Alkitab Mobile SABDA
[VER] : [SANGIR]     [PL]  [PB] 
 <<  Galatia 2 >> 

1Mapul᷊o ěpạ su taunge tuhụ e, iạ nẹ̌bal᷊ị sarang Yerusalem dingangi Barnabas, masene nẹ̌bawa ko l᷊ai si Titus.

2Iạ nakoạ sarang Yerusalem batụu Mawu Ruata e seng nělahẹ si siạ u iạ harusẹ̌ tamai. Kụ sural᷊ungken pẹ̌sasombang natuntụ dingangu manga matatebone sene, iạ něnualagu Injilẹ̌ apan takụ ilẹ̌habarẹ̌ su taumata apạewen bal᷊ine Yahudi. Batụu iạ madiri tawakal᷊iku nạung kạngerẹ, dingangu orasẹ̌ ini e makoạbe tawẹ mangal᷊ene.

3I Titus, dingangku e kai sěngkatau taumatan Yunani, kai tawe nisihasa pạtol᷊e tiahan sunatẹ̌ e,

4maning lai piạ taumata měmpẹ̌nẹ̌nihasang hal᷊ẹ̌ ene. I sire kai taumata němpẹ̌kěmbuni su ral᷊ungu ghal᷊ipohon kitẹ kụ makịtikạ u kai anạ u sěmbaụ. I sire němpẹ̌těngkal᷊aụ mapěni-pěnisẹ̌ mẹ̌deạu měmpẹ̌pahimang karal᷊iwir'i kitẹ ual᷊ingu i kitẹ kawe nakauhẹ̌ dingangi Kristus Yesus. I sire mapulu mapẹ̌bal᷊ị i kitẹ nạung kere kal᷊imona kere ěllang,

5kai i kami e tawe napakawala kadiongeng sarang kadodọ si sire, ual᷊ingu i kami mapulu měndiagạ tadeạu Injilẹ̌ e kạtatanạbe wurẹ̌si waugi kamene.

6Maning kerene, tawẹ apawe manga hal᷊ẹ̌ buhu tẹ̌tuntukang bọu iạ kahian taumata apạewen ikẹ̌kapanda matatebone -- kai si siạ ete wue měngkate mẹ̌sul᷊ung kereu i sire kawe matatebone arau tala watụ u Ruata e tawe měmanda ghati.

7Su sěmběkane, taumata kụ ikẹ̌kasilo matatěbone e mạngaku, u Ruata seng dimolohu iạ mẹ̌deạu pẹ̌lẹ̌habaru Injilẹ̌ su wal᷊ine tau Yahudi, mẹ̌sul᷊ungu kere i Sie seng něngoro si Petrus baugu pěhabaru Injilẹ̌ ene su tau Yahudi.

8Watụ u Ruata e nangonggọ u toghasẹ̌ si Petrus baugu makoạ darolohang baugu tau Yahudi, ringangu měngonggọ u toghasẹ̌ l᷊ai si siạ makoạ darolohang baugu wal᷊ine tau Yahudi.

9I Yakobus, i Petrus dingangi Yohanes, apang kakěllaěng nakoạ manga těmbonangu jamaatẹ̌ něngaku u Ruata seng něngonggọu munara těntani ini e si siạ. Tangu i sire něngumbelẹ lima ringangi Barnabas dingangku nakoạ kere tatialan pẹ̌dal᷊ahapị. Mase i sire ringangi kami mapulu mẹ̌sěngkanaung sarung měmunara sutal᷊oaran manga wansa wal᷊ine Yahudi ringangi sire sutal᷊oaran tau Yahudi.

10Kakěsạe rorong i sire ute kai mẹ̌deạu i kami iapạtatingang tau kasiang kụ iạ mambeng mal᷊uasẹ̌ mẹ̌koạ hal᷊ẹ̌ ene.

11Sarạeng i Petrus diměnta su Antiokia, iạ dimokạ si sie su těngone batụu kakanoạ e nẹ̌sal᷊a.

12Kahumotong-motongange i sie naiang kimaěng-sěngkakaěng dingangu manga anạ u sěmbaụ bal᷊ine tau Yahudi. Arawe sarạeng taumata rarolohang i Yakobus narěnta, i sie napakaraung batangenge wọu manga anạ u sěmbaụ bal᷊ine tau Yahudi sembeng lai tawe mapulu kumaěng dingangi sire, watụ u mạtakụ u i sire kụ mapulu tadeạu kěbị taumata ipakisunatẹ̌.

13Manga anạ u sěmbaụ Yahudi lai wal᷊ine mal᷊aing timol᷊e sěngkapěmělle kere i Petrus, hakịu i Barnabas mal᷊aing kẹ̌kawinsanaěngu pěmaměllen sire.

14Kerene iạ makasilo u kakanoạ i sire tawe sěndal᷊engu katěngadu Injilẹ̌ ene, iạ nẹ̌bera si Petrus su těngong kakěpal᷊u taumata narěnta sene, "Kamagengu i kamene taumatan Yahudi kai seng měbẹ̌biahẹ̌ kere wal᷊ine tau Yahudi, unụe wue i kamene měnihasawe taumata wal᷊ine mẹ̌biahẹ̌ kere tau Yahudi?"

15Těngadẹ̌ tumuhụ asal᷊ẹ̌, i kami kai tau Yahudi kụ bal᷊inewe "taumata wal᷊ine Yahudi marosa".

16Maning lai i kami masingkạ u taumata e mẹ̌sěngkapia ringangu Ruata kẹ̌taeng ual᷊ingu mangimang si Yesus Kristus, kai wal᷊inewe ual᷊ingu měndal᷊engu toratẹ̌. I kami hala l᷊ai mạngimang si Yesus Kristus, mẹ̌deạu i kami mẹ̌sěngkapian Mawu Ruata, ual᷊ingken pěngangimang i kami ene, kai wal᷊inewe ual᷊ingu i kami mẹ̌děndal᷊engu toratẹ̌. Batụu ual᷊ingu měndal᷊engu toratẹ̌ e, tawẹu sarang sěngkatau rembeng mẹ̌sěngkapian Duata kapia.

17I kami e seng mẹ̌tẹ̌tatětehẹ̌ sěngapam botonge mẹ̌sěngkapian Duata supẹ̌bawiahẹ̌ masěmbaụ dingangi Kristus. Kai kamagengu seng bọu měndal᷊engu ene, kutẹu i kami e mang těbe "taumata marosa" mal᷊aing kere taumata wal᷊ine tau Yahudi, apa měnsang ini e ual᷊ingu i Kristus nakawarạdosa si kami ngae? Nal᷊ahẹu mambeng tala!

18Kereu iạ měmětị saụ tiahan toratẹ̌ kụ seng takụ nighoghahẹ̌, ute iạ seng nakoạ taha l᷊ampa toratẹ̌.

19Kai iạ e seng nate su toratẹ̌ -- niapakapate waugu toratẹ̌ ene sẹ̌sane -- mẹ̌deạu iạ makapẹ̌biahẹ̌ baugu Ruata. Iạ seng nikuruisẹ̌ dingangkeweng Kristus.

20Kutẹu ini e wal᷊ine lai iạ měbẹ̌biahẹ̌ kaiso i Kristus měbẹ̌biahẹ̌ su ral᷊ungu watangengku. Biahẹ̌ ini takụ ipẹ̌bẹ̌biahẹ̌ ini e kai pẹ̌bawiahẹ̌ ual᷊ingu pangangimang su Ahusu Ruata kiměndagu iạ dingangu seng nẹ̌těngkasarakang baugu iạ.

21Iạ tawe mẹ̌gagholọu tatal᷊ěntụ u Ruata e. Kereu pẹ̌kakauhu taumata ringangu Ruata e mariadi mapia saụ ual᷊ingu měndal᷊engu toratẹ̌, ene mangal᷊ene kapapohong i Kristus tawẹ gunane!



 <<  Galatia 2 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel Single Panel