1Sesampun nike tiang dengah suare saq nyaring maraq suare dengan luwẽq bekuih-kuih lẽman sorge, "Pade mulieang Allah! Allahte nike Allah saq nyelametang; Ie Allah saq agung dait bekuase!
2Penghakimanne adil dait bijaksane! Ie sampun mutusang hukuman tipaq pelacur saq belẽq nike, saq nyẽdaq dunie siq perbuatanne saq cabul. Allah sampun hukum pelacur nike, sẽngaq ie nyematẽq hambe-hambe Allah."
3Terus dengan luwẽq nike bekuih malik, "Pade mulieang Allah! Pendet lẽman api nike nyempuq selaẽq-laẽqne!"
4Make keempat likur pemimpin dait keempat mahluk saq lẽq sekelining tahte nike nyungkur dait nyembah Allah saq melinggih lẽq atas tahte. Ie pade matur, "Amin! Pade mulieang Allah!"
5Terus kedengahan suare lẽman tahte nike, "Pade mulieang Allah, hai selapuq hambe Allah, dait selapuq dengan -- belẽq dait kodẽq -- saq takut lẽq Allah!"
6Sesampun nike tiang dengah maraq suare sekumpulan dengan saq luwẽq gati; suarene maraq umbak saq belẽq dait maraq guntur. Tiang dengah suare ie pade, "Pade mulieang Allah! Sẽngaq Tuhante, Allah Saq Mahekuase nike, mangkin sampun mrẽntah jari raje!
7Silaq ite besukecite dait gembire; silaq ite puji keagungan-Ne! Sẽngaq sampun dateng jelo pernikahan Anak Dombe nike, dait pengantẽn-Ne sampun siep.
8Ie sampun teicanin kelambi lẽnen saq putẽq ngempor jari tekadu." (Kelambi lẽnen nike perbuatan-perbuatan saq kenaq saq telaksaneang siq dengan-dengan saq tehususang bagi Allah.)
9Terus malaẽkat nike bebase lẽq tiang, "Tulis niki: 'Bahagie dengan saq tepesilaq ojok gawẽ ngawinang Anak Dombe nike.'" Beterus malaẽkat nike bebase malik lẽq tiang, "Niki manik saq kenaq lẽman Allah."
10Tiang nyungkur lẽq julun malaẽkat nike gen nyembah ie, laguq ie bebase lẽq tiang, "Ndaq! Ndaq nyembah tiang, pade sembah Allah! Sẽngaq tiang ẽndah hambe pade maraq side dait maraq selapuq semetonde saq setie lẽq kesaksian Deside Isa!" Sẽngaq kesaksian Deside Isa nike roh nubuat.
11Beterus tiang serioq sorge kebukaq, terus penggitan sopoq jaran putẽq. Aran penunggang-Ne Saq Setie dait Saq Kenaq. Ie adil dalem mutusang hukuman dait dalem peperangan saq Ie laksaneang.
12Penyermin-Ne maraq nyale api dait lẽq sirah-Ne Ie ngengadu luwẽq mahkote. Lẽq Ie tetulis sopoq aran; dait cume Ie mẽsaq saq wikan aran nike.
13Jubah saq Ie kadu sampun tecelep lẽq dalem daraq. Dait Ie tesebut "Manik Allah".
14Dait selapuq pasukan saq lẽq sorge ngiring Ie; ie pade nunggang jaran-jaran putẽq, dait bekelambi lẽnen saq putẽq bersi.
15Lẽman cangkem-Ne sugul sopoq klẽwang saq merang dait siq klẽwang nike Ie gen ngalahang bangse-bangse, dait Ie gen mrẽntah ie pade siq tunjang besi. Ie gen meres anggur lẽq dalem alat pemeres anggur murke Allah Saq Mahekuase.
16Lẽq jubah-Ne dait lẽq impung-Ne tetulis aran niki, "Raje selapuq raje, dait Tuan selapuq tuan."
17Terus tiang serioq sopoq malaẽkat nganjeng lẽq atas jelo. Siq suare saq belẽq ie bekuih tipaq selapuq kedit saq kesur lẽq langit, "Silaq bekumpul ojok gawẽ belẽq saq terayeang siq Allah!
18Silaq kelorang daging raje-raje, daging panglime-panglime, dait daging pahlawan-pahlawan; silaq kelorang daging pare penunggang jaran dait daging jaran-jaranne, dait daging selapuq umat manusie, belẽq dait kodẽq, hambe dait dengan merdẽke!"
19Beterus tiang serioq binatang nike, dait raje-raje gumi kance pasukan perang ie pade, bekumpul jari betempur ngelawan Ie saq nunggang jaran putẽq nike dait pasukan perang-Ne.
20Make binatang nike tebau bareng-bareng kance nabi palsu saq sampun miaq keajaipan-keajaipan lẽq julun binatang nike. (Siq keajaipan-keajaipan nike binatang nike nipu dengan-dengan saq bedowẽ tande binatang nike dait dengan-dengan saq nyembah tetato binatang nike.) Terus binatang nike dait nabi palsu nike tetetẽh idup-idup ojok dalem segare api saq nyale siq urirang.
21Dait selapuq pasukan perang ie pade tematẽq siq klẽwang saq sugul lẽman cangkem penunggang jaran putẽq nike; dait kedit-kedit ẽndah dateng ngaken daging ie pade jangke besuh.
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel