1Seng katěllun sul᷊ene ini e iạ duměnta mẹ̌tiwo si kamene. Su ral᷊ungu Winohẹ Susi e kạbawohẹ, "Walạewe su hal᷊ẹ̌ sude, kai hinong tahutěngadeng u rarua arau těllung katau sahidine, wuhụewe hal᷊ẹ̌ ene iaku."
2Taumata nạung su tempo tamai e seng bọu nẹ̌koạ pẹ̌sasal᷊a ringangu kěbịewe taumata wal᷊ine, seng bọu takụ lẹ̌habareng kal᷊imona su tempong iạ nẹ̌tiwo si kamene su karuan sul᷊ene. Kụ ini e tangu těntal᷊ang iạ deng maraung kamene, iạ maul᷊ị kapia u kamageng u iạ saụ duměnta kapia, ute tawẹ u sarang sěngkatau wọu i sire kụ sarung mal᷊iwirẹ̌ bọu hukumang.
3Tangu i kamene sarungbe makaěbạ kěbị sasahidi apang ikẹ̌kapulung kamene u i Kristus e kahěnga-hěngang mělẹ̌hengetang lụl᷊iu watangengku. Kereu i Kristus e mẹ̌karadiahang si kamene ute i Sie wal᷊inewe mělẹ̌londo, kaiso i Sie kai měnodẹu kawasan'E sutal᷊oarang kamene.
4Těngadẹ̌ bue su tempong i Sie nikuruisẹ̌, i Sie kai lome, kai arawe orasẹ̌ ini e i Sie kai nẹ̌biahẹ̌ ual᷊ingu kawasan Duata. I kami mal᷊aing lome su ral᷊ungu pẹ̌bawiah'i kami kụ nasěmbaụ dingang'i Kristus, kaiso kereu i kami mẹ̌těngong kamene, i kami e mal᷊aing sěngkakatoghasẹ̌ dingang i Kristus ual᷊ing'u kawasan Duata.
5Kěnang i kamene pěmpanikạ batangeng i kamene hala, měnsang i kamene kahěnga-hěngangbe měmpẹ̌bẹ̌biahẹ̌ mạbawanggilẹ̌ su pangangimang si Kristus! Mamben těngadẹ̌ i kamene masingkạ u i Kristus Yesus e ene su ral᷊ung i kamene! -- nẹ̌tatěntangbeng kereu i kamene kahěnga-hěngang tawe mangimang.
6Iạ mělẹ̌harapẹ̌u i kamene masingkạ bue u i kami e wal᷊inewe taumata tạ darage.
7I kami e mẹ̌kẹ̌kal᷊iomaneng su Mawu Ruata mal᷊owọko i Sie mẹ̌tul᷊ung i kamene tadeạu tawe mẹ̌koạ pẹ̌sasal᷊a. Bal᷊inewe waugu mạpasiala u i kami e mambem pelesa měmunara, kai tadeạu i kamene měmpẹ̌koạbe apang ikẹ̌kapulun Duata e -- baẹbe kěllaěng i kami e ta nakawěbal᷊ẹ̌, kai tawẹ apa-apa!
8U i kami e tawe makakoạbe apa mẹ̌gul᷊ewasu katul᷊idẹ̌ e; i kami e hinongbe tumuhụ katul᷊idẹ̌ e.
9Mal᷊uasẹ̌ bue kereu i kami e lome, ringangu i kamene e matoghasẹ̌. I kami e mal᷊aing měkẹ̌kal᷊iomaneng tadeạu i kamene e měngkasukụ.
10Kai ual᷊ingu ene hakịu iạ němohẹ u suratẹ̌ ini su tempong iạ e wědang tawẹ dise ringang i kamene. Ual᷊ingu ene tangu, kereu iạ e sarung duměnta ute tawahal᷊uasu iạ měhěgisẹ̌ si kamene mẹ̌pakẹ u kawasa nionggọu Mawu e si siạ. Kawasa ene nionggọ e ipạmangung si kamene wal᷊inewe ipẹ̌gěnggoghahẹ̌.
11Samurine manga anạ u sěmbaụ, pakaral᷊uasẹ̌ bue i kamene, ringangu pěmpẹ̌tawakal᷊i wue i kamene měmpẹ̌těngkasukụ. Kụ tarimạko sasal᷊ěntihọku e. Pakasasěngkanaung bue ringangu pakaghaghighilẹ̌ bue. Mawu Ruata e kai pungu tatal᷊ěntụ dingangu pẹ̌darame e sarung mahundingang i kamene.
12Pěmpẹ̌papangadatẹ̌ bue sěmbaụ dingangu wal᷊ine, su ral᷊ungu pẹ̌kakakěndagẹ̌ e kerẹewe pẹ̌tatěnganạu sěmbaụ u taumatan Sahani. Patikụ umat'u Ruata e mạngimang e němpěndohongbe tabeạ si kamene.
13Mawu Yesus Kristus měngal᷊amatẹ̌ si kamene. Mawu Ruata e kụkěndag'i kamene, dingangu Rohkẹ̌ u Ruata e mạněntanudẹ̌ si kamene sidutu! Adat'i kami, Paulus
14(13:13)
<< 2 Korintus 13 >>
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel