1Beterus tiang serioq sopoq gulungan kitab lẽq gading-Ne saq melinggih lẽq tahte nike. Kitab nike penoq siq tulisan lẽq bagian dalem dait bagian luahne, dait tesẽgel kadu pituq sẽgel.
2Terus tiang serioq sopoq malaẽkat saq perkase bekuih-kuih siq suare saq belẽq, "Sai saq patut bukaq sẽgel-sẽgel niki dait bukaq kitab niki?"
3Laguq timaq lẽq sorge, atao lẽq gumi, atao lẽq bawaq gumi ndẽq araq sopoq dengan juaq saq sanggup bukaq kitab nike, dait serioq isine.
4Make tiang nangis ẽroq asẽq sẽngaq ndẽq araq sopoq dengan juaq saq patut bukaq kitab nike, dait serioq isine.
5Terus salaq sopoq lẽq antare pemimpin-pemimpin nike bebase lẽq tiang, "Ndaq nangis! Silaq pade serioq! Singe lẽman suku bangse Yehuda, keturunan Daud, sampun menang. Ie sanggup bukaq pituq sẽgel dait bukaq gulungan kitab nike."
6Beterus tiang serioq, sopoq Anak Dombe nganjeng lẽq tengaq-tengaq tahte nike, tekeliningin siq keempat mahluk dait selapuq pemimpin nike. Anak Dombe nike ruene maraq sampun tesembelẽh. Ie bedowẽ pituq tanggẽq dait pituq mate: Nike pituq Roh Allah saq sampun teutus ojok seantẽro dunie.
7Beterus Anak Dombe nike maju dait bait gulungan kitab nike lẽman gading kanan Dengan saq melinggih lẽq atas tahte.
8Lẽq waktu Anak Dombe nike ngelaksaneang hal nike, keempat mahluk dait keempat likur pemimpin nike nyungkur lẽq arepan-Ne. Ie pade sopoq-sopoq negel kecapi dait cawan emas saq berisi menyan, nike do'e-do'e dengan-dengan saq tehususang bagi Allah.
9Ie pade nyanyiang sopoq lagu saq baru: "Deside patut bait kitab nike, dait bukaq sẽgel-sẽgelne. Sẽngaq Deside sampun tesembelẽh, dait siq ninggal Deside, manusie lẽman selapuq suku, base, umat dait bangse sampun Deside tumbas bagi Allah.
10Deside sampun jariang ie pade sopoq kerajaan, dait jari imam-imam, adẽq ie pade ngelayanin Allahte, dait mrẽntah lẽq gumi."
11Beterus tiang serioq malik dait Tiang dengah suare malaẽkat saq beiyu-iyu dait bejute-jute luwẽqne. Ie pade nganjeng ngiterin tahte dait keempat mahluk serte pare pemimpin nike.
12Dait ie pade benyanyi siq suare saq belẽq, "Anak Dombe saq sampun tesembelẽh nike, patut nerimaq kuase, kesugihan, kebijaksanean dait kekuatan; Ie patut tehormatin, temulieang dait tepuji-puji!"
13Beterus tiang dengah selapuq mahluk lẽq sorge, lẽq gumi, lẽq bawaq gumi dait lẽq dalem segare -- selapuq mahluk lẽq alam semeste niki -- benyanyi, "Bagi Ie saq melinggih lẽq atas tahte, dait bagi Anak Dombe nike, selapuq pujian dait hormat dait kemuliean dait kuase jari selaẽq-laẽqne!"
14Make keempat mahluk nike bebase, "Amin!" Dait pemimpin-pemimpin nike ẽndah nyungkur dait nyembah.
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel