Alkitab Mobile SABDA
[VER] : [SANGIR]     [PL]  [PB] 
 <<  2 Korintus 2 >> 

1Ual᷊ingu ene iạ e sen namutusẹ̌ u seng tawe saụ duměnta su ral᷊ungu pẹ̌tatiwo kụ makạkěndung naung i kamene.

2U kamageng u iạ e kawe mapakasusan naung i kamene, ute i sai wue makakahiborẹ̌ naungku, kereu wal᷊inewe naung i sire kụ naunge seng bọu takụ niapakasusa tangu?

3Kai ual᷊ingu ene hakịu iạ nakapěmohẹ u suratẹ̌ ene si kamene. Iạ e tawe mapulu mẹ̌tiwo si kamene, kụ bọu ene kawe ipakasusang kamene, sěmbal᷊iau kawe i kamene hinong mapakal᷊uasu naungku e. Batụu iạ mạngiakingu kamageng u iạ e mal᷊uasẹ̌, tangu kerene lai i kamene mal᷊aing mal᷊uasẹ̌ kěbị.

4Iạ e něnuratẹ̌ si kamene e, naungku e masusa ringangu mawěhạ, mase ringangu tatědọ u ěllo mata mal᷊awọ. Kapuluku e tangu wal᷊inewe mapakasusan naung i kamene, kaiso kawe tadeạu i kamene makahěngangu iạ kawe kụkěndag'i kamene.

5Kereu piạu napakasusan naung, tangu hal᷊ẹ̌ nikoạ e ene tawe nihino su watangengku, kaiso kawe nihino su manga anạ u sěmbaụ kěbị arau mẹ̌těngkakadodọ su sěmbahageang bọu i kamene. U iạ e tawe mapulu tumanị e mahasa su těngone.

6Baugu taumata kerene, hukumang piněllọu kal᷊awokang e wọ'i kamene e, seng kapapiane.

7Orasẹ̌ ini e i kamene hinong mẹ̌gěllịu ampung si sie ore lai hinong bahansangeng tadeạu i sie tawe tumanịe masusa kụ sarang měnsu naunge.

8Ual᷊ingu ene iạ e mědẹ̌dorong, tadeạu i kamene saụko pěmpěnodẹ u i kamene mamben těnga-těngadẹ̌ kụkěndag'i sie.

9Iạ e nakapanuratẹ̌ si kamene mědeạu měmẹ̌manikạ si kamene, měnsang i kamene hanesẹ̌be tutuhụ apan takụ ilẹ̌ahạ e.

10Kereu i kamene mẹ̌gěllịu ampung su taumata apan seng nẹ̌sal᷊a si kamene ute, iạ e mal᷊aing mẹ̌gěllịu ampung su taumata ene. U apan seng takụ niampungang kereu mambeng piạu hinong ampungang -- ene seng takụ niampungang -- su těngon Kristus baugu kapiang kamene.

11Takụ kẹ̌koateng ene tadeạu setang e kumbahangbe makareạ loahe mědeạu mẹ̌kawasa si kitẹ; batụu i kitẹ e masingkạbeng kal᷊awọu karakine.

12Su tempon iạ nahumpạ su Troas, mědeạu makapěhabaru Injilẹ̌ mạanung Kristus e, Mawu e seng nanope ral᷊eng baugu iạ tadeạu makapěmunara sene.

13Arawe iạ e kai taghiawahẹ̌ batụu tawe nẹ̌sombang u anạ u sěmbaụ i kitẹ i Titus paị sene. Tangu iạ e kai nẹ̌katạ u manga anạ u sěmbaụ sene mase nakoạ sol᷊ong Makedonia.

14Tarimakasẹ su Mawu Ruata! I Sie hanesẹ̌ mạngahạ i kami tadeạu apatol᷊e ghapaěngu kal᷊auntung i Kristus batụu i kami nẹ̌biahẹ̌ nasěmbaụ dingang'E. Duata e nẹ̌pakẹ i kami tadeạu wal᷊on habar'i Kristus e makeke kere ral᷊uru mawěngi kụ lumiwung su kạguwạu weọ e.

15Batụu i kami e kai tabidạu ral᷊urung kamania mawěngi, kụ nitutung i Kristus baugu Ruata. Suapan taumata kụ kapẹ̌tẹ̌timonane kawawinasa e, i kami e mẹ̌sul᷊ungu ral᷊urung papate kụ mamihua; kai arawe waugu taumata apang mětẹ̌timona kasasal᷊amatẹ̌ e, i kami ini e kai mẹ̌sul᷊ungu ral᷊uru mawěngi kụ makạděntang pẹ̌bawiahẹ̌. Tangu i saị e ngae makaitụ parenta ini e?

16(2:15)

17I kami e wal᷊inewe kere taumata l᷊awọ o kawe měkẹ̌koạ hengetang u Mawu e kere apal᷊iwụ ipạhumbal᷊ụ. Timonang kami e kai matul᷊idẹ̌, batụu i kami e kai nioron Duata. Kụ Duata sẹ̌sane e makạsilo u i kami e mạngekeng habarẹ̌ ene mẹ̌sul᷊ungu manga ěllang i Kristus e.



 <<  2 Korintus 2 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel Single Panel