1Deng bẹ̌dang mal᷊uka-l᷊ukadẹ̌ sěnaungkewen dal᷊ohon Sanhedrin sarangkewelain manga imang těmbonange manga těmbonang u tau Yahudi ringangu manga mananěntiro agama měngkatewe lighạ němpẹ̌dal᷊ahintau. I sire němpẹ̌hapusẹ̌ Mawu Yesus, mase němpẹ̌bawa si Sie kụ němpěnarakang i Sie si Pilatus.
2I Pilatus nakiwal᷊o su Mawu Yesus, "Kahěngang bue i Kau ratun tau Yahudi?" "Kerẹewe niweranu," angkuěngu Mawu Yesus.
3Manga imang těmbonange měngkate mapạsěpụ u laěnsil'i sire lawọ-lawọ su Mawu Yesus.
4Mase i Pilatus nakiwal᷊o kạpia su Mawu Yesus, "Kai ta sumasimbang i Kau? Kakěllạe tamai kal᷊awọe laěnsil'i sire itẹ̌timona si Kau!"
5Arawe Mawu Yesus e mambeng tawe saụ simimbang, hakịu i Pilatus naherang.
6Suapan Sal᷊imbangu Paskah, lulun Pilatusẹ̌ e kai mělẹ̌lěsọu sěngkatau wọu taumatang hukumang, tuhụewe kapulun taumata lawọ e.
7Su ral᷊ungu tahungkụe, sutal᷊oaran tahapěnggohaeng kụ němate su tempong gohaenge, piạ sěngkatau arenge i Barabas.
8Taumata lawọ e nẹ̌komol᷊ẹ̌ kụ němpẹ̌dorong si Pilatus tadeạu i sie apělẹ̌sọu sěngkatau wọu tal᷊oarang taumatang hukumang kerẹewe nạung tundune.
9I Pilatus nakiwal᷊o si sire, "I kamene mapulu iạ mělěsọu ratun tau Yahudi e waug'i kamene?"
10Batụu i Pilatus nakaěnna u manga imang těmbonange něnarakangu Mawu Yesus si sie kai ual᷊ingu pananoi.
11Kai manga imang těmbonange měngkai němpanahowong taumata l᷊awọ tadeạu měmpẹ̌dorong si Pilatus apělěsọ i Barabas baug'i sire.
12Tangu i Pilatus nẹ̌berạewe kapia su taumata lawọ e, "Kamageng kerene ute kawe takụ pẹ̌kapuraneng tau isẹ̌sěbạ i kamene ratun tau Yahudi e?"
13I sire němpamansagẹ̌, "Kuruise i Sie!"
14"Piạbe kakanoạ dal᷊akị apa tangu i Sie?" angkuěng i Pilatus. Tangu i sire němpẹ̌bansagẹ̌ kapia limembọewen kaihạe, "Kuruise i Sie!"
15I Pilatus mapulu mapakal᷊uasu naungu taumata l᷊awọ, tangu i sie nakilěsọen Barabas si sire, Bọu e i sie rimolohen taumata pinělimadẹ̌ Mawu Yesus, mase nisarakange pinakikuruisẹ̌.
16Mawu Yesus nịbawawa'm manga sordado sol᷊ong bal᷊eng mělahukung su istanang guběrnurẹ̌. Bọu e kạguwạu wuntuange nikuiang pinẹ̌tampung.
17Mase i sire němpěluheng lakụ kamumụ su Mawu Yesus, bọu e nikoateng makotane wọu manga hakonda piạ hanggange, kụ nipakẹ su těmbọu Mawu Yesus.
18Bọu e i sire němpẹ̌tabeạ si Sie, "Tabeạ Datun tau Yahudi!" angkuěng i sire.
19I sire němpěměbahu těking su těmbọu Mawu Yesus, mase i sire němpangědu si Sie dingangu němpẹ̌suba su těngon'E.
20Bọuten němpẹ̌taghunalangu Mawu Yesus, i sire němpěluạeng lakụ kamumụe mase niawengangu pakeange tutune. Su samurine i Sie niwawa sol᷊ong likude mědeạu i kuruisẹ̌.
21Su tal᷊oaran dal᷊eng i sire něnihasa sěngkatau niapěmasaěng kuruis'u Mawu Yesus. Tau ene nạung buhụ e lai sụsěbang bọu rarukutange kạsuẹ̌ e sol᷊ong soa. (Arenge i Simon, -- bọu Kirene -- i amang i Aleksander dẹ̌duan Rufus).
22Mawu Yesus niěntudẹ̌ su tampạ arenge Golgota mangal᷊ene "Wanuang Daran Těmbọ".
23Sene, i sire mapulu mangonggọu anggorẹ̌ laụ u mur si Sie, kai Mawu Yesus tawe nanginung anggorẹ̌ ene.
24Samurine i sire němpanguruisen Sie, kụ němpẹ̌papahiạ pakeang'E pinẹ̌dal᷊ahurị, baug'u pělahekang buạ u sěngkatau-sěngkatau.
25Pěnganguruisẹ̌ e nariadi pukul᷊ẹ̌ sio mal᷊ukadẹ̌.
26Su wowong kuruisẹ̌ e nipapělokangu wohẹ mạanun laěnsilẹ̌ si Sie, kere ini: "Datun Tau Yahudi e".
27Nẹ̌sion Mawu Yesus e i sire nanguruisẹ̌ lai tahapěhampasẹ̌ duang katau, sěngkatau su koaneng'E, dingangu sěngkataue su sěmbẹ̌ka kaihi.
28[Tangu ual᷊ingu ene nasěhụe apa mạbawohẹ su ral᷊ungu Winohẹ Susi e: "I Sie kai nirekeng kere nasowa su komol᷊angu taumata ral᷊aị."]
29Sumasahe sene měngkate apa mạhungkiling dingangu měmpělẹ̌hodatẹ̌ Mawu Yesus. I sire němpẹ̌bera, "Ei, Kau ěndaị mapulu měnggoghahẹ̌ Bal᷊em Mawu kụ irarisịu kạpia su ral᷊ungu těllu ěllo.
30Kěnnangko rěllusẹ̌ bọu kuruisẹ̌ e kụ pẹ̌těngkal᷊ěsọko'm batangengu e!"
31Kerene lai manga imang těmbonange ringangu manga mananěntirong agama e měmpěbẹ̌baheaun Mawu Yesus. I sire mạhumbisara sěmbaụ dingangu wal᷊ine, "I Sie měngambang taumata wal᷊ine, arawe watangeng'E tawe makaambang!
32Kereu i Sie ratung Israel, Datu Mananal᷊amatẹ̌, kapiaěnge i Sie pẹ̌těngkarělluse bọu kuruisẹ̌ e, tadeạu i kami makasilo kụ mangimang si Sie!" I rẹ̌dua nikuruisẹ̌ dingangu Mawu Yesus e mal᷊aing němpẹ̌baheaun Mawu Yesus.
33Su ěllo mal᷊ěttu e, su ral᷊ungu těllung kaorasẹ̌ sěnaung kạguwạu wanua e narěndungke.
34Kụ pukul᷊ẹ̌ tatěllu wawěllo e Mawu Yesus nẹ̌kiạ e maihạ, "Eloi, Eloi lama sabakhtani?" mangal᷊ene, "Duata-Ku, Ruata-Ku, kawe unụe i Kau naněntangu Iạ e?"
35Pirang katau sene nakaringihẹ̌ kakiạ'E kụ nẹ̌bera, "E wědị, i Sie kụkui si Elia!"
36Sěngkatau wọu i sire měngkate masahawụ-sahawụ tamai něngal᷊ạ bungan saghẹ nịlauno su ral᷊ungu anggorẹ̌ mahaesẹ̌. Bọu ene bungang saghẹ e nisusụe su pondol᷊u kalu sěmpědi kụ niogore pinakaratingu wiwihu Mawu Yesus, kạpěberane, "Ampal᷊eko, i kitẹ deng kumakělla měnsang i Elia e reng duměnta měnděllus'i Sie wọu kuruisẹ̌ ene."
37Mase Mawu Yesus gimaghahẹ e maihạ-ihạ naminsul᷊u singongone kụ naněntang.
38Gorden mạbawiting su ral᷊ungu Wal᷊em Mawu e natingkasẹ̌ darua wọu rasị sarang bawa.
39Těmbonangu sordado e rụdarisị su těngon kuruisẹ̌ e nakasilo kereapa kakakoạe Mawu Yesus napohong. Těmbonangu sordado e nẹ̌berạe, "Mambeng kahěngang tau ini e Ahus'u Ruata!"
40Ěndaị sene piạ lai manga wawine pirang katau měmpěmẹ̌manda patikụ ene wọu maraune. Su tal᷊oaran sire piạ i Salome, i Maria Magdalena, ringang i Maria i ninang i Yakobus umbaseng dingangi Yoses.
41Seng i sire e manga wawine nạung mạhuntol᷊e ringangu němpẹ̌tul᷊ung Mawu Yesus nạung piạ i Sie su Galilea. Dingangu l᷊awọ lai manga wawine wal᷊ine apang sene kụ sěngkakarěnta su Yerusalem dingangu Mawu Yesus e.
42Ene ělloe seng kakạhěbine piạ i Yusup bọu Arimatea nasongọe. I sie kai ral᷊ohon Sanhedrin kụ Lẹ̌adateng. I sie mal᷊aing mạngampal᷊ẹ̌ tempo Mawu kasěllahenge manětạ mẹ̌parenta kere sěngkatau Ratu. Ěllo ene kai ěllon Pẹ̌darariahi (kụ kai ěllo kal᷊amonan ěllon Sabatẹ̌). Ual᷊ingu ene i Yusup měngkatewe nẹ̌tumbahani nẹ̌těngon Pilatus kụ nẹ̌dorong bal᷊unangu Mawu Yesus.
43(15:42)
44Ene i Pilatus naherangke nakaringihẹ̌ u Mawu Yesus kai seng napohong. Kụ i sie nakireạen těmbonangu sordado kụ nakiwal᷊ọe si sie měnsang Mawu Yesus seng marěngụ napohong.
45Sarạeng nakaringihẹ̌ habaru těmbonangu sordado ene, i Pilatus buhụewe napakawalan Yusup měngal᷊ạ badang i Yesus.
46Mase i Yusup naměllịe hekạ al᷊usẹ̌ bọu leneng kụ bọuten nělintụ badangu Mawu Yesus, nipikungken sie ringangu hekạ ene. Bọu e i sie naměllọen bal᷊unangu Mawu Yesus su kubul᷊ẹ̌ nipakange su watu hanibẹ̌ kụ nitaho su ral᷊unge. Bọu ene i sie nělunggin batu ghẹ̌guwạ nipěhěping tukad'u kubul᷊ẹ̌ e.
47Su orasẹ̌ ene i Maria Magdalena rẹ̌duang Maria i ninangi Yoses nạung kụkakělla suapa piněnampakengu Mawu Yesus e.
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel