Alkitab Mobile SABDA
[VER] : [SANGIR]     [PL]  [PB] 
 <<  Galatia 3 >> 

1Manga anạ u sěmbaụ taumatang Galatia! I kamene mambeng longong! Kụ i kamene měnsang nikaraghusang i sai? Papateng Kristus su kuruisẹ̌ e seng takụ saụ nitualagẹ̌ dingangu mal᷊ahẹ-l᷊ahẹ si kamene!

2Kěnangko pẹ̌habarẹ̌ si siạ hal᷊ẹ̌ sěmbaụ ini: Apa i kamene seng něnarimạu Rohkẹ̌ u Ruata ual᷊ingu měndal᷊engu toratẹ̌, arau kai ual᷊ingu i kamene nakaringihẹ̌ Injilẹ̌ bọu Ruata ringangu mạngimang si Kristus?

3Unụ e i kamene kerene kal᷊ongonge! I kamene seng němpanětạ u pẹ̌bawiahẹ̌ buhu ringangu Rohkẹ̌ u Ruata, kawe ini i kamene mapulu mapakasukụ ene ringangu kuatu watangeng hala?

4Kụ kai tawẹ kěhase kěbị apan seng nikaěbạ i kamene tangu? Kawe unụe tawẹ gunane?

5Ruata e nangonggọ u Rohkẹ̌'E si kamene ringangu nẹ̌koạ manga tanda makạl᷊aherang sutal᷊oarang kamene. Apa měnsang Duata e nẹ̌koạ ene ual᷊ingu i kamene něndal᷊engu toratẹ̌ arau ual᷊ingu i kamene nakaringihẹ̌ Injilẹ̌ e kụ mangimang si Kristus?

6Ene mẹ̌sul᷊ungu kere mạbawohẹ su ral᷊ungu Winohẹ Susi mạanung Abraham -- kere ini, "i Abraham mạngimang su Mawu Ruata, ringangu ual᷊ingu pangangimange ene i sie nitarimạ u Mawu Ruata al᷊ingkai taumata makạl᷊uasẹ naungu Mawu Ruata."

7Kụ kěnangko i kamene pakaěnna u taumata kahěnga-hěngang hěntong Abraham ute kai taumata mạngimang su Ruata.

8Winohẹ Susi seng nakasilo rokeng kal᷊imona u Ruata e kawasa mapakariadin bal᷊ine tau Yahudi e saụ mẹ̌sěngkapian Duata, kereu i sire mangimang si Sie. Injilẹ̌ ene nipakasingkạ dokeng kal᷊imona si Abraham su ral᷊ungu kědo ini, "Su ral᷊ung i kau Ruata sarung měngal᷊amatẹ̌ patikụ umatẹ̌ su wowon dunia."

9I Abraham mạngimang hakịu i sie nial᷊amateng. Kerene lai patikụ taumata apang mangimang, sarung sěngkaal᷊amatẹ̌ dingangkewen i Abraham.

10Apan taumata kụ mạngumbala su toratẹ̌ e kěbị mẹ̌bẹ̌biahẹ̌ su al᷊ungu laane. Batụu su ral᷊ungu Winohẹ Susi mạbawohẹ u, "I sain tawẹ satiane měndal᷊eng patikụ apan mạbawohẹ su ral᷊ungu bukẹ̌ u toratẹ̌ e, ianeng Duata!"

11Tawẹ u sarang sěngkatau mẹ̌sěngkapia ringangu Ruata ual᷊ingu mẹ̌děndal᷊engu toratẹ̌. Hal᷊ẹ̌ ene seng nilahẹ su ral᷊ungu Winohẹ Susi, "Kětạeng isain mạngimang su Ruata hakịu pẹ̌kakauhẹ̌ dingangu Ruata saụ makoạ mapia kụ sarung mẹ̌biahẹ̌!"

12Kai toratẹ̌ e tawe kinaianeng su pangangimang. Su ral᷊ungu Winohẹ Susi mạbawohẹ u i sain měndal᷊engu toratẹ̌ e, sarung mẹ̌biahẹ̌ ual᷊ingu toratẹ̌ ene.

13Arawe i Kristus něliwirẹ̌ si kitẹ bọu anen toratẹ̌. I Sie nẹ̌koạ ene ringangu napakawalan batangeng'E nianeng, ual᷊ingu i kitẹ. Batụu su ral᷊ungu Winohẹ Susi mạbawohẹ, "Kal᷊aane, si sain nate mạgaghantong su kalu."

14I Kristus nẹ̌koạ kerene tadeạu al᷊amatẹ̌ nikẹ̌don Duata si Abraham nionggọ l᷊ai su apan bal᷊ine tau Yahudi. Ual᷊ingu ene i kitẹ mal᷊aing mạngimang su Ruata kụ makatarimạ u Rohkẹ̌ kụ nikẹ̌don Duata ene.

15Manga anạ u sěmbaụ! Mạpiangbe iạ mẹ̌pakẹ u kakakěllaěng bọu ěbạu pẹ̌bawiahẹ̌ měllo-měllo. Kereu taumata měngikịu pẹ̌kakakědo kụ kẹ̌do ene seng nitahuntěngareng ute tawẹu sarang sěngkatau makaghoghahẹ̌ pẹ̌kakakẹ̌do ene, arau makapěnambang manga apa si sie.

16Kal᷊awọu kẹ̌don Duata e nịkakoạ u Ruata waug'i Abraham dingangu waugu hěnton Abraham. Su ral᷊ungu Winohẹ Susi tawe nawohẹ "kai waugu taumata hěnton Abraham", kụ mangal᷊ene taumata l᷊awọ. Kutẹu mạbawohẹ sene ute, "dingangu waugu pal᷊ahěntonu mangal᷊ene sěngkatau tudẹ", kụ kai i Kristus.

17Kụ takụ sarung ipaul᷊ị sini kai ini: pẹ̌kakẹ̌don Duata seng nikoạ dingangu nitahutěngadeng kal᷊imona. Toratẹ̌ kụ nionggọ samurin ěpạ u hasụ těllum pul᷊o su taunge tawe makaghoghahẹ̌ pěnanahuntěngadẹ̌ dingangu makarẹ̌dasẹ̌be kẹ̌don Duata ene.

18Kai kereu laonggọ u Ruata isẹ̌sangẹ su toratẹ̌ ute ene wal᷊inewe lai laonggọ su kẹ̌do. Ual᷊ingu Ruata seng nẹ̌kědo si Abraham, ute Ruata e nangonggọ u ene si sie.

19Kamageng kerene, kai waugu apa tangu toratẹ̌ e nionggọ? Sasimbange ute toratẹ̌ ene kai nitamba tadeạu mělahẹu pěndal᷊ampang taumata. Toratẹ̌ ene kětạeng mapakẹ sarạeng darěntan sěngkatau hiten Abraham kụ nisẹ̌bạ su ral᷊ungu kẹ̌don Duata si Abraham. Toratẹ̌ ene nionggọ u manga malạekatẹ̌ piạ měnaněpase sěngkatau taumata.

20Kụ hinong piạ duang kamonaěng, buhụewe piạ sěngkatau mananal᷊oarane. Arawe Ruata e tawe mẹ̌gaghausẹ̌ mananal᷊oarane, watụ u kai i Sie sẹ̌sane kimanoạ.

21Kụ apa měnsang ene mangal᷊ene ute toratẹ̌ e mědẹ̌dokạ dingangu kẹ̌don Duata? Mambeng těngadẹ̌ tala! Kai kereu toratẹ̌ e nionggọ mẹ̌deạu makariadi al᷊amatẹ̌ su pẹ̌bawiahu taumata, tangu taumata e makapẹ̌sěngkapiawen Duata su ral᷊ungu toratẹ̌.

22Kai su ral᷊ungu Winohẹ Susi mạbawohẹ patikụ taumata e kai su al᷊ungu kawasan dosa. Ual᷊ingu ene, laonggọ kụ pinẹ̌kẹ̌do kụ niwěnta su pangangimang si Yesus Kristus nionggọ si sire apan měmpạngimang!

23Těntal᷊ang ta nạděnta tempone mangimang si Kristus, i kitẹ dẹ̌diagatengu toratẹ̌ masěga-sěgadẹ̌; i kitẹ mẹ̌sul᷊ungu nịkakurung sarang pangangimang ene ilahẹ.

24Dingangu kerene ute, toratẹ̌ e nakoạ kere měnanitị si kitẹ sarang i Kristus duměnta mẹ̌deạu mapakariadin kitẹ saụ mẹ̌sěngkapian Duata ual᷊ingu i kitẹ mạngimang si Kristus.

25Orasẹ̌ ini, ual᷊ingu seng tempone taumata mangimang si Kristus ute i kitẹ semben tawe lai titikangu toratẹ̌.

26Ual᷊ingu i kamene mạngimang si Kristus Yesus, ute i kamene nasěmbaụ dingangi Sie; kụ ual᷊ingu ene i kamene nakoạ manga anạ u Ruata.

27I kamene kěbị seng nisahani su areng i Kristus, kụ i kamene seng něnarimạ u watangeng i kamene apạewen kakakoạ i Kristus sẹ̌sane.

28Su ral᷊ungu ene ute semben tawẹ pẹ̌dal᷊ahaen tau Yahudi ringangu wal᷊ine Yahudi bọu tal᷊oaran ěllang dingangu wal᷊ine ěllang, bọu tal᷊oarang esẹ dingangu wawine. I kamene kěbị e nasěmbaụ ual᷊ingu i Kristus Yesus.

29Kereu i kamene tẹ̌taghuaneng i Kristus, ute i kamene kai hěnton Abraham. Kụ i kamene sarung manarimạ u apang kụ nikẹ̌don Duata.



 <<  Galatia 3 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel Single Panel