Amsal 10 (SIMALUNGUN)

[VER] : [SIMALUNGUN] [PL] [PB]

<< Amsal 10 >>

Podah Pasal Hapentaran ampa Hadaulaton

1Podah ni si Salomo. Anak na maruhur pamalas uhur ni bapani, tapi anak na bodoh papusok uhur ni inangni,

2Arta na dapot humbani hajahaton, seng marguna, tapi hapintoron do na paluahkon humbani hamatean.

3Seng ipaturut Jahowa loheian parpintor, tapi anggo hisap ni halak parjahat isundati do.

4Tangan parrayoh mangkorhon hamiskinon, tapi tangan na ringgas mambahen bayak.

5Halak na ringgas patumpu-tumpuhon bani musim milas, ai ma siparuhur; tapi halak na modom-modom musim sabion, parohkon habadoron.

6Pasu-pasu do sogop bani ulu ni halak parpintor, tapi gok hagedukon do babah ni halak parjahat.

7Mardingat halak parpintor parohkon pasu-pasu, tapi bau do barita ni halak parjahat.

8Halak siparuhur ra do manjalo pangajaran, tapi halak parsahap haotoon maningon madabuh do.

9Sonang do halak na pitah marparlahou, tapi halak na geduk marparlahou sai tardapot do.

10Halak na paserleng matani parohkon na maborit, tapi halak na torang-torang maminsang mangkorhon hadearon.

11Bah hagoluhan do pamangan ni halak parpintor, tapi gok hagedukon do pamangan ni halak parjahat.

12Domdom do mamuhoi paringoran, tapi irungkub holong ai do sagala hasalahan.

13Bani bibir ni halak na pantas do dapot hapentaran, tapi lonsing-lonsing do patut mangonai bani gurung ni halak na hurang uhur.

14Halak na pentar pagugun habotohon, tapi pamangan ni halak na bodoh ai ma hamagouan na mangondam.

15Arta ni halak na bayak, huta na toguh do ai bani, tapi hasedaon do hamiskinon ai bani halak na masombuh.

16Pansarian ni halak parpintor mambobai hu hagoluhan, tapi na sinari ni halak parjahat hubagas dousa.

17Mardalan bani dalan hagoluhan do halak siramotkon pangajaran, tapi kahou do halak na so parduli bani pinsang-pinsang.

18Halak pardomdom, ai ma parbibir ladung, tapi halak sipangkatai ai ma halak na bodoh.

19Lang tarbahen lang dong salah bani hata na buei, tapi halak na manrantei bibirni ai ma na pandei.

20Doskon pirak pilihan do dilah ni halak parpintor, tapi pingkiran ni halak parjahat seng sadiha hargani.

21Bibir ni halak parpintor do sipambobai bani buei halak, tapi matei do halak na bodoh ibagas haotoonni.

22Pasu-pasu ni Jahowa do mambahen bayak, anjaha seng pala marhasoman halojaon.

23Gurou-gurou do bani halak na oto mandalankon hajahaton, tapi hapentaran do rosuh ni halak na maruhur.

24Na hinabiaran ni halak parjahat, ai do sogop hu bani, tapi ibere do bani halak parpintor, na pinindo ni uhurni.

25Anggo montas haba-haba, bois do parjahat, tapi totap do lalab halak parpintor.

26Doskon na migar bani ipon ampa timus bani mata, sonai do parrayoh bani na marsuruhsi.

27Biar bani Jahowa do paganjang umur, tapi ari-ari ni halak parjahat ipapondok do.

28Pangarapan ni halak parpintor paroh malas ni uhur, tapi na lang do pinaima-ima ni halak parjahat.

29Batar-batar do Jahowa bani halak na daulat, tapi hamagouan do bani halak sihorjahon hajahaton.

30Seng anjai dugur halak parpintor, tapi halak parjahat seng iankononni tanoh in.

31Pamangan ni halak parpintor patubuh hapentaran, tapi dilah pargeduk maningon rotapon do.

32Bibir ni halak parpintor mambotoh na madear, tapi pamangan ni parjahat mansedahon do.

<< Amsal 10 >>

Bahan Renungan: SH - RH - ROC