1Sesampun nike tiang teicanin sepeleng kayuq saq mirip tunjang pengukur, terus teprẽntahang, "Silaq lumbar ukur Gedẽng Suci Allah dait mẽje taoq kurban, dait rẽkẽng pire luwẽq dengan saq beribadah lẽq dalemne.
2Laguq ndaq ukur lelẽah saq lẽq luah Gedẽng Suci Allah nike, sẽngaq bagian nike sampun teserahang tipaq bangse-bangse lain. Ie pade gen ngicaq-icaq kote saq suci nike petang dase due bulan ngonẽqne.
3Tiang gen ngutus due saksi Tiang saq kadu kelambi tande dukecite, dait ie pade gen nyampẽang nubuat lẽman Allah sengonẽq siyu satak enem dase jelo."
4Due saksi nike due lolo zaitun dait due naẽn dilah saq araq lẽq arepan Tuhan penguase alam semeste.
5Lamun araq dengan saq mẽlẽ nyakitin ie pade, make lẽman biwih ie pade sugul api saq binaseang musuh-musuhne. Siq care nike, selapuq dengan saq mẽlẽ nyakitin ie pade gen matẽ.
6Ie pade bedowẽ kuase jari ngimpet langit adẽq ndaq turun ujan sengonẽq ie pade nyampẽang nubuat lẽman Allah. Ie pade bedowẽ kuase ẽndah lẽq selapuq pengembulan aiq, ngerobah aiq jari daraq. Dait ie pade ẽndah bedowẽ kuase jari ngempuk gumi siq segale macem bencane, piran doang ie pade mẽlẽ ngelaksaneang hal nike.
7Sesampun ie pade tutuq nyampẽang kesaksian ie pade, binatang saq sugul lẽman jurang maut gen ngelawan ie pade dait ngalahang serte nyematẽq ie pade.
8Dait mayit ie pade gen begelanyat lẽq rurung kote belẽq, lẽq taoq Tuhan ie pade tepakuq lẽq kayuq salib. Aran kiasan kote nike Sodom dait Mesir.
9Dengan-dengan lẽman selapuq bangse, suku, base, dait kaum gen serioq mayit ie pade telu setenge jelo ngonẽqne, dait ndẽq ngijinang mayit-mayit nike tekubur.
10Penduduk gumi gen gembire dait besukecite lantaran kematẽan kedue saksi nike. Ie pade gen ngerayeang hal nike dait saling ngirim hadiah, sẽngaq kedue nabi nike sampun datengang luwẽq siksean tipaq selapuq dengan lẽq gumi.
11Sesampun telu setenge jelo, tame roh kehidupan lẽman Allah ojok dalem kedue nabi nike. Beterus ie pade ures dait nganjeng, sehingge selapuq dengan saq serioq ie pade jari takut gati.
12Beterus dengan-dengan nike dengah suare saq keras lẽman sorge ngempoh kedue nabi nike, "Silaq taẽk ojok deriki!" Beterus lẽq julu musuh-musuh ie pade, ie pade taẽk ojok sorge, tekerubung siq awan.
13Make lẽq waktu nike araq lindur saq belẽq. Sepersepulu bagian lẽman kote nike remuk, dait pituq iyu dengan matẽ lantaran lindur nike. Dengan-dengan saq lainne jari takut gati, terus ie pade mulieang Allah lẽq sorge.
14Celake saq kedue sampun liwat. Laguq pade serioq! Celake saq ketelu gen becat dateng.
15Beterus malaẽkat kepituq niup terompẽtne, make lẽq sorge kedengahan suare-suare saq belẽq gati saq bebase, "Kerajaan dunie sampun jari kerajaan Tuhante dait kerajaan Almasih. Ie gen mrẽntah jangke selaẽq-laẽqne."
16Make keempat likur pemimpin saq melinggih lẽq tahte ie pade lẽq arepan Allah, nyungkur dait nyembah Allah.
17Ie pade matur, "Ya Allah, Tuhan saq Mahekuase, saq araq, dait saq sampun araq! Tiang pade besyukur lẽq Deside sẽngaq Deside sampun kadu kuase Deside saq belẽq, dait sampun mulai mrẽntah jari raje!
18Bangse-bangse ngamuk sẽngaq sampun waktune Deside numpahang murke Deside, dait sampun waktune ẽndah Deside ngadilin dengan-dengan ninggal. Niki waktune jari ngicanin upaq tipaq hambe-hambe Deside, pare nabi, dait tipaq selapuq dengan-dengan saq tehususang bagi Deside, nike selapuq dengan saq takut dait hormat lẽq pesẽngan Deside, belẽq dait kodẽq. Niki waktune jari ngancurang dengan-dengan saq ngancurang gumi!"
19Make Gedẽng Suci Allah lẽq sorge kebukaq, dait penggitan Peti Perjanjian lẽq dalemne. Terus araq kisap saling samber dait suare guntur begeruduk, dait lindur dait ujan ẽs saq belẽq.
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel