1Beterus tiang serioq Anak Dombe nike penggitan nganjeng lẽq atas Bukit Sion. Bareng kance Ie araq satus petang dase empat iyu dengan saq lẽq telakar ie pade tetulis pesẽngan-Ne dait pesẽngan Bapa-Ne.
2Terus tiang dengah suare lẽman langit maraq suare belabur saq belẽq dait maraq suare guntur saq belẽq. Suare nike kedengahan maraq suare pemaẽn-pemaẽn kecapi saq kenyeke puniq kecapine.
3Lẽq arepan tahte dait keempat mahluk dait pare pemimpin lẽq sekelining tahte nike, satus petang dase empat iyu dengan nike nyanyiang sopoq nyanyian saq baru. Nyanyian nike ndẽq bau teperajahin siq sai-sai kecuali satus petang dase empat iyu dengan saq sampun tetebus lẽman gumi.
4Ie pade dengan-dengan saq tetep murni maraq dedare genten, sẽngaq ndẽq uwah berubungan kance dengan nine. Ie pade iring Anak Dombe nike ojok mbẽ Ie lumbar. Lẽman antare selapuq manusie, ie pade saq sampun tetebus jari persembahan saq penembẽq tipaq Allah dait tipaq Anak Dombe nike.
5Ie pade ndẽq uwah beduste; dait ndẽq araq cacat cele sekediq juaq lẽq ie pade.
6Terus tiang serioq sopoq malaẽkat lain saq kesur atas gati lẽq langit. Malaẽkat nike jauq Kabar Solah saq kekel jari tesampẽang tipaq manusie lẽq gumi, nike tipaq selapuq bangse, suku, base, dait kaum.
7Malaẽkat nike bekuih siq suare saq belẽq, "Pade takut tipaq Allah, dait pade puji keagungan-Ne! Sẽngaq sampun waktune Allah hakimin manusie. Pade sembah Ie, saq cipteang langit, gumi, segare, dait selapuq pengembulan aiq!"
8Malaẽkat kedue nerutuk malaẽkat saq penembẽq sambil bekuih, "Sampun runtuh! Kote Babel saq belẽq sampun runtuh! Ie sampun miaq selapuq bangse jari bowos siq aiq anggur -- nike anggur lẽman napsu perbuatanne saq cabul!"
9Sopoq malaẽkat ketelu nerutuk due malaẽkat nike, sambil bekuih siq suare saq belẽq, "Dengan saq nyembah binatang nike dait tetatone, dait bedowẽ tande binatang nike lẽq telakar atao lẽq imene,
10dengan nike gen nginem anggur Allah, nike anggur murke-Ne saq sampun Ie isiq ojok cawan murke-Ne, dait ndẽq tekurangin! Selapuq dengan nike gen tesiksaq lẽq dalem api dait urirang lẽq arepan malaẽkat-malaẽkat suci dait lẽq arepan Anak Dombe nike.
11Pendet lẽman api saq nyiksaq dengan-dengan nike gen nyempuq terus selaẽq-laẽqne. Ie pade tesiksaq peteng menah ndẽq araq engkah-engkahne. Ie pade saq nyembah binatang nike dait tetatone, selapuq dengan saq bedowẽ tande aran binatang nike."
12Dalem hal niki dengan-dengan saq tehususang bagi Allah saq taat lẽq prẽntah-prẽntah Allah dait saq beriman lẽq Deside Isa, perlu jari tabah.
13Terus tiang dengah suare lẽman sorge, "Tulis niki: Mulai mangkin, bahagie dengan-dengan ninggal saq ninggal lẽq dalem Tuhan!" "Kenaq!" Jawab Roh Allah. "Ie pade gen mentelah begawẽan berat, lantaran selapuq hasil pegawẽan ie pade tetep gen bareng kance ie pade."
14Beterus tiang serioq, make penggitan sopoq awan saq putẽq. Lẽq atas awan nike melinggih sopoq dengan saq ruene maraq Bije Manusie. Lẽq sirah-Ne araq sopoq mahkote emas, dait lẽq gading-Ne araq sopoq awis saq merang.
15Beterus sopoq malaẽkat saq lain sugul lẽman Gedẽng Suci Allah, siq suare saq belẽq, ie matur tipaq Ie saq melinggih lẽq atas awan nike, "Ompẽhang awis Deside nike dait pataq mangkin, sẽngaq sampun waktune mataq; gumi sampun masak bau tepataq!"
16Terus Ie saq melinggih lẽq atas awan nike ngampẽhang awis-Ne ojok gumi, make gumi tepataq.
17Beterus tiang serioq sopoq malaẽkat saq lain malik sugul lẽman Gedẽng Suci Allah saq lẽq sorge. Ie ẽndah negel sopoq awis saq merang.
18Sesampun nike, sopoq malaẽkat lain, saq nguasein api, dateng lẽman mẽje taoq kurban. Siq suare saq belẽq ie matur tipaq malaẽkat saq negel awis saq merang nike, "Ompẽhang awisde nike dait keret buaq-buaq lolo anggur lẽq gumi, sẽngaq buaq-buaqne sampun masak!"
19Make malaẽkat nike ompẽh awisne ojok gumi dait awisne buaq-buaq anggur lẽman lolone, terus timpohne ojok dalem alat saq tekadu meres anggur, nike murke Allah.
20Buaq-buaq anggur nike teperes lẽq luah kote, dait lẽman alat pemeres anggur nike ngẽlẽk daraq maraq kokoq, jaoqne telu ratus kilomẽter, dait dalemne jangke gen due mẽter.
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel