Malim Joyada Pabangkit si Joas Gabe Raja
1Tapi papitu-tahunkon iboranihon si Joyada ma uhurni, gabe ibahen ma parpadanan pakon kopala-kopala ni bala, sirajai sisaratus: Si Asarya anak ni si Jerohan, si Ismail anak ni si Johanan, si Asarya anak ni si Obed, si Maaseya anak ni si Adaya pakon si Elisapat anak ni si Sikri.
2Dob ai isiar sidea ma ganup tanoh Juda, anjaha ipatumpu ma halak Levi humbani ganup huta ni Juda pakon kopala ni mar sasaompung i Israel, jadi roh ma sidea hu Jerusalem.
3Jadi mambahen parpadanan ma ganup tumpuan ai ibagas Rumah ni Naibata rap pakon raja ai. Nini si Joyada ma hubani sidea, “Tonggor ma, anak ni raja in! Ia ma na maningon manrajai, songon na hinatahon ni Jahowa pasal anak ni si Daud.
4On ma na maningon sibahenon nasiam: Sapartolu humbani nasiam, malim pakon halak Levi, na marhorin ari Sabat, marjaga ma i lambung rumah ni raja ai;
5sapartolu i rumah ni raja ai, anjaha sapartolu nari bani horbangan Jesod; anjaha bangsa ai haganup i alaman ni Rumah ni Jahowa.
6Anjaha ise pe lang na bulih masuk hu Rumah ni Jahowa sobali ni malim ampa halak Levi siparugas; sidea bulih do masuk, ai na susi do sidea; tapi haganup halak simbuei ai maningon irikkonon ni sidea do aturan ni Jahowa.
7Maningon inggotan ni halak Levi do raja ai, ganup marsijolom sinjatani bei ibagas tanganni; anjaha barang ise na masuk hu rumah panumbahan ai, maningon bunuhon do ia. Hasomani nasiam ma raja ai, anggo luar ia barang masuk.”
8Jadi ibahen halak Levi ampa ganup halak Juda ma romban hubani na pinarentahkon ni malim Joyada; ganup sidea roh rap pakon hasomanni, ai ma na marhorin bani ari Sabat ampa na so marhorin bani ari Sabat; ai lang ibere malim Joyada mulak siparhorin ai.
9Anjaha ipambere malim Joyada ma hubani kopala-kopala ai tanja, gantar na banggal pakon gantar na etek, na adong bani raja Daud hinan, na sinimpan ibagas Rumah ni Naibata.
10Dob ai ipajongjong ma ganup bangsa ai gabe pangawal ni raja ai, ganup manjolom sinjata, hampit siamun ni rumah ai, inggot ni anjapanjap ai ampa rumah ai.
11Dob ai iarahkon sidea ma anak ni raja ai luar, inahkon ma sortali ai hu atas uluni, ibere ma bani titah ai, anjaha ipabangkit sidea ma ia gabe raja; si Joyada pakon anakni ai do na mamminakisi, anjaha iolobkon sidea ma, “Sai horas ma raja in!”
12Jadi dob ibogei si Atalya sora ni halak na mabuei ai, marrohan anjaha mamuji-muji raja ai, laho ma ia marayak halak simbuei ai hu Rumah ni Jahowa.
13Iidah ma ijai jongjong raja ai bani tiang na bani labah harorohan, anjaha kopala-kopala pakon partarompit do i lambung ni raja ai, anjaha ganup bangsa pangisi ni nagori ai marmalas uhur lanjar manompul tarompit; anjaha pandoding ai marhasoman parugas musikni do na mambobahon pamuji-mujian ai. Dob ai irigati si Atalya ma hiouni, anjaha irik ihatahon, “Tahi-tahi! Tahi-tahi!”
14Tapi iparentahkon malim Joyada ma kopala-kopala, na pinabangkit mangopalai bala ai, nini ma dompak sidea, “Arahkon nasiam ma ia hu darat ni alaman lobei-lobei ai; barang ise na mangirikkonsi, bunuhon do bani podang!” Ai nini malim ai do, “Ulang bunuh nasiam ia ibagas Rumah ni Jahowa.”
15Dob ai itangkap sidea ma ia; anjaha dob das ia hu horbangan huda ni rumah ni raja ai, ibunuh sidea ma ia ijai.
16Dob ai marpadan ma si Joyada pakon bangsa ai ganup ampa raja ai, paboa maningon bangsa ni Jahowa do sidea.
17Dob ai masuk ma ganup halak simbuei ai hu rumah ni Baal lanjar iparseda ma ai; iropuki sidea ma anjapanjap pakon gana-ganani, anjaha si Matan, malim ni Baal ai, ibunuh sidea ma i lobei ni anjapanjap ai.
18Dob ai iangkat si Joyada ma sipanjaga bani Rumah ni Jahowa humbani malim-malim ampa halak Levi, songon na dob niadongkon ni si Daud hinan marhorin-horin bani Rumah ni Jahowa, ase sidea manggalangkon galangan situtungon bani Jahowa, romban hubani na tarsurat ibagas titah ni si Musa, marhasoman malas ni uhur ampa pandodingon, mangihutkon aturan na binahen ni si Daud.
19Isuruh ma sijaga horbangan ni Rumah ni Jahowa, ase ulang masuk hujai barang ise na butak binahen ni atap aha pe.
20Dob ai iarahkon ma kopala-kopala, halak na sangap-sangap, halak sigomgom halak simbuei ai ampa haganup bangsa pangisi ni nagori ai; iarahkon sidea ma raja ai tuad hun Rumah ni Jahowa, mardalan ma sidea hun horbangan na hampit huluan hu rumah ni raja ai. Jadi ipahundul sidea ma raja ai bani paratas harajaon ai.
21Jadi marmalas ni uhur ma ganup bangsa pangisi ni nagori ai; anjaha sonang ma homa huta ai dob hona bunuh si Atalya marhitei podang.
<< 2 Tawarikh 23 >>
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel