Iramotkon si Daud si Saul Paduahalihon
1Roh ma halak Sip marayak si Saul hu Gibea, nini sidea ma, “Ai lang i buntu-buntu Hakila do si Daud marponop, hampit hapoltakan ni Jesimon?”
2Dob ai bingkat ma si Saul tuad hu halimisan Sip odor rap pakon tolu ribu halak, na pinilih hun bani halak Israel, laho mangindahi si Daud i halimisan Sip.
3Jadi marsaran ma si Saul i buntu-buntu Hakila, i lambung dalan hampit hapoltakan ni halimisan; tapi anggo si Daud marianan do i halimisan. Jadi dob iidah na dob roh si Saul mangirikkonsi hu halimisan,
4isuruh si Daud ma parkahap, gabe torang ma ibotoh, na dob roh si Saul ai.
5Jadi misir ma si Daud anjaha das ma ia hu parsaranan ni si Saul; iidah si Daud ma ianan parpodoman ni si Saul rap pakon si Abner, anak ni si Ner, pambobai ni balani ai. Modom i tongah-tongah ni parsaranan ai do anggo si Saul anjaha halak simbuei ai marsaran manginggotisi.
6Dob ai nini si Daud ma hu bani si Ahimelek, halak Het ai, pakon hu bani si Abisai, anak ni si Seruja, anggi ni si Joab, “Ise do na ra hasomanku tuad hu parsaranan ni si Saul?” Jadi nini si Abisai ma, “Ahu ma tuad hasomanmu.”
7Jadi das ma si Daud pakon si Abisai hu ianan ai borngin-borngin; modom do ijai si Saul i tongah-tongah ni parsaranan ai, anjaha pantik do tanjani hu tanoh i lambung uluni; anjaha modom do si Abner pakon halak ai ganupan manginggotisi.
8Dob ai nini si Abisai ma dompak si Daud, “Domma iondoskon Naibata imbangmu hubagas tanganmu sadari on; halani ai lopas ham ma ase hupantom ia bani tanjangkon hu tanoh, sahali mamantom seng pala mardua hali.”
9Tapi nini si Daud ma dompak si Abisai, “Ulang bunuh ia! Ise ma na mamunuh na mininakan ni Jahowa, gabe lang hona uhum ia?”
10Nini si Daud ma, “Songon sintongni manggoluh Jahowa, Jahowa ma na mamunuhsi, barang roh ajalni gabe matei, barang bingkat ma ia hu parporangan gabe matei.
11Daoh ma in hun bangku, halani Jahowa, anggo mintor ahu mangonai tangan hu bani na mininakan ni Jahowa; on pe buat ma tanjani, na i lambung ni uluni ai, pakon gusi ai ase laho hita.”
12Dob ai ibuat si Daud ma tanjani pakon gusi na i lambung ni uluni si Saul ai; jadi laho ma sidea. Sada pe lang na mangidah ai, barang na mambotoh ai, barang na tarpuho; ai tarpodom do sidea ganup, halani sinok do sidea haganup ibahen Jahowa.
13Dob ai mandipar ma si Daud hu lopah ai, jongjong ma ia i pakpak ni dolog ai mandaoh-daoh, tar daoh do parholangan ni sidea ai.
14Dob ai dilo-dilo ma si Daud hu bani bala ai pakon hu bani si Abner anak ni si Ner, nini ma, “Ai lang balosanmu ahu Abner?” Nini si Abner ma mambalosi, “Ai ise do ho na dilo-dilo hu bani raja in?”
15Nini si Daud ma dompak si Abner, “Ai lang dalahi do ham? Ise ma na songon ham i Israel? Mase ma lang ijaga ham tuanmu, raja in? Ai roh do sahalak hun bani bala in sihol mangagou raja in, tuanmu in.
16Seng dear in na binahenmu in. Songon sintongni manggoluh Jahowa, talup do ham matei, ai lang iramotkon ham tuanmu, na mininakan ni Jahowa. On pe tonggor ma, ija do tanja pakon gusi ianan ni bah na i lambung ni uluni ai?”
17Jadi itanda si Saul ma sora ni si Daud ai, lanjar nini ma, “Soramu do in, alo Daud anakku?” Nini si Daud ma, “Sorangku ma da, rajanami.”
18Nini ma, “Mase ma ipardakdak tuanku jabolonni? Ai aha dong na hubahen? Anjaha hajahaton aha adong ihorjahon tanganku?
19On pe, tangar ham ma, rajanami hata ni jabolonmu, ʻAnggo Jahowa do, na mangojur ham mangimbang ahu, sai ijalo ma sada galangan; tapi anggo jolma do: Sai hona papa ma ia i lobei ni Jahowa, halani na niusirni ai ahu sadari on, ase ulang dapotan ahu hun bani parbagianan ni Jahowa,ʼ anjaha nini, ʻLaho ho, marsombah hu bani naibata na legan.ʼ
20On pe, ulang ma namin durus darohku daoh hun lobei ni Jahowa; ai luar do raja ni halak Israel mangindahi hosahku songon sada halak, na marburu dayok rimba i atas dolog.”
21Dob ai nini si Saul ma, “Domma mardousa ahu; mulak ma ho, Daud anakku, seng be bahenonku na masambor bam, ai harga do hosahku iahap ho sadari on; tonggor ma, haotoon do na hubahen anjaha kahou tumang do ahu.”
22Nini si Daud ma mambalosi, “Tonggor ma, ijon do tanja ni raja in, isuruh ma sada halak hun bani anak garama in mangalop.
23Jahowa ma na mambalaskon bani ganup hita romban hu bani hapintoran-Ni pakon habonaran-Ni; domma namin iondoskon Jahowa ham sadari on hubagas tanganku, tapi seng ra ahu mardas tangan hu bani na mininakan ni Jahowa.
24Ai songon harga ni hosahmu in bangku sadari on, sai sonin ma harga ni hosahku i lobei ni Jahowa, anjaha sai ipaluah ma ahu hun bani sagala hasosakan.”
25Dob ai nini si Saul ma dompak si Daud, “Sai dapotan pasu-pasu ma ho, Daud, anakku! Sai na saud do in bahenonmu anjaha jadi do.” Dob ai inunuti si Daud ma dalanni, anjaha si Saul pe mulak ma hu bani iananni.
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel