Alkitab Mobile SABDA
[VER] : [SIMALUNGUN]     [PL]  [PB] 
 <<  2 Tawarikh 24 >> 

Panggomgomion ni si Joas

1Marumur pitu tahun do si Joas, sanggah na bangkit raja ai ia, anjaha ompat puluh tahun do dokahni ia manrajai i Jerusalem; goran ni inangni, ai ma si Sibya, hun Berseba.

2Ihorjahon si Joas do rosuh ni uhur ni Jahowa, sadokah manggoluh Malim Joyada.

3Ibuat si Joyada ma dua naboru bahen parinangonni, gabe tubuhan anak pakon boru ma ia.

4Dob salpu ai tubuh ma uhur ni si Joas sihol mangumban Rumah ni Jahowa.

5Ipatumpu ma malim pakon halak Levi, nini ma dompak sidea, “Laho ma nasiam marayak huta-huta ni Juda, anjaha patumpu nasiam ma pirak humbani ganup halak Israel, laho mangumban Rumah ni Naibata nasiam ganup tahun; anjaha oloskon nasiam ma horja ai,” tapi seng ra halak Levi ai mangoloskon.

6Dob ai idilo raja ai ma Sintua ni malim Joyada, nini ma dompaksi, “Mase ma lang iojur ham halak Levi, ase iboan sidea hun Juda pakon hun Jerusalem guguan, songon na tinitahkon ni si Musa, juakjuak ni Jahowa, hubani halak Israel bahen haporluan ni lampolampo hasaksian in?”

7Ai domma hona bongkar Rumah ni Naibata ibahen anak ni si Atalya na jahat ondi, anjaha ganup parugas na mapansing na i Rumah ni Jahowa, domma ipakei manggalang bani Baal.

8Dob ai ihatahon raja ai ma mambahen sada poti, anjaha itibalhon ma ai idarat ni horbangan ni Rumah ni Jahowa.

9Anjaha ihatahon ma na maningtingkon i Juda pakon i Jerusalem, ase iboan bei bani Jahowa guguan na tinitahkon ni si Musa, juakjuak ni Naibata bani halak Israel i halimisan.

10Jadi marmalas ni uhur ma ganup kopala-kopala pakon ganup bangsa ai, iboan sidea ma guguanni bei, ipandabuhkon ma ai hubagas poti ai ronsi gok.

11Ia dob jumpah adanganni, boanon ni halak Levi poti ai hubani gamot-gamot ni raja ai, anjaha iidah sidea domma buei duit ibagas, jadi roh ma jurutulis ni raja ai pakon wakil ni sintua ni malim, ipalumei ma poti ai anjaha ipaulak ma use ai bani iananni ai. Jadi sonai ma ibahen sidea marnombas-nombas, gabe buei ma duit tumpu.

12Dob ai iondoskon raja ai pakon si Joyada ma ai hubani halak haondosan ni horja, laho paulihon Rumah ni Jahowa; sidea ma na manggaji tukang batu pakon tukang hayu, laho mangumban Rumah ni Jahowa, sonai homa tukang bosi pakon tombaga, laho paulihon Rumah ni Jahowa.

13Jadi marhorja bei ma tukang ai, anjaha dear do pardalan ni pangumbanon ai marhitei tangan ni sidea; mulak ma rumah panumbahan ai ibahen sidea songon haadongonni hinan, anjaha toguh ibahen.

14Jadi siaphonsi horja ni sidea, iboan sidea ma duit na tading ai hu lobei ni raja ai pakon si Joyada; hunjai ma ipauli parugas bani Rumah ni Jahowa, ai ma parugas bani horja parugason ampa laho manggalangkon galangan situtungon, pakon batil ampa parugas humbani omas ampa pirak. Dob ai igalangkon sidea ma tongtong galangan situtungon i Rumah ni Jahowa sadokah manggoluh si Joyada.

15Jadi dob sayur matua si Joyada anjaha sobalan ia bani hagoluhan on, matei ma ia; saratus tolu puluh tahun ma umurni, sanggah na matei ai ia.

16Itanom sidea ma ia i huta ni si Daud, i lambung ni raja-raja, halani na madear, na binahen ni ai i Israel, sonai homa bani Naibata ampa bani rumah panumbahan ai.

17Dob matei si Joyada, roh bei ma kopala-kopala ni Juda marsombah hubani raja ai; itangihon raja ai do pangindoan ni sidea ai.

18Dob ai itadingkon sidea ma Rumah ni Jahowa, Naibata ni ompung ni sidea, gabe ibalosi sidea ma sisombahon Ashera ampa gana-gana. Jadi roh ma ringis ni Naibata hubani Juda ampa hubani Jerusalem halani dousa ni sidea ai.

19Isuruh Jahowa ma nabi bani sidea, laho mangarahkon sidea mulak hubani Jahowa; gogoh do sidea ipaingat, tapi seng iparimbagaskon sidea.

20Dob ai sogop ma Tonduy ni Naibata hubani si Sakaria, anak ni Malim Joyada; jongjong ma ia i lobei ni bangsa ai anjaha nini ma dompak sidea, “Sonon do hata ni Naibata: Mase ma ilanggar nasiam titah ni Jahowa, na mambahen gabe seng marhasonangan nasiam? Halani na tinadingkon nasiam ai Jahowa, ai do ase itadingkon nasiam.”

21Hape gabe marbulawan ma sidea mangimbangsi, pala ipargijig sidea ia bani batu iparentahkon raja ai, i alaman ni Rumah ni Jahowa.

22Ase domma lupa Raja Joas bani holong ni si Joyada, bapa ni si Sakaria hu bani, ai ibunuh do anakni. Sanggah na laho matei ia, nini si Sakaria ma, “Naibata ma na mangidah anjaha na mambalaskon ai!”

23Jadi bani ujung ni tahun ai, tangkog ma bala ni halak Aram marporang dompaksi, pala das sidea hu Juda ampa hu Jerusalem, anjaha isiapkon sidea ma ganup kopala-kopala ni bangsa ai, anjaha sagala taban-taban na jumpah sidea, itongoskon ma ai bani raja ni Damaskus.

24Age pe otik bala ni halak Aram na roh ai, iondoskon Jahowa do hubagas tangan ni sidea sada bala bolon tumang, halani na tinadingkon ni sidea ai Jahowa, Naibata ni ompung ni sidea. Sonai ma halak Aram pasaudkon uhum bani si Joas.

25Jadi dob laho sidea manadingkonsi, parah tumang do ugahni ai itadingkon, marbulawan ma juakjuakni mangimbangsi, halani daroh ni anak ni Malim Joyada, anjaha ibunuh sidea ma ia i atas podomanni. Jadi matei ma ia, anjaha itanom sidea ma ia i huta ni si Daud, tapi seng i tanoman ni raja-raja.

26Ia halak na marbulawan mangimbangsi ai, ai ma: Si Sabad, anak ni si Simeat boru Ammon, pakon si Josabad, anak ni si Simrit boru Moab.

27Tapi anggo pasal anakni pakon buei ni sohei na pinaporsankonni, ampa parpaulini ai bani Rumah ni Naibata, tonggor ma, tarsurat do ai ibagas buku Barita ni Raja-raja. Jadi si Amasia, anakni ai ma bangkit raja manggantihsi.



 <<  2 Tawarikh 24 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel Single Panel