1Semeton-semeton tiang! Sebagẽ dengan saq beriman lẽq Deside Isa Almasih, Junjungante Saq Mulie, ndaq side pade girang bẽde-bẽdeang dengan tedasarang hal-hal lahiriah.
2Sẽngaq lamun araq sopoq dengan sugih ngengadu ali-ali emas dait kelambi solah dateng ojok perkumpulande, beterus dateng ẽndah sopoq dengan miskin saq ngengadu kelambi roẽk,
3make side pade lebih hormat lẽq dengan saq bekelambi solah nike. Side pade bebase lẽq ie, "Silaq pelungguh melinggih lẽq kursi saq paling solah niki," laguq lẽq dengan saq miskin, side pade bebase, "Nganjeng lẽq to!" atao "Tokol lẽq bawaq dẽkẽt naẽn tiang."
4Siq perbuatan maraq nike, side pade miaq perbẽdean lẽq dalem angen side pade dait jari hakim siq pikiran-pikiran saq jahat.
5Inget, semeton-semeton saq tiang kasihin! Dengan saq miskin lẽq dunie niki tepilẽq siq Allah adẽqne jari dengan saq sugih lẽq dalem iman dait jari ahli waris Kerajaan saq sampun tejanjiqang siq Allah tipaq dengan-dengan saq ngasihin Ie.
6Laguq malahan side menghine dengan miskin, padahal dengan-dengan sugih nike saq nindes side pade dait jauq side pade ojok pengadilan!
7Ie pade saq menghine pesẽngan saq paling tehormatin saq side pade terimaq lẽman Allah.
8Side pade ngelaksaneang saq kenaq, lamun side pade ngelaksaneang hukum utame saq tetulis lẽq Kitab Suci niki, "Kasihin sepadende manusie, pade maraq side ngasihin diriqde mẽsaq."
9Laguq lamun side pade bẽde-bẽdeang dengan tedasarang hal-hal lahiriah, make side piaq dose, dait hukum Allah nyatayang bahwe side pade ngelanggar hukum.
10Sẽngaq sai juaq saq turut hukum nike, laguq ngerẽmẽhang sopoq bagian lẽman hukum nike, ie salaq tipaq selapuqne.
11Sẽngaq Ie saq bemanik, "Ndaq bezinah," Ie ẽndah saq bemanik, "Ndaq nyematẽq." Jari lamun side pade ndẽq bezinah, laguq nyematẽq make side pade ẽndah ngelanggar hukum.
12Jari side pade harus bebase dait bekelakuan maraq dengan saq gen teadilin menurut hukum Allah saq merdẽkeang manusie.
13Sẽngaq bagi dengan saq ndẽq nyatayang belas kasihan, hukumanne ndẽq gen kadu belas kasihan ẽndah, laguq dengan saq bedowẽ belas kasihan ndẽq gen takut ngadepin penghakiman!
14Semeton senamian! Napi manpaatne dengan bebase, "Tiang dengan saq bedowẽ iman," lamun ie ndẽq buktiang siq perbuatanne? Napi bau iman saq maraq nike nyelametang ie?
15Seumpame sopoq semeton mame atao nine merluang kelambi dait ndẽq bedowẽ keloran saq cukup sebilang jelo.
16Napi manpaatne side pade bebase lẽq ie, "Silaq lumbar, kadu kelambi saq anget dait bekelor jangke besuh!", laguq side pade ndẽq bẽng ie napi saq jari keperluan awakne?
17Maraq nike ẽndah iman, lamun ndẽqne tenyatayang siq perbuatan, make iman nike setetune matẽ.
18Sang araq dengan saq bebase, "Lẽq side araq iman dait lẽq tiang araq perbuatan." Tiang gen bejawab, "Petitoqang lẽq tiang imande laguq ndaq siq perbuatan, dait tiang gen petitoqang iman tiang siq perbuatan tiang."
19Side pade percaye bahwe Allah cume sopoq? Nike solah! Laguq sẽtan-sẽtan ẽndah percaye lẽq hal nike dait ie pade ngijik siq takutne!
20Hai side pade saq bebel! Napi perlu tebuktiang lẽq side bahwe ndẽq araq manpaatne bedowẽ iman lamun ndẽq tebarengin siq perbuatan?
21Serioq Ibrahim leluhurte! Ie tejariang kenaq lẽq arepan Allah lantaran perbuatanne, sewaktu ie ngaturang bijene, Ishak tipaq Allah, lẽq atas mẽje taoq kurban.
22Dalem hal niki sampun jelas bahwe iman harus tenyatayang siq perbuatan dait siq perbuatan nike iman jari sempurne.
23Hal nike sesuai ayat Kitab Suci, "Ibrahim percaye lẽq Allah, dait lantaran imanne nike make ie tejariang kenaq lẽq arepan Allah." Keranaq nike Ibrahim tesebut, "Sahabat Allah."
24Mangkin sampun jelas, bahwe dengan tejariang kenaq lẽq arepan Allah, lantaran napi saq telaksaneang siq dengan nike, dait ndẽqne cume lantaran imanne doang.
25Serioq ẽndah Rahab, dengan nine pelacur nike. Ie tejariang kenaq lẽq arepan Allah lantaran perbuatanne, sewaktu ie nerimaq mate-mate Israel lẽq dalem balẽne dait nulung ie pade pelai nyelametang diriq liwat langan saq lain.
26Jari, maraq awak saq ndẽq bedowẽ roh, nike awak saq matẽ, maraq nike ẽndah iman, lamun ndẽq tebarengin siq perbuatan, iman nike matẽ.
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel