1I kamene e seng niapẹ̌bangung kapia ringangi Kristus. Ual᷊ingu ene i kamene kai harusẹ̌be pěmpẹ̌gausẹ̌ apan dasị su sorga, su piạ i Kristus měpẹ̌parenta ringangu Mawu Ruata.
2Pěmpěnẹ̌naungbe apan dasị sene e wal᷊inewe apan su dunia.
3Batụu i kamene seng nate, kụ pẹ̌bawiahi kamene e mạdal᷊irung dingangi Kristus su ral᷊ungu Mawu Ruata e.
4Kụ simbul᷊u pẹ̌bawiahẹ̌ tutune e ute kai i Kristus kụ mạeng i Sie sarung ikasilo e ute i kamene e mal᷊aing sarung ipakal᷊ahẹ dingangi Sie su ral᷊ungu kasasěllah'E!
5Ual᷊ingu ene, pakasueko pate kal᷊awọu kapulun dunia e mẹ̌nẹ̌naghal᷊i watangengue; kere pẹ̌sasundal᷊ẹ̌, karal᷊amuhụ, abul᷊i, ěnning dal᷊akisẹ̌ dingangu anggang (batụu anggang e kai mẹ̌sul᷊ungu pal᷊ahamawu mahan duata).
6Manga hal᷊ẹ̌ kerene e kai makạsongkahẹ̌ dal᷊angehu Ruata su apan taumata ta tumatuhụ si Sie.
7Nạung humotong i kamene hala e tụtuhụ be lai haghing kapulu kerene, su tempong i kamene su ral᷊ungu kawasane.
8Arawe ini e ute i kamene pěmpěnděmmẹ u haghing kararal᷊akisẹ̌ bọu watangengu: kumbahang měngkai mẹ̌pědu, arau měndongka, arau piạ pěndangu inụ su taumata wal᷊ine. Kumbahang mẹ̌dohang arau mẹ̌beram bawera kotorẹ̌.
9Kumbahang měmpẹ̌konti sěmbaụ suwal᷊ine, u pẹ̌bawiahẹ̌ těbe e ringangu patikụ kakakoạ e sen nirěmmẹ i kamene.
10Kụ i kamene ini e kai sen taumata nionggotangu pẹ̌bawiahẹ̌ buhu tẹ̌tal᷊ěmbuhuang hanesẹ̌ itẹ̌tuhụ awẹ u Měndariadine kụ kai Ruata. Timonane ute tadeạu i kamene makakiral᷊a Ruata ringangu kasasukụ e.
11Makoạ kere pul᷊ise wọu ene ute nasuẹ e něngkailang pẹ̌dal᷊ahaedangu tau Yahudi ringangu wal᷊ine Yahudi; nisunatẹ̌ dingangu tawe nisunatẹ̌; semben tawẹ apa pẹ̌dal᷊ahaedangu tau raghị dingangu taumata ral᷊akisẹ̌; arau ěllang dingangu wal᷊ine ěllang; batụu i Kristus kai mạnahiangkung patikụ sạbarang dingangu i Sie nasěmbaụ dingang i sire kěbị e.
12I kamene e kai taumatan Mawu. Ruata e kiměndagi kamene mase němile si kamene makoạ tataghuaneng'E tani. Ual᷊ingu ene i kamene harusẹ̌ pěmpělahẹu pẹ̌kakakěndagẹ̌, mẹ̌sěngkapiang anạ u sěmbaụ, kasasanạ u naung, sikome naung, ringangu makẹ̌dang su sigẹ̌sạ.
13I kamene harusẹ̌ mẹ̌sasabarẹ̌ sěmbaụ dingangu wal᷊ine, dingangu mẹ̌gaghěllị u ampung kereu piạ u měndesọ tunenaung su wal᷊ine. Mawu e mal᷊uasẹ̌ měngampung si kamene, kụ i kamene mal᷊aing hinom mẹ̌pẹ̌papangampung sěmbaụ dingangu wal᷊ine.
14Su wowon tamai ene, kěbị e ute: i kamene harusẹ̌be mẹ̌kakakěndagẹ̌ u kakěndagẹ̌ e mạpakasěmbaụ i kamene makoạ masukụ.
15Kariadiko apan sipirangu e měngkai mạtuntụ u pẹ̌darame nionggọ i Kristus su ral᷊ungu naungu. U i kamene kai nikuiangu Ruata e makoạ laesu wadang sěmbaụ, tadeạu i kamene mẹ̌biahẹ̌ su ral᷊ungu pẹ̌darame wọu anung Kristus e. Kụ i kamene měngkai pakịtarimakasẹ.
16Karimạko hengetang i Kristus napenẹu al᷊amatẹ̌ e měngkai luměnạ su ral᷊ungu naung i kamene. Kụ i kamene e pěmpẹ̌tatěntiro wue sěmbaụ dingangu wal᷊ine ringangu pěmpẹ̌tatẹ̌gu wue sěngapang kaudupe. Pěmpẹ̌kantarikon Mazmurẹ̌ dingangu raralo arau kakantarị mararohkẹ̌; pẹ̌kantarịko waugu Ruata, ringangu pěndangu tatarimakasẹ su naung i kamene.
17Nimbụe, patikụ apang kinoạ i kamene, arau mạbera e, hinong i koạ dingangu iwera su ral᷊ungu arengu Mawu Yesus. Kụ i kamene e pěmpẹ̌kal᷊iomanengko su Mawu Ruata i Amang bọi Yesus.
18I kamene manga wawine e! Pakasasuměllung bue su kawingi kamene, u kawe kerene hinone kakakoạ u taumatan Sahani.
19I kamene manga esẹ! Kẹ̌kěndagẹ̌beng kawingi kamene. Abe ral᷊ahětu mẹ̌koạ si sire.
20I kamene manga rariọ e! Kai kerene mẹ̌koạ taumatan sahani e, harusẹ̌be pakararingihẹ̌ si amangu ringangu si ninangu, batụu kai ene makạl᷊uasẹ̌ naungu Mawu Ruata.
21I kamene manga i amange! Ariẹbe mapal᷊angehu anạ i kamene mạdiring kumondọ naung i sire.
22I kamene mẹ̌tatangkiang e! Pakatatuhụ su manga mawung kamene su dunia e su patikụ sabarang. Abe kawe kětạeng tụtuhụ su tempon i sire makạsilo si kamene, ual᷊ingu i kamene kawe kětạeng makiralo. Tuhukeko i sire ringangu naung matul᷊idẹ̌, batụu i kamene matakụ u Mawu.
23Hal᷊ẹ̌be sude nionggọ si kamene ute, koạko ringangu kasěllahu naungu tabidạu i kamene měkẹ̌koạ baugu Mawu wal᷊inewe tumbạem baugu taumata.
24Pẹ̌tahěndung u i kamene sarung makatarimạ bawal᷊ise wọu Mawu. Apan sen nisadiam Mawu e waụgu taumatan'E, ute kai ene sarung gělirang si kamene. Batụu mawu tutune ute kai tẹ̌tangkianeng i kamene, i Sie kai i Kristus sẹ̌sane.
25Kụ isai-sai wue nẹ̌koạ pẹ̌sasal᷊a e, sarungbe manarimạ patikụ pẹ̌sasal᷊ane; batụu Mawu e tawe měmamile ghati.
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel