Ialop Poti Parpadanan ai hun Kiryat-Jearim
1Dob ai marriah ma si Daud pakon pambobai ni sisaribu halak pakon sisaratus halak ampa ganup kopala tene.
2Nini si Daud ma dompak ganup tumpuan ni Israel ai: Anggo dear uhur nasiam anjaha harosuh ni Jahowa Naibatanta ai, mahua suruh hita ma na marayak saninanta, sagala na tading ai i sab tanoh ni Israel, ase rap sidea use marayak malim pakon halak Levi ibagas huta parbagianan ni sidea, ase martumpu sidea hu lambungta,
3ase mulak boan hita hu tongah-tongahta poti ni Naibatanta; ai seng pindah-pindah uhurta hujai sanggah goluh ni si Saul.
4Jadi sauhur ma tumpuan ai mambahen sonai, ai ganup do halak simbuei ai marhatongonkon hata ai.
5Jadi ipatumpu si Daud ma haganup Israel, singgan ni bah Sihor i Masir das ronsi Hamat, laho mangalop poti ni Naibata hun Kiryat-Jearim.
6Tangkog ma si Daud rap pakon ganup Israel hu Baala, ai ma Kiryat-Jearim, i tanoh Juda, laho mamboan tangkog hunjai poti ni Naibata, na margoran mangihutkon goran ni Jahowa, na marparatas i babou ni Herubim.
7Jadi iboan sidea ma poti ni Naibata i atas ni sada gareta na bayu hun rumah ni si Abinadab; si Usa pakon si Ahio do na manogu gareta ai.
8Tapi anggo si Daud pakon haganup Israel marompot do manortori i lobei ni Naibata, marhasoman doding, husapi, arbab, tambur, ogung pakon tarompet.
9Sanggah das sidea hu pardogeian Kidon, idurdurhon si Usa ma tanganni laho manjolomi poti ai, halani tartolsu lombu ai.
10Jadi manringis tumang ma Jahowa mangidah si Usa, ibunuh ma ia, halani na nidurdurhonni ai tanganni manjolom poti ai, gabe matei ma ia ijai i lobei ni Naibata.
11Jadi pusok tumang ma uhur ni si Daud halani sonai panontapkon ni Jahowa bani si Usa, gabe igoran ma ianan ai Perez-Uza ronsi sadari on.
12Jadi mabiar tumang ma si Daud mangidah Naibata bani na sadari ai, nini ma: Sonaha ma pambahenku mamboan poti ni Naibata das hubangku?
13Halani ai seng ilopas si Daud boanon poti ai hu huta ni si Daud, tapi inahkon ma ai hu rumah ni si Obed-Edom, halak Gad ai.
14Jadi tading i rumah ni si Obed-Edom ma poti ai, tolu bulan dokahni, anjaha ipasu-pasu Jahowa ma rumah ni si Obed-Edom pakon ganup na adong bani.
<< 1 Tawarikh 13 >>
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel