Alkitab Mobile SABDA
[VER] : [SANGIR]     [PL]  [PB] 
 <<  Kolose 1 >> 

1Manga anạ u sěmbaụ dal᷊ohon jamạat'u Mawu su Kolose kụ satia su pẹ̌kakauhẹ̌ dingangi Kristus! Kere sěngkatau rarolohang i Kristus Yesus, -- kahiang kapulun Mawu Ruata e -- iạ nihengkẹ sěngkakahengkẹ dingangu anạ u sěmbaụ i kitẹ i Timotius, mělẹ̌harapu mal᷊umbạko Ruata i Amang kitẹ e měngonggọu al᷊amatẹ̌ dingangu karal᷊unsemahẹ̌ si kitẹ kěbị.

2(1:1)

3I kami seng nakaringihẹ̌ u i kamene mạngimang su Mawu Yesus Kristus dingangu i kamene kuměndagu patikụ dal᷊ohon jamaatẹ̌. Kai ene hakịu su tempong i kami měkẹ̌kal᷊iomaneng baụgi kamene, i kandua e měngkate hanesẹ̌ makịtarimakasẹ su Ruata, i Amang u Mawung kitẹ i Yesus Kristus.

4(1:3)

5I kamene mangimang dingangu i kamene kụkěndagẹ̌, u i kamene mělẹ̌harapẹ̌ apang kụ seng nisadia su sorga kahian Duata e waugi kau. I kamene seng nakaringihẹ̌ mạanung hal᷊ẹ̌ ene, piạ e Wal᷊o Mapia kụ kahěngang nihabarẹ̌ si kau.

6Habaru Mawu Ruata e nasawuhẹ̌ su kasěllahu dunia e mase pẹ̌bawiahu taumata e sěntiniạ lẹ̌al᷊amatengu habarẹ̌ ene, kerẹewe lai nạung pẹ̌bawiahu nial᷊amateng piạ i kamene nakaringihẹ̌ hal᷊ẹ̌ u tatal᷊ěntụ u Mawu Ruata e kụ kahěnga-hěngang nakaěnna.

7Hal᷊ẹ̌ ene ipẹ̌paul᷊ị si kamene kinahian Epafras, dingang i kami e ikẹ̌kěndagẹ̌. I sie kai taumatam munarang Kristus satia měmẹ̌munara e waugu pandungang i kitẹ.

8Kai wọi sie asal᷊e i kami e makadingihẹ̌ u kai kawasan Rohkẹ̌ u Ruata e i kamene makakoạ mẹ̌kakakěndagẹ̌.

9Kai ene hakịu i kandua měngkai hanesẹ̌ měkẹ̌kal᷊iomaneng baugi kamene nanětạewe rokeng bọu ěllo i kandua nakaringihẹ̌ habaru mạul᷊ị i kamene. I kandua měkẹ̌kal᷊iomaneng su Mawu Ruata e mal᷊owọko Rohkẹ̌ u Ruata e měngonggọu kasingkạ dingangu katatahuěnna masukụ si kamene kai apạ e kapulun Mawu Ruata.

10Ual᷊ingu ene ute i kamene makapẹ̌biahẹ̌ tumuhụ kapulun Duata, ringangu sěntiniạ makạl᷊uasẹ̌ naung'E, hakịben su patikụ munara e i kamene kapạmurukangbe pul᷊ise mapapia. Dingangu kasingkạ i kamene mạanun Duata e mal᷊aing limembong kạpahuntinambane.

11Karimạko ual᷊ingu kawasang Mawu Kasěllahenge, i kamene iapakatoghasẹ̌ hakịbeng i kamene makatahang dingangu makakẹ̌dang su patikụ sabarang, masasabarẹ̌ dingangu maral᷊uasẹ̌

12kụ dingangu makitarimakasẹ si Amang. Batụu kai i Amange napakariading kamene wotonge makatarimạ u apan nisadian Duata e waugu taumatan'E su kararatuang'E matualagẹ̌.

13I Sie seng nělliung kitẹ bọu kawasang kararěndung kụ seng napěngal᷊ing i kitẹ su ral᷊ungu kararatuangu Ahuse ikẹ̌kěndagẹ̌.

14Ual᷊ingu Ahus'E ene e i kitẹ niapakal᷊iu; mangal᷊ene ute kal᷊awọu rosang kitẹ e seng niampungang.

15I Kristus e kai gambarẹ̌ mal᷊ahẹ bọu awẹ u Ruata kụ tawe i kasasilo; i Kristus e kai Ahuse kaiakanenge, něngalembong kapiange wọu patikụ apan niriadi.

16U kai wọi Sie Mawu Ruata e napakariadin patikụ su sorga ringangu su dunia, patikụ sạbarang ikẹ̌kasilo ringangu tawe ikasasilo, nasowa l᷊ai su ral᷊unge kerẹewe patikụ rohkẹ̌ makawasa ringangu měpẹ̌parenta. Kasěllahu dunia ini e niriadi ual᷊ingu i Kristus dingangu waugi Kristus.

17Kal᷊amonan patikụ sabarang nariadi e, i Kristus semben těbe ene. Dingangu ual᷊ingu i Sie lai hakịu patikụ sạbarange seng su tampạ e sěmbaụ-sěmbaụ.

18I Sie e těmbọu wadang'E, kụ kai jamaatẹ̌, batụu kai i Sie simbul᷊u patikụ laidopu jamaatẹ̌ e. I Sie kai anạ kaiakanenge, kahumotong-motongange niapẹ̌biahẹ̌ kapiạ wọu kapapohong'E, tadeạu sěmatangbe i Sie sẹ̌sane nakoạ kasěllahengu patikụ.

19Kai Mawu Ruata sẹ̌sane piạ kapulune tadeạu patikụ sạbarang kụ kaěbakeng su Mawu Ruata e, kaẹ̌bakengbe lai masukụ su Ahus'E.

20Kụ su ral᷊ungu Ahusẹ̌ ene lai Mawu Ruatae mapakariadin patikụ sabarang piạ pẹ̌dal᷊ahěmpukange kapia ringang'i Sie -- baẹbe patikụ apan su dunia, arau lai su sorga. Mawu Ruata e nẹ̌koạ kerene ual᷊ingu kapapohongu Ahuse su kalu kuruisẹ̌.

21Nạung kạngerẹ e i kamene marau wọu Mawu Ruata. I kamene rụdokạ ual᷊ingu lulu ringangu tiněnnang kamene raral᷊akisẹ̌.

22Arawe ini ute, ual᷊ingu kapapohongu Ahus'E, Mawu Ruata e nẹ̌koạ pẹ̌sasěngkapiang kamene ringange nẹ̌saụ naul᷊ị. Ual᷊ingu kakakoạ kerene ute i kamene wotonge ipẹ̌těngon Duata e su ral᷊ungu kasasusi, matilang dingangu tawẹ turạe.

23Semben tantu i kamene harusẹ̌be tatapẹ̌ satia su pěngangimang dingangu rumarisị matoghasẹ̌ su pěngangimang i kamene. Kumbahangbe sarang i kamene měměllọu pělaharapi kamene kụ seng nionggọ si kamene su tempon nakatarimạ Injilu Ruata. Habarẹ̌ ene e seng pinẹ̌dal᷊ahabarẹ̌ su apan taumata e su kasěllahu dunia e. Kụ ual᷊ingu lai ene watangengku, i Paulus hakịu seng nakoạ mẹ̌tatangkiang.

24Orasẹ̌ ini e iạ mal᷊uasẹ̌ mẹ̌tatahangu sigěsạ baụgu pandungang i kamene. Batụu ual᷊ingu sunsarang badangku e, ute ipạnukụ e apang kụ bẹ̌dang ipẹ̌dararagi Kristus baụgu jamaat'Ẹ̌, mangal᷊ene wadang'E.

25Duata e něndolohu iạ nakoạ mẹ̌tatangkiang jamaat'Ẹ̌ baụgu mạpakạpiang kamene. Iạ e mambeng hinone maněpasu wal᷊on habarẹ̌ bọu Ruata e patikụ;

26mangal᷊ene habarẹ̌ e seng dingangu hasụ e su taunge nal᷊iu ilẹ̌lirungu Ruata e su patikụ taumata kai orasẹ̌ ini e seng nilahẹ su manga umat'E.

27Mawu Ruata e mapulu mapakal᷊ahẹu kereapa kapiane ringangu kawawantuge ral᷊irunge waụgu patikụ taumata. Rahasia ene ute kai: I Kristus kai ene su ral᷊ungi kamene mangal᷊ene i kamene, sarungbe kapusakatengu kawawantugu Ruata.

28I Kristus e kai sarung ipẹ̌dal᷊ahabari kami su kěbị taumata. I kami e kai měngonggọu ingate ringangu mạněntiro si sire kěbị e ringangu patikụ katatahuěnna. Timonang kami e ute kai tadeạu sěngkatau-sěngkatau e ahakeng sol᷊ong anun Mawu, tabidạen sěngkatau seng natěllang tuhụ marohkẹ̌, baụgu seng nasěmbaụ dingangi Kristus.

29Tadeạu makakahumpạu ene ute iạ e měmunara kahěngang. Iạ e mẹ̌tawakal᷊i sěngapam botonge ringangu kạguwạu kuatẹ̌ kụ seng nionggọi Kristus si siạ dingangu nẹ̌karadiahang su watangengku e ringangu kasasukụ u kawasan'E.



 <<  Kolose 1 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel Single Panel