Alkitab Mobile SABDA
[VER] : [SANGIR]     [PL]  [PB] 
 <<  Roma 10 >> 

1Manga anạ u sěmbaụ! Kahumangku e mẹ̌deạu bansaku e masal᷊amatẹ̌. Kụ iạ e ringangu kạguwạu naung měkẹ̌kal᷊iomaneng su Ruata e waug'i sire.

2Iạ bahani mẹ̌bera u i sire měngkate makěhagẹ̌ mẹ̌tahamawu su Ruata. Arawe pẹ̌tatěngkaghising i sire e wal᷊inewe niwěnta su kasingkạ bọu Ruata.

3I sire wẹ̌gaweng kakakoạ u Mawu Ruata e měngul᷊ị kapia pẹ̌kakauhu taumata e ringang'E. Kụ ual᷊ingu i sire mapulu tumol᷊e kakakoạ i sire hala, ute i sire tawe sumasuměllung su kakakoạ u nilahẹ u Ruata.

4Toratẹ̌ seng nighanap'i Kristus. Kụ apan taumata mạngimang si Kristus pẹ̌kakauhe ringangu Ruata e seng naul᷊ị kapia.

5I Musa e němohẹ, u taumata apan mẹ̌sěngkapian Duata ual᷊ingu toratẹ̌, ute taumata ene sarung mẹ̌biahẹ̌ ual᷊ingu tụtuhụ toratẹ̌ ene.

6Arawe su hal᷊ẹ̌ u kakakoạu taumata mẹ̌sěngkapian Duata e ual᷊ingu pangangimang su Ruata e, Binohẹ Susi e nẹ̌bera kere ini: "Kumbahang i kau mẹ̌bera su ral᷊ungu naungu, 'Kụ kai i sai tangu masapuạ sarang sorga?' (mangal᷊ene mẹ̌bawa si Kristus parěllusẹ̌),

7arau 'I sai kai sarung duměllusẹ̌ su wanuan taumata nate?' (mangal᷊ene měhengkẹ si Kristus wọu papate)."

8Timonane kai kere ini, "Habarẹ̌ bọu Mawu Ruata ene kai marědu-rěduhi kau; su mohongu ringangu su ral᷊ungu naungu." Ene e habarẹ̌ kụ ilẹ̌habari kami; habar'u taumata kụ harusẹ̌ mangimang.

9Batụu kereu i kau mangakum mohongu, u "I Yesus kai Mawu", kụ i kau mangimang su ral᷊ungu naungu u Mawu Ruata e seng napẹ̌bangung i Yesus wọu papate, kụ i kau sarung masal᷊amatẹ̌.

10Ual᷊ingu naung e, taumata mangimang hakịu Mawu Ruata manarimạ i sie makoạ taumata mẹ̌sěngkapian Duata. Taumata ene mangakung mohonge, hakịu i sie ipakasal᷊amatẹ̌.

11Su ral᷊ungu Winohẹ Susi e mạbawohẹ, "Taumata mangimang tawe sarung kuměllohẹ̌."

12Ene e nariadi su patikụ taumata, batụu tawẹ pinẹ̌tatěntangenge sutal᷊oaran tau Yahudi ringangu wansa wal᷊ine. Duata mang sěmbaụ ene e kai Mawum patikụ taumata. I Sie mạngonggọu al᷊amate ipẹ̌dẹ̌dal᷊embo su kěbị taumata apan mědẹ̌dorong tul᷊ung si Sie.

13Su ral᷊ungu Winohẹ Susi e mạbawohẹ, "Patikụ apan měkẹ̌kui Mawu, sarung masal᷊amatẹ̌."

14Kaiso kereapa taumata makapẹ̌kui Mawu kereu i sire wẹ̌dang ta nangimang? Dingangu kereapạe i sire makapangimang su Mawu Ruata kereu i sire wẹ̌dang ta nakạdingihẹ̌ habarẹ̌ mạanun Sie? Dingangu kai makaringihẹ̌ habaru Mawu kereapa i sire kerẹu tawẹ u mělahabare?

15Kai makahabaru apa i sire kerẹu i sire tawe nirolohẹ̌? Su ral᷊ungu Winohẹ Susi e mạbawohẹ kere ini, "Kawe kapiane rarěntan taumata apam měmpẹ̌bẹ̌bawa habaru Injilẹ̌ bọu anun Duata!"

16Kaiso wal᷊inewe kěbị taumata měnẹ̌narimạ u Injilẹ̌ e. Batụu i Yesaya nẹ̌bera, "Mawu, i sai wue nangimang su habar'i kami?"

17Kai watụ u ene nakapangimang taumata ual᷊ingu i sire makạdingihẹ̌ habarẹ̌, dingangu habarẹ̌ e ikẹ̌karingihẹ̌, ual᷊ingu piạ taumata měmpẹ̌lẹ̌habar'i Kristus.

18Arawe iạ makiwal᷊o: Těngadẹ̌ bue i sire tawe nakạdingihẹ̌ habarẹ̌ ene ěng? Nal᷊ahẹu wọu wue! Batụu su ral᷊ungu Winohẹ Susi e mạbawohẹ kere ini, "Tingih'i sire seng timeleng su kaguwạu dunia, manga waweran sire seng natẹ̌pasu pondol᷊u dunia."

19Iạ makiwal᷊o kapia: Apa tau Israel ta nakaěnna ngae? Balako kakiwal᷊o ene kahumotongange pakisimbahe si Musa. I Musa nẹ̌bera, "Kere ini hengetang u Ruata, Iạ mapakariading kamene piạ sasasingking su wansa sěmbaụ kụ bal᷊ine kawanua ringangu Iạ sarung mapal᷊angeh'i kamene su wansa sěmbaụ kụ bodoe."

20I Yesaya e limembo laing kawahanine. I sie nẹ̌bera, "Kere ini e hengetang u Ruata, 'Taumata apan tawe němpẹ̌deạ si Siạ e seng nẹ̌sombangu Iạ. Dingangu Iạ e manodẹu watangeng-Ku si sire apan tawe makakiwal᷊ong Iạ.'"

21Arawe waugu Israelẹ̌ e i Yesaya nẹ̌bera u, "Kere ini hengetangu Mawu, 'Kanandung Iạ e mang mạnogor'u l᷊ima-Ku e su wansa sěmbaụ kụ ta mal᷊ahimang dingangu mararendehẹ̌.'"



 <<  Roma 10 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel Single Panel