Si Ahab pakon si Josafat Marsada Riah Mangimbang Halak Aram
1Dob ai marsonang-sonang ma sidea tolu tahun dokahni, seng dong porang i tongah-tongah ni Aram pakon Israel.
2Tapi patolutahunkon tuad ma si Josafat, raja ni Juda, marayak raja ni Israel.
3Nini raja ni Israel ma hu bani juakjuakni, “Ai lang ibotoh nasiam, hita do simada Ramot-Gilead? Hape sai soh do hita, mase ma lang irampas hita in hun tangan ni raja ni Aram?”
4Dob ai nini raja ai ma hu bani, “Atene, ra do ham harahonku marmunsuh dompak Ramot-Gilead?” Nini si Josafat ma hu bani raja ni Israel, “Ia sonin ham, sonai do ahu, sonin bangsamu, sonai do bangsangku, anjaha sonai hudamu, sonai do homa hudangku.”
5Ambah ni ai nini si Josafat ma hu bani raja ni Israel, “Mahua sungkun ham ma lobei Jahowa!”
6Jadi ipatumpu raja Israel ma nabi-nabi, hira-hira ompat ratus halak bueini, anjaha nini ma hu bani sidea, “Atene, bulih do ahu tangkog hu Ramot-Gilead marporang, barang lang?” Nini sidea ma, “Bulih do, sai na ondoskonon ni Tuhan in do sidea hubagas tangan ni raja in.”
7Tapi nini si Josafat ma, “Ai seng adong be ijon age sahalak nabi ni Jahowa, ase marsungkun hita hu bani?”
8Nini raja ni Israel ma hu bani si Josafat, “Adong do namin ijon sahalak, tarsungkun hita do namin Jahowa marhiteihonsi, ai ma si Mika, anak ni si Jimla; tapi sogam do uhurhu bani, ai seng ongga na madear panjahaionni pasal ahu, sai hamagouan do.” Tapi nini si Josafat ma, “Ulang ma sonai hata ni raja in.”
9Idilo raja ni Israel ma sahalak hun bani juakjuakni, nini ma bani, “Alop podas si Mika, anak ni si Jimla.”
10Tapi hundul bani paratasni do raja ni Israel pakon si Josafat, raja ni Juda, mamahei baju harajaon i horbangan ni Samaria; anjaha ganup nabi ai manjahai i lobei ni sidea.
11Ia si Sedekia, anak ni si Kenana, domma ibahen hinan bani tanduk bosi, anjaha nini ma, “Sonon do hata ni Jahowa, ʻMarhitei on duguonmu ma halak Aram, ronsi siap sidea bahenonmu.
12Haganup nabi-nabi ai sonai do panjahaion ni sidea, nini sidea do, “Tangkog ma ham hu Ramot-Gilead, sai monang do ham, anjaha ondoskonon ni Jahowa do sidea hubagas tangan ni raja in.”
13Ia suruhan, na mangalopi si Mika ai, ihatahon do hu bani sonon, “Tonggor ma, sahata do nabi-nabi ai mangkatahon na madear hu bani raja in; halani ai hatamu pe, sai songon hata ni sidea ai ma, sai hatahon ham ma na madear.”
14Tapi nini si Mika, “Songon sintongni manggoluh Jahowa, barang aha na pinatugah ni Jahowa hu bangku, ai do hatahononku.”
Panjahaion ni si Mika
15Jadi dob das ia hulobei ni raja ai, nini raja ai ma hu bani, “Atene Mika, bulih do hanami laho hu Ramot-Gilead marporang barang lang?” Nini ma mambalosi, “Bulih do ham tangkog, anjaha monang do ham, ai ondoskonon ni Jahowa do sidea hubagas tangan ni raja in.”
16Dob ai nini raja ai ma hu bani, “Singgan piga hali do pabijaonku ham, paboa na so hatahononmu bangku, sobali hasintongan marhitei goran ni Jahowa?”
17Dob ai nini si Mika ma, “Domma hutatap ganup Israel merap i atas dolog, songon biri-biri, na so adong parmahanni.” Jadi nini Jahowa ma, “Seng dong tuan ni sidea; ganup ma mulak hu rumahni ibagas damei.”
18Nini raja ni Israel ma hu bani si Josafat, “Ai lang domma huhatahon bamu, seng anjai tumaram dear panjahaionni pasal ahu, sobali hamagouan?”
19Jadi nini si Mika ma, “Halani ai tangihon ham ma hata ni Jahowa, ʻHuidah do Jahowa hundul i atas ni paratas-Ni, anjaha ganup bala ni nagori atas jongjong i lambung-Ni, hampit siamun pakon hampit sambilou-Ni.ʼ”
20Jadi nini Jahowa ma, “Ise do na ra pakahouhon si Ahab, ase tangkog ia gabe dabuh ia dohorhon Ramot-Gilead?” Dob ai marsiluarhon hatani bei ma sidea.
21Dob ai luar ma sada tonduy, lanjar jongjong i lobei ni Jahowa, anjaha nini ma, “Ahu ma pakahouhonsi.” Nini Jahowa ma hu bani, “Marhitei aha?”
22Nini ma mambalosi, “Luar ma ahu gabe tonduy sipaoto-oto ibagas pamangan ni ganup nabini.” Nini Jahowa ma hu bani, “Pakahou ma ia, anjaha maningon monang do ho; laho ma ho, anjaha bahen ma sonai.
23On pe, tonggor ma, domma ibere Jahowa tonduy sipaoto-oto hubagas pamangan ni ganup nabi on; domma ilumbahon Jahowa roh hamagouan bamu.”
24Dob ai roh ma hundohor si Sedekia, anak ni si Kenana, itompas ma huyum ni si Mika, lanjar ihatahon, “Sonaha, domma minsah Tonduy ni Jahowa hun bangku, laho marsahap marhitei ho?”
25Nini si Mika ma mambalosi, “Idahonmu do ai bani ari parporusmu hun bani kamar na sada hu bani kamar na sada nari sihol marponop namin.”
26Dob ai nini raja ni Israel ma, “Tangkap ma si Mika, anjaha boan ma ia mulak hu bani si Amon, kopala ni huta ai pakon hu bani si Joas, anak ni raja ai;
27anjaha hatahon ma, ʻSonon do hata ni raja in: Nahkon nasiam ma halak on hu tutupan, anjaha bere nasiam ma ia mangan ruti pakon minum otik-otik, paima mulak ahu mardamei-damei.ʼ”
28Dob ai nini si Mika ma, “Anggo mulak ham marsonang-sonang, na so tongon ma Jahowa marsahap marhitei ahu.” Anjaha nini ope, “Tangar ma, nasiam ganup bangsa!”
29Dob ai tangkog ma raja ni Israel pakon si Josafat, raja ni Juda hu Ramot-Gilead.
30Jadi nini raja ni Israel ma hu bani si Josafat, “Hupalegan ma rupangku laho hu parporangan, tapi anggo ham lanjar pakei ham ma pakeianmu.” Jadi palegan rupa ma raja ni Israel laho hu parporangan.
31Tapi domma iparentahkon raja ni Aram hinan hu bani kopala ni gareta porangni sitolu puluh dua halak ai, “Ulang ma porang nasiam halak na etek barang halak na banggal, pitah raja ni Israel hansa.”
32Jadi dob iidah kopala-kopala ni gareta porang ai si Josafat, nini uhur ni sidea ma, “Tontu ia do raja Israel!” Jadi marhusor ma sidea laho mamorangsi; tapi mandoruhi ma si Josafat.
33Jadi dob iidah kopala-kopala ni gareta porang ai, na so ia do hape raja ni Israel, surut ma sidea hun bani na mardakdaksi.
34Tapi adong ma sada halak, na manembakkon panahni gijig-gijig borngin, gabe hona ma raja ni Israel i holangkolang ni gonditni pakon bajuni. Jadi nini ma hu bani sais ni garetani, “Pahusor gareta on, anjaha boan ma ahu luar hun parporangan on, ai domma ugahan ahu.”
35Tapi halani lambin jobuni do porang ai bani na sadari ai, jadi itaronkon raja ai ma jongjong ibagas garetani mandompakkon halak Aram ai, paima matei ia bodarini ai; mabaor do daroh ni ugah ni raja ai bani dasor ni gareta ai.
36Anjaha marayak sundut mata ni ari tarbogei ma sora tingting i parsaranan ai, sonon, “Mulak bei ma, ganup hu hutani pakon tanohni bei,
37ai domma matei raja in.” Das ma sidea hu Samaria, anjaha i tanom sidea ma ia i Samaria.
38Anjaha sanggah iburihi sidea gareta ai i lambung ni bongbongan, na i Samaria, roh ma baliang mandilati darohni, anjaha roh do pakon boru jalang maridi hujai, romban hu bani hata ni Jahowa, na dob nilumbahon-Ni hinan.
39Barita na legan ai pasal si Ahab pakon ganup na binahenni pakon rumah na pinadearni hun bani gading, sonai homa ganup huta na pinungkahni ai, ai lang tarsurat do ai ibagas buku barita ni raja-raja Israel?
40Ase modom ma si Ahab rap pakon ompungni, anjaha si Ahasya, anakni ai ma bangkit raja gantihni.
Pasal si Josafat pakon si Ahasya na hun Israel
41Ia si Josafat, anak ni si Asa, bangkit raja do ia i Juda, paompattahunkon, dob raja si Ahab i Israel.
42Marumur tolu puluh lima tahun do si Josafat sanggah bangkit raja ia, anjaha dua puluh lima tahun do dokahni manrajai ia i Jerusalem. Ia goran ni inangni, ai ma si Asuba, boru ni si Silhi.
43Sai marparlahou do ia bani ganup dalan ni si Asa, bapani ai, seng manlembang ia hunjai, ibahen do na pintor bani uhur ni Jahowa. (22-44) Tapi seng iparseda ope ianan panumbahan na i buntu-buntu, sai manggalang anjaha manutung dahupa ope halak na mabuei ai bani ianan panumbahan na i buntu-buntu.
44(22-45) Anjaha mardear do si Josafat pakon raja ni Israel.
45(22-46) Barita na tading ai ope pasal si Josafat pakon kuasani, na nidalankonni ai, pakon naha parporanganni, ai lang tarsurat do ai ibagas buku Barita ni Raja-raja Juda?
46(22-47) Sonai homa simasima ni halak na marjolmahon dalahi, na tading ope sanggah goluh ni si Asa, bapani ai, isiapkon do hun tanoh in.
47(22-48) Seng dong raja ijia i Edom, wakil do manrajai ijai.
48(22-49) Isuruh si Josafat do na paulihon kapal Tarsis, sipabangkiton hu Opir mangalop omas namin; tapi seng saud laho sidea, ai mangkaseda do kapal ai i Ezyon-Geber.
49(22-50) Ijia ma ihatahon si Ahasya, anak ni si Ahab hu bani si Josafat, “Mahua lopas ham ma juakjuakku rap pakon juakjuakmu marlayar bani kapal in” tapi seng ra si Josafat.
50(22-51) Dob ai modom ma si Josafat rap pakon ompungni, anjaha i tanom ma ia i lambung ni ompungni i huta ni si Daud, ompungni ai; anjaha si Joram, anakni ai ma bangkit raja manggantihsi.
51(22-52) Ia si Ahasya, anak ni si Ahab, bangkit raja do ia manggomgom Israel i Samaria, pasapuluh-pitutahunkon dob raja si Josafat i Juda, anjaha dua tahun do ia manrajai Israel.
52(22-53) Ihorjahon do sogam ni uhur ni Jahowa, sai mardalan do ia bani dalan ni bapani pakon inangni pakon dalan ni si Jerobeam, anak ni si Nebat, na mambahen Israel mangkorjahon dousa.
53(22-54) Ibalosi do homa baal, anjaha marsombah do ia hujai, gabe ipuhoi ringis ni Jahowa, Naibata ni Israel, usih tumang songon na binahen ni bapani ai.
<< 1 Raja-raja 22 >>
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel