Alkitab Mobile SABDA
[VER] : [SANGIR]     [PL]  [PB] 
 <<  Kisah Para Rasul 15 >> 

1Pirang katau taumata wọu Yudea narěnta su Antiokia kụ němpaněntiro taumata mạngimang su Antiokia ene, u kamagengu i sire tawe sunateng tumuhụ torat'i Musa, i sire tawe masal᷊amatẹ̌.

2I Paulus dẹ̌duan Barnabas dụdokạ kahěngang su timonan sire ene. Pěngěnsueěnge tangu mapakasahẹ u tadeạu i Paulus dẹ̌duan Barnabas dingangu pirang katau lai wal᷊ine wọu Antiokia, apạtaraị sol᷊ong Yerusalem mědeạu mẹ̌dal᷊ahintaung hal᷊ẹ̌ ene ringangu manga rarolohang ore lai apang měngangahạ e sene.

3Jamaatẹ̌ su Antiokia něnondan sire sarang likudu soa, bọu e i sire nakoạ sol᷊ong Fenisia ringangu Samaria. Sene i sire němpẹ̌běkẹeng kakakoạ u taumata wal᷊ine tau Yahudi kụ seng němpěnarakang u watangeng i sire su Mawu Ruata. Habarẹ̌ ene mangkewen nakal᷊uasẹ̌ naungu taumata mạngimang su tampạ ene.

4Piạ e i sire narěntạ e su Yerusalem, i sire nisěnsomaheng mapia kahian jamaatẹ̌ e, ringangu kahian manga rarolohang ore lai manga pangahạ e. Bọu e i rẹ̌dua něběkẹeng kěbị apang seng nikoạ u Mawu Ruata si rẹ̌dua e, si sire.

5Arawe pirang katau wọu komol᷊angu tau Farisi kụ seng mạngimang, dimarisị kụ nẹ̌bera, "I sire wọu kawanua wal᷊ine kụ seng němpangimang e hinong i sunatẹ̌ dingangu mambeng harusẹ̌ tumol᷊e torat'i Musa."

6Mase manga rarolohang dingangu manga pangahạ e nẹ̌komol᷊ẹ̌ baugu mẹ̌dal᷊ahintaung hal᷊ẹ̌ ene.

7Marěngụ kahěngang i sire měgẹ̌gaghěllị u ěnna. Pangěnsueěnge i Petrus dimarisị kụ nẹ̌bera angkuěng, "Manga anạ u sěmbaụ! I kamene hala e masingkạ u seng nạung bědang tempo nal᷊iu, Mawu Ruata e němile si siạ bọu tal᷊oarang kamene tadeạu měhabaru Injilẹ̌ su wal᷊ine tau Yahudi e, tadeạu i sire mal᷊aing dumaringihẹ̌ dingangu mangimang.

8Kụ Mawu Ruata e kụ masingkạ u ral᷊ungu naungu taumata e seng něnodẹ u i Sie něnarimạ i sire; i Sie napakal᷊ahẹ u ene kụ něngonggọ u Rohkẹ̌ u Ruata e si sire mẹ̌sul᷊ungkewelai seng nionggọ e si kitẹ.

9Duata e tawe mapẹ̌dal᷊ahaeng kitẹ e ringang i sire. I Sie napakasusin naung'i sire, ual᷊ingu i sire němpangimang.

10Kụ, kawe unụe i kamene mapulu rumokạ Duata su tempo ini kụ měngonggọ u wawawaěng mawěhạ su manga murite ini, sěmbal᷊iau manga i upung i kitẹ dingangkewelain i kitẹ hala e mal᷊aing tawe makaumal᷊ẹ̌ měndal᷊engu kěbị e?

11Ral᷊iune wue, i kitẹ e kawe mạngimang dingangu i kitẹ e iapakasal᷊amatẹ̌ ual᷊ingu kakěndag'u Mawu Yesus; kerene lai i sire."

12Tangu něngkarěmmase kěbị taumata apạewen němpẹ̌komol᷊ẹ̌ sene. Bọu ene i sire e rimaringihewe si Barnabas dẹ̌duan Paulus saụ měbẹ̌běken kal᷊awọu tanda makal᷊aherang dingangu apạeweng makạdal᷊inaụ tạ sihinge kụ seng nikoạ u Mawu Ruata kụ pinakikoạewe si rẹ̌dua e sutal᷊oarạeweng kawanua wal᷊ine tau Yahudi e.

13Nasuẹen běkene i rẹ̌dua e, i Yakobus nẹ̌bera, "Manga anạ u sěmbaụ! Kěnnangko raringihẹ̌ si siạ.

14I Simon buhụewe nẹ̌běken saheng kakakoạ u Mawu Ruata e nạung humotong něngukahu pěndangu naung'E si sire wal᷊ine tau Yahudi, piạ timonane měmile wọu tal᷊oarang sire taumata wal᷊ine e kụ sarung makoạ umat'E.

15Kụ ene nẹ̌tatal᷊ahino kere seng nitěbal᷊u manga nabi e. Batụ u kai piạ kạbawohẹ kere ini,

16'Samuring ene Iạ e ruměnta kapia,' angkuěngu Mawu, 'Iạ e sarung měmangung kapia wal᷊eng Daud kụ seng nahaka e, ringangu mangul᷊ị apang naopehẹ̌ e, kụ saụ ipakatei;

17tadeạu kal᷊awọu taumata apan nal᷊ěmbe ene, měmpẹ̌deạ Mawu, sěngkapědeạ dingangi sire kěbị kawanua wal᷊ine apang bal᷊ine Yahudi kụ seng nikuiang baugu makoạ tataghuaneng-Ku.' Kerene angkuěng u Mawu,

18kụ seng něhabaru hal᷊ẹ̌ ene nạung kal᷊amona."

19"Ku pěndangengku," angkuěng i Yakobus, "i kitẹ e tawe wotonge manigěsạ si sire wal᷊ine tau Yahudi ene kụ seng něnarakang u watangenge su Mawu Ruata.

20Arawe i kitẹ e hinong měmohẹ u suratẹ̌ si sire ringangu měnasa si sire tadeạu i sire mẹ̌těllingu kumaěng kaěng mal᷊amuhụ kụ seng nakoạ sasěmba su mahang duata, arau kuminạ gẹ̌sing binatang nate natěpu arau kuminạ (manginung) daha. Dingangu l᷊ai tadeạu i sire mẹ̌teghang u watangeng i sire wọu pẹ̌sasasundal᷊ẹ̌.

21Batụ u torat'i Musa e seng nạung dokeng kal᷊amona wẹ̌basaěng apang ěllong Sabatẹ̌ su manga kanisa, ringangu ilẹ̌habarẹ̌ su patikụ soa."

22Manga rarolohang dingangu manga pangahạ e, ringangkewelain kal᷊awọu ral᷊ohong jamaatẹ̌ němpamutusẹ̌ u měmile manga pirang katau wọu i sire apan nirolohẹ̌ sol᷊ong Antiokia ringang i Paulus dẹ̌duan Barnabas. Tangu i sire němile si Silas dẹ̌duan Yudas kụ isẹ̌sẹ̌bạ l᷊ai si Barsabas. I rẹ̌dua ini e kai taumata mapapiang jamaatẹ̌ e wọu tal᷊oarang taumata mạngimang su Yerusalem.

23Ringangkewelain manga rarolohang ene i sire něndoho lai suratẹ̌ kụ bawerane kere ini, "Su kal᷊awọu manga anạ u sěmbaụ bọu kawanua wal᷊ine kụ bal᷊ine Yahudi, apang mětẹ̌tanạ su Antiokia, Siria, ringangu Kilikia. Tabeạ bọ'i kami manga rarolohang dingangu pangahạ u jamaatẹ̌ kụ anạ u sěmbaụ i kamene.

24I kami nakaringihẹ̌ piạ pirang katau wọu tal᷊oarang kami kụ seng nakoạ sol᷊ong anung kamene kụ nakapẹ̌ganohạ dingangu nakapẹ̌bingọ si kamene ual᷊ingu manga těntiron sire. Sumbal᷊iau i kami e tawe měngangoro si sire pěkẹ̌koạ ene.

25Hakịu ene i kami e seng něral᷊ahintau, kụ kěbị e seng sěngkanaung mědeạu měmile manga pirang katau kụ měndolohi sire sol᷊ong anung kamene. I sire sarung sěngkaral᷊eng dingangu ikẹ̌kěndag'i kitẹ i Barnabas, dẹ̌duan Paulus.

26I rẹ̌dua ini e kai seng kahěnga-hěngang něnarakangu watangeng irẹ̌dua e su Mawung kitẹ i Yesus Kristus.

27Kụ i kami e měndoloh'i Yudas dẹ̌duan Silas sol᷊ong anun manga anạ u sěmbaụ. Seng i sire e kụ sarung měhabarẹ̌ si kamene wọu mohong i sire hala habarẹ̌ kụ mal᷊aing kạbawohẹ su ral᷊ungu suratẹ̌ ini.

28Rohkẹ̌ u Ruata e seng kimire -- dingangkewelaing i kami kụkire -- tadeạu i kamene kumbahangbe lěngkanengu wawawaěng limembong kawěhạe wọu manga wawawaěng ini:

29mangal᷊ene tangu: pẹ̌tělling bue kumaěng kaěng kụ seng bọu nakoạ sasěmba su mahang duata, kumbahang kuminạ dahang binatang kụ nate natěpu, ringangu pěmpẹ̌teghang bue wọu kakanoạ u pẹ̌sasasundalẹ̌. Kereu i kamene mẹ̌těghangu watangeng i kamene wọu tamai ene, ute i kamene seng bọu nẹ̌koạ mapia. Kětạengbeng kerene e, kụ sal᷊amatẹ̌ bue!"

30Bọuten nẹ̌katạ, i sire apan nirolohẹ̌ ene nẹ̌buạ sol᷊ong Antiokia. Sene tangu i sire nẹ̌kuị e kěbị dal᷊ohong jamaatẹ̌ e nipẹ̌tampung kụ piněhabareng u suratẹ̌ ene.

31Sarạeng kěbị dal᷊ohong jamaatẹ̌ nakawasạ e suratẹ̌ ene tangu, i sire měngkate nahul᷊uasu ral᷊ohone nakapia ihạ i sire e.

32I Yudas dẹ̌duan Silas e mal᷊aing nabi, selaing marěngụ mạhumbisarang kamene manga anạ u sěmbaụ apang mạngimang su Antiokia e mědeạu mẹ̌gěllị u wawahansang dingangu wawal᷊insahẹ̌ si sire.

33Sarangkeng i Yudas dẹ̌duan Silas nẹ̌tanạ sěngkatempo sene, taumata mạngimang su Antiokia e napẹ̌sul᷊en dẹ̌dua e ringangu něngoro si rẹ̌dua apạněpasu tabeạ suapạewen taumata rimoloh'i rẹ̌dua e.

34[Kai i Silas e němutusẹ̌ u mẹ̌tana sene pakatatapẹ̌ su Antiokia.]

35I Paulus dẹ̌duan Barnabas mal᷊aing mẹ̌tẹ̌tanạ sěngkatempo su Antiokia, měmpạněntiro ringangu měmpělẹ̌habaru hengetang u Mawu e ringangkewe lai taumata wal᷊ine e lawọ.

36Ta nararěnnạ wọu ene tangu i Paulus nẹ̌bera si Barnabas, "Bọete i kitẹ kapia mẹ̌tiwo manga anạ u sěmbaụ apang mạngimang su Mawu Yesus, su patikụ soa suapạeweng piněhabareng i kitẹ e hengetang u Mawu; tadeạu i kitẹ e makasilo kereapa kakakoạ i sire."

37I Barnabas mapulu měmaringang i Yohanes Markus,

38kaiso i Paulus tawẹ karal᷊uase měmaringang i Markus, ianu ta mapulu sěngkapěhal᷊ẹ̌ dingang mase naněntangkol᷊ain sire su Pampilia.

39Tangu i Paulus dẹ̌duan Barnabas nẹ̌darendehẹ̌ marasai hakịu pangěnsueěnge i rẹ̌dua e nẹ̌tal᷊ei: I Barnabas němaringang i Markus, kụ nẹ̌sakaeng dingange sol᷊ong Siprus.

40I Paulus ute namile si Silas mase nẹ̌buạ dingange saraeng manga anạ u sěmbaụ su Antiokia e něnarakang i sire su tatal᷊ěntụ u Mawu e.

41I sire mal᷊aing limuhu wanuan Siria ringangu Kilikia; kụ sene i sire měmpạnoghasẹ̌ apan jamaatẹ̌.



 <<  Kisah Para Rasul 15 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel Single Panel