1Batụu i kami e masingkạu kereu wal᷊e -- mangal᷊ene wadang -- kụ pěbẹ̌bal᷊eěng i kitẹ su dunia ini e ghoghaheng, Duata e sarung měndiahing pẹ̌bawal᷊eěng sěmbaụ baug'i kitẹ e su sorga, kinoạ u Mawu Ruata sẹ̌sane kụ mẹ̌daragẹ̌ sarang karěngụe.
2Su ral᷊ungu wal᷊e orasẹ̌ ini tangu, i kitẹ e měkẹ̌kurate watụ u i kitẹ e mẹ̌kẹ̌karimang mapulu mẹ̌tanạ su ral᷊ungu wal᷊eng kitẹ e su sorga.
3Bal᷊e ene ute kai wadang i kitẹ kụ buhu.
4Karěngụeweng i kitẹ e mẹ̌tẹ̌tanạ su ral᷊ungu wal᷊e kụ bọu dunia ini e, i kitẹ e měkẹ̌kurate ual᷊ingu wawawaěng i kitẹ e kai mawěhạ. Bal᷊inewe ual᷊ingu i kitẹ e mapulu mẹ̌těngkapẹ̌llọ bọu wadang i kitẹ bọu dunia ini e, kaiso kai ual᷊ingu i kitẹ e mapulu měluhem badang i kitẹ bọu sorga e, tadeạu wadang i kitẹ kụ botonge mate ini e ikawatạu pẹ̌bawiahẹ̌ e.
5Kụ napakasadiang kitẹ baugu ene ute kai Mawu Ruata sẹ̌sane, ringangu i Sie nangonggọu Rohkẹ̌'E si kitẹ e kai nakoạ kere papaiang e.
6Ual᷊ingu ene tangu naung i kami e měngkate sěntiniạ matoghasẹ̌. I kami masingkạ u karěngụeweng i kami wědang mạtatanạ su ral᷊ungu wadang i kami ini e, ute i kami e marau wọu wal᷊e kụ sarung pẹ̌tanakeng i kami e ringangu Mawu.
7Batụu i kami e kai mẹ̌biahẹ̌ iwal᷊a su pangangimang si Kristus wal᷊inewe iwal᷊a su apang ikẹ̌kasilo,
8kụ hakịu ene i kami e makědang. I kami e mạěndokangbe mẹ̌těngkapěllọ bọu wadang i kami ini e tadeạu makapẹ̌tanạ dingangu Mawu.
9Ual᷊ingu ene i kami mẹ̌kẹ̌kulěte sěngapam botonge mědeạu makal᷊uasẹ̌ naunge, baewe su piạ i kami wědang su pẹ̌bawal᷊eěng i kami e sini, arau paị sene.
10Batụu nal᷊ahẹ i kitẹ kěbị e sarung ipẹ̌těngong pěnggaghutaěng i Kristus, kụ i kitẹ sěngkatau-sěngkatau e sarung makahombang bawal᷊ise tuhụewe kakanoạ e su dunia ini -- kakanoạ e mapia arau lai ral᷊aị.
11I kami masingkạben mangal᷊ene matakụ u Mawu; ual᷊ingu ene hakịu i kami e mẹ̌tẹ̌tawakal᷊i mělẹ̌lombang taumata mạanung kami, Mawu Ruata e masingkạ-singkạ i kami, kụ lẹ̌harapeng i kamene e mal᷊aing masingkạbeng kami e sarang dal᷊ungu naung i kamene.
12Kai ini i kami e tawe mẹ̌gausẹ̌ tadeạu i kamene mẹ̌dalo si kami. I kami e kětạembeng mạul᷊ị u ral᷊enge mapia si kamene tadeạu rụl᷊uasi kami, tadeạu i kamene masingkạ u kai kereapa i kamene hinon sumimbahẹ̌ su taumata kụ kětạeng měmẹ̌manda ghahị u taumata kụ bal᷊inewe lulune.
13Kereu i kami e kawe kakěllaěng seng longehẹ̌, ute kai ual᷊ingu waugu Mawu Ruata. Dingangu kereu i kami e kakěllaěngbe piạ naung i kami e ute kai waug'i kamene.
14Kai kakěndagi Kristus e nẹ̌karadiahang si kami, ringangu i kami e masingkạ bue u kereu sěngkatau seng nate waugu kěbị taumata, ute ene maul᷊ị u kěbị taumata e seng nate.
15I Kristus e napohong baugu kěbị taumata, tadeạu apam biahẹ̌ e, wal᷊inewe samatang měbẹ̌biahẹ̌ baugu watangenge hala, kaiso kawe waug'i Kristus e seng napohong dingangu niapẹ̌biahẹ̌ kapia waugu pandungang i sire.
16Ual᷊ingu ene, i kami e tawe mangangarẹ̌gan taumata e tuhụ ukurangu taumata. Watụ u kahěngang bue i kami e wọu lai měngẹ̌ngarẹ̌gang Kristus e tuhụ mạtaumata, kai orasẹ̌ ini e semben talawue.
17I sain seng nasěmbaụ dingang i Kristus e kai seng nakoạ taumata wuhu kahěnga-hěngang. Apan těbe e seng tawẹdise, watụ u kěbị e seng nariadi wuhu.
18Kěbị ene kai ual᷊ingu karadiahang u Mawu Kasěllahenge. Limiung Kristus e Mawu Kasěllahenge napakapiang kitẹ kạpia ringang'E, bọu ene napěmunarang kitẹ tadeạu taumata wal᷊ine mal᷊aing mẹ̌sěngkapiang Mawu Kasěllahenge.
19I kami e mělẹ̌habarẹ̌ u limiu wọu anung Kristus e, Ruata napẹ̌sěngkapian taumata e kapia ringangu watangeng'E Duata e nẹ̌koạ ene tawe něnuntụ kal᷊awọu pẹ̌sasal᷊a nạung nikoạ u taumata waugu watangeng'E. Ringangu i kami e seng niorom Mawu Ruata e waugu pělẹ̌habaru hengetang ene.
20Kụ i kami e kai rarolohang i Kristus. Wọu anung kami e Mawu Kasěllahenge hala naul᷊ị u tatanatan'E. Su areng i Kristus, i kami e ghụgahiorọ sěngapang botonge, u pěmpanarimạko laul᷊uhu takiahu Ruata e mapẹ̌sěngkapiang kamene ringang'E.
21I Kristus e tawẹ dosane, kaiso Mawu Ruata e nědiadin Sie něnal᷊udẹ̌ dosang kitẹ, tadeạu i kitẹ e saụbe mẹ̌sěngkapian Duata e ual᷊ingu nakauhẹ̌ dingang i Kristus.
<< 2 Korintus 5 >>
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel