu kěbị!
24Kai kamageng i kamene kěbị e měhabaru hengetangu Mawu, wọu ene e ruměnta sěngkatau wal᷊ine tau Sahani e arau taumatan l᷊ikude, tangu apạewen nihabari kamene kěbị e sarung mělahẹu kal᷊awọu rosan tau ene ringangu makariadin sie mẹ̌sasěsilu rosane.
25Patikụ apan kạbawuni su ral᷊ungu naunge ipakal᷊ahẹ, hakịu i sie mẹ̌těngkasanạu watangenge kụ mạněmba Ruata. I sie sarungbe měngaku u Ruata e kahěnga-hěngangbe ene sutal᷊oarang kamene.
26Kụ manga anạ u sěmbaụ, kai apạ e ngae mangal᷊eng kěbị ene? Kereu i kamene měmpẹ̌komol᷊ẹ̌ maněmba Mawu e, ute piạem mẹ̌kẹ̌kantarị, piạem mạněntiro, piạem mělẹ̌habaru apa-apa wọu Mawu Ruata, piạem mạhumbisara su wera makạl᷊aherang dingangu piạben lai měmpẹ̌nẹ̌nualagu apan nịbawerane. Kaiso patikụ ene e harusẹ̌be koạ gunan maněntiro ringangu gunang kapapiang kěbị.
27Kereu piạu mapulu mẹ̌bisara su wera makạl᷊aherange, ute kětạu pẹ̌tahadua arau mětěngkal᷊awọ e pětahatěllung katau apẹ̌darol᷊osẹ̌ e. Dingangu harusẹ̌ piạu měnualagẹ̌ apan nipẹ̌bisaran taumata mẹ̌bawisarane ene.
28Kereu tạu makatualagẹ̌ e, tangu taumata apan mạhumbisaram bera makạl᷊aherange ene e harusẹ̌be mẹ̌těngkarěmmasẹ̌ su komol᷊ang ene. Balạe i sire pẹ̌bawisarane su ral᷊ungu naung i sire e su Mawu e.
29Darua arau těllung katau měnanubuetẹ̌ e harusẹ̌be měhabaru hengetang ene e těntal᷊angbe wal᷊ine měmpẹ̌timbangu apan niwera e.
30Kai kereu hengetangu Mawu e kai riměnta su sěngkatau wal᷊ine naiang su komol᷊ang ene, tangu i saing kạpẹ̌bẹ̌bisarane e ute harusẹ̌ měngirul᷊e.
31Kụ ual᷊ingu kawe tundune kerene ute, i kamene manga anạ u sěmbaụ kěbị e, sěngkatau-sěngkatau e wotonge makapěhabaru hengetangu Mawu e; tadeạu kěbị e makapěnarimạ u těntiro, ringangu sauneng matoghasẹ̌ su pěngangimang.
32Laonggọ bọu Rohkẹ̌ e waugu měnubuetẹ̌ e lẹ̌ul᷊ingang i sain němpěhabaru hengetang ene.
33Duata e kai Ruata puluang su atore; i Sie tạ karal᷊uase su hal᷊ẹ̌u pẹ̌sasilontahẹ̌. Kerẹe mạdiadi su ral᷊ungu patikụ jamạat'u Mawu,
34manga wawine e harusẹ̌be pěmpẹ̌těngkarěmmasẹ̌ su komol᷊angu jamaatẹ̌. I sire taipakawala mẹ̌bisara. I sire taipakawala makoạ pangahạ e, kerẹewe tumuhụ toratẹ̌.
35Kereu i sire mapulu měngěndung manga apa, ute i sire harusẹ̌be makiwal᷊o su kawingi sire su wal᷊e. U kai makạsamedẹ̌ kereu sěngkatau wawine e mẹ̌bisara su ral᷊ungu komol᷊angu jamaatẹ̌.
36Arau kai manga simẹ̌bang bọu anung kamene, hengetangu Mawu Ruata e? Arau kai kětạu nịdatingu anung kamene ngae hengetang ene?
37Kereu piạu makạpěndangu kai piạ tilakehu měnubuetẹ̌, arau piạ laonggọ bal᷊ine bọu Rohkẹ̌ u Ruata e, ute tau ene harusẹ̌be makapěndang batangenge u apan seng takụ niwohẹ ini e ute kai laoron Mawu e.
38Kai kereu piạu tamakatarimạu ini e ute kumbahangbe lai i sie i tarimạ.
39Kai ual᷊ingu ene ute, manga anạ u sěmbaụku, pěmpẹ̌těmpal᷊ungkangke tadeạu makapěnubuetẹ̌, kai kumbahangbe mẹ̌sẹ̌dingu apam mapulu mẹ̌bisarang haghim bera makạl᷊aherang.
40Kai kěbị e harusẹ̌be koạ pakapia ringangu pakaatorẹ̌.
<< 1 Korintus 14 >>
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel