Alkitab Mobile SABDA
[VER] : [SIMALUNGUN]     [PL]  [PB] 
 <<  Ayub 12 >> 

Balos ni si Job

1Dob ai Nini si Job ma Mambalosi,

2“Nai ma tongon, hanima ma tongon na sintong, anjaha rap pakon hanima masab hapentaran.

3Ahu pe paruhur do usih songon hanima; seng pala talu ahu marimbang hanima. Ise ma na so mambotoh na sonai ai?

4Gabe sipartatawaan do ahu bani huan-kuanku, ahu sidilo Naibata, na bonar anjaha na daulat maruhur.

5Mapas do tongon uhur ni halak na mardohar mangidah halak na masombuh, anjaha ijullakkon ope halak na sihol tarlandit naheini.

6Mardamei-damei do lampolampo ni halak panrampok, anjaha sonang do halak na pagajag-gajag ringis ni Naibata, na mamboan naibatani ibagas tanganni.

7Mahua sungkun ma namin pinahan, ase sidea mangajari ho; manuk-manuk na i awang-awang, ase sidea patugahkon bam.

8Atap parsahapkon namin binatang na i tanoh, ase ai mangajari ho, ampa dengke na ibagas laut patorangkon ai bam.

9Ise ma na so mambotoh pasal haganupan ai, paboa tangan ni Jahowa do sijadihon ai?

10Ibagas tangan-Ni do hosah ni sagala na manggoluh, pakon tonduy ni sagala jolma.

11Ai lang pinggol do na mananda hata, anjaha langit-langit mandai sipanganon?

12Bani halak na matua do jumpah hapentaran, anjaha pangarusion bani halak siganjang umur.

13Bani Naibata do hapentaran pakon hagogohon, Bani do uhur pakon pangarusion.

14Tonggor ma, anggo Ia manrumbakkon, seng be tarpauli, anggo itutup sada halak, ise pe lang na boi paluahkon.

15Tonggor ma, anggo ijolomi bah, marsik do, anjaha anggo ipaluah ai, maseda tanoh ibahen.

16Bani do hagogohon pakon hapentaran, Ia do sibotoh halak na kahou ampa na pakahouhon.

17Ipalaho do parkuasa ni harajaon mangambei, anjaha maoto panguhum ibahen.

18Itanggali do gari ni raja-raja, anjaha iranteihon do rantei bani binongei ni sidea.

19Ipalaho do malim mangambei, anjaha idabuhkon siparkuasa.

20Ipadaoh do hapandeian marsahap humbani halak na hinatengeran, anjaha ibuat do uhur humbani halak na matua.

21Iuseihon do hahirion bani na sangap-sangap, anjaha itanggali do gondit ni halak na gogoh.

22Ipatalar do na ponop ibagas hagolapan, anjaha iboan hubani haliharon na lotir ni na lotir.

23Ipatimbul do bangsa-bangsa, dob ai iagou use; ipararat bangsa-bangsa, dob ai ipalaho use.

24Ibuat do uhur humbani pambobai ni bangsa i tanoh on, anjaha ipakahou sidea i halimisan na so adong dalan.

25Dadap-dadap do sidea ibagas hagolapan na lang marhaliharon, anjaha rebad-rebad sidea songon halak na mabuk.



 <<  Ayub 12 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel Single Panel