Alkitab Mobile SABDA
[VER] : [SANGIR]     [PL]  [PB] 
 <<  Wahyu 16 >> 

1Mase iạ nakaringihe tingihẹ̌ maihạ bọu ral᷊ungu Wal᷊en Duata e měbẹ̌bera su Malạekatẹ̌ pitu e, "Dakọe ringangu wosọ e ral᷊ohon bokoru ral᷊angehu Mawu Ruata e, su dunia!"

2Malạekatẹ̌ humotong tangu rimal᷊engke kụ němosọen dal᷊oho'm bokor'e ene su dunia. Tangu nilẹ̌toěngkem bisul᷊ẹ̌ gaghuwạ dingangu maghaghiadẹ̌ su kěbị taumata apang kụ piạ tatialam binatang e, ringangu taumata apam měmpěnẹ̌němba tul᷊adane.

3Bọu ene malạekatẹ̌ karuane němosọen dal᷊ohong bokorẹ̌ su l᷊audẹ̌. Tangu sasị e mal᷊aing nẹ̌bal᷊ui nakoạ kere rahan taumata nate, kụ něngkapatẹ e patikụ diadikang apam měbẹ̌biahẹ̌ su l᷊audẹ̌.

4Bọu ene malạekatẹ̌ katěllune e němosọen dal᷊ohong bokorẹ̌ su manga sal᷊ụ dingangu manga simbul᷊u akẹ, hakịu kěbị manga akene e nakoạ daha.

5Iạ nakaringihẹ̌ malạekatẹ̌ měngangawasa akẹ e nẹ̌bera, "Hukumang kụ seng nịpaponesu e, mambeng su kạadilẹ̌, Mawu Kasusiange, Duata kụ ene, ringangu seng těbe ene!

6I sire seng napatědọu rahang umatu Mawu e ringangu raham manga nabi; kụ orasẹ̌ ini e i Kau e seng napěnginung i sire raha. Kụ mambeng hinone kerene e waug'i sire e!"

7Mase iạ nakaringihẹ̌ tingihẹ̌ bọu pananěmbaěnge nẹ̌bera, "Mawu, Ruata Makawasa, kahěngang dingangu maadilẹ̌ manga putusang ninawonu e!"

8Bọu ene malạekatẹ̌ kaěpạ e němosọen dal᷊oho'm bokor'e su matangěllo, tangu matangěllo e mal᷊aing niapakawala měhěngisẹ̌ taumata ringangu lěhabe tawẹ sihinge ene.

9Taumata e nahěngisu tětịe mal᷊uwahang e, dingangu i sire měmpẹ̌ngẹ̌ngane arengu Ruata, kụ kawasa su wowom patikụ haghing papahang ene. Manilaing seng kerene, i sire mang tawe mapulu mẹ̌tobatẹ̌ bọu manga rosan sire, ringangu tawe mapulu mẹ̌dalo kasěllahu Ruata.

10Mase malạekatẹ̌ kal᷊imane e němosọen dal᷊oho'm bokor'e sol᷊on tampạ kal᷊aianengu binatang ene. Tangu kasěllahu kararatuangu binatang ene, narěndungke, hakịu taumata e němpangikị e lilan sire e kahian katědụe.

11Bọu ene i sire němpangane Mawu Ruata su sorga kahian katědụe ringangu kahian manga wisul᷊'i sire. Kaiso i sire mal᷊aing tawe měmpẹ̌tobatẹ̌ bọu kal᷊awọu kakanoạ i sire raral᷊akisẹ̌ e.

12Bọu ene malạekatẹ̌ kaěnnunge němosọen dal᷊oho'm bokor'e su Sal᷊ụ u Efrat gẹ̌guwạ ene. Tangu sal᷊ụ ene nal᷊ěsạ e hakịu manga ratu wọu sěmběkang dakị e, nakaral᷊eng bọu e.

13Mase iạ nakasilo rohkẹ̌ dal᷊akisẹ̌ tatěllu kere luhudu tumpaheạ. Sěmbaụ-sěmbaụ tumpaheạ e sụsěbang bọu mohongu nagạ, bọu mohongu binatang, dingangu wọu mohongu mahang nabi.

14I sire ene ute kai manga rohkẹ̌ dal᷊akị kụ měmpẹ̌kẹ̌koạ karal᷊inaụ. Rohkẹ̌ tatěllu ene něngkakoạ sol᷊ong anung kal᷊awọu ratu su kạguwạu dunia ringangu němpěngomol᷊'i sire e mědeạu mẹ̌sekẹ su Ěllo masěllahẹ̌, mangal᷊ene Ěllon Duata Liungkawasa e.

15"Pẹ̌daringihẹ̌ko! Iạ e kai ruměnta kere tahatako! Kariangkamang i sain mělẹ̌lukadẹ̌ dingangu měsẹ̌sěmpị pakeange, hakịu i sie tawe rumal᷊eng těntol᷊e ringangu ipakamea su těngon lawọ."

16Bọu e manga rohkẹ̌ ene napẹ̌tampungu mararatu e su tampạ kụ su werang Ibrani e isẹ̌sẹ̌bạ Harmagedon.

17Bọu ene malạekatẹ̌ kapitune e němosọeng bokore sol᷊ong kinoaěng. Tangu kinaringihe tingihẹ̌ maihạ bọu kaderang kawantugẹ̌ e su Wal᷊en Duata, kụ nẹ̌bera, "Seng naghanapẹ̌!"

18Mase piạ e kilạ mědẹ̌dahenesang dingangu tingihu rěllụ měgẹ̌gaghal᷊ědụ dingangu ghụgal᷊ěgehẹ̌, apidu nělinuhẹ̌ kụ makạtatakụ. Bědawen ta nělẹ̌linuhẹ̌ kerene kaihạ e dokeng su pěndariadi taumata e. Seng ini e linuhẹ̌ kụ lembom makạtatakụ!

19Soa ghẹ̌guwạ ene nạběka napahiạ tatěllu, ringangu naghoghahẹ̌ kěbị soa su kaguwạu dunia. Tangu Mawu Ruata e nakatahěndungke soan Babel gẹ̌guwạe. Tangu Mawu Ruata e napěnginung i sie anggorẹ̌ bọu bokoru anggor'u Mawu -- kụ kai anggoru ral᷊angeh'E kụ měkẹ̌kakalulu e.

20Patikụ tahanusa e měngkaparung dingangu patikụ bul᷊ude mal᷊aing masue miwu.

21Tahiting eisẹ̌ gaghaghuwạ, kụ běhạ e pẹ̌taha limam pul᷊o su kilone, mạhondosẹ̌ bọu l᷊angị milịhino su kěbị taumata. Tangu i sire měmpẹ̌ngẹ̌ngane Mawu Ruata e, ual᷊ingu papahang u tahiti eisẹ̌ kụ makạtatakụ ene.



 <<  Wahyu 16 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel Single Panel