Ayub 4 (SIMALUNGUN)

[VER] : [SIMALUNGUN] [PL] [PB]

<< Ayub 4 >>

Sahap ni si Elipas: Seng Dong na Marsitaronon, na So Marsalah

1Dob ai nini si Elipas, halak Teman ai ma mambalosi,

2“Anggo dong na marsahap dompak ham, sogam do uhurmu? Tapi ise ma na mangasup mangorom marsahap?

3Tonggor ma, buei ma halak na dob niajaranmu, anjaha ipargogohi ham do tangan na galek.

4Halak na jomba ipajongjong ham do marhitei hatamu, anjaha nahei ni halak na rebad-rebad ipatoguh ham do.

5Tapi nuan dob mangonai on bamu, gabe mandolei ham; dob mangonai on bamu, gabe gamang ham.

6Ai lang biarmu dompak Naibata hatengeran ni uhurmu, anjaha habonaran ni langkahmu pangarapanmu hinan?

7Dingati ham ma, nantigan ma ongga magou halak na so marsalah? Barang ija ongga masab na pintor maruhur?

8Songon na dob huidah, halak sitinggalahon hajahaton ampa sitidahkon hamagouan, ai do pariamaonni.

9Mogap do sidea ibahen hosah ni Naibata, anjaha bois sidea ibahen panompul ni ringisni.

10Paraum ni singa, sora ni singa panoroh, ipon ni singa poso-poso, iropangi do.

11Magou do singa halani hurang sorohan, anjaha anak ni singa boru-boru merap do.

12Roh do bangku hata, sipsip, anjaha ijalo pinggolhu do husipni ai.

13Sanggah mamingkir-mingkiri alatan borngin, sanggah rengesni modom jolma,

14sogop ma bangku biar pakon gobir, na mambahen hitir ganup holiholingku.

15Montas do sada Tonduy hun lobeihu; manimbor ma ambulu ni badanku.

16Soh ma ia, tapi seng tartandai ahu rupani. Dong do na jongjong i lobeihu, anjaha hubogei ma sora na husip-husip:

17Mintor boi ma sahalak jolma pintor i lobei ni Naibata? Mintor boi ma sada dalahi pansing i lobei ni Sitompasi?

18Tonggor ma, gari bani juakjuak-Ni seng tenger uhurni, anjaha bani malekat-Ni ididah hakahouon,

19samintolah ma bani jolma na marianan ibagas rumah tanoh halampung, na marbona humbani orbuk, na boi pisatkonon songon ngitngit?

20Holangkolang ni sogod pakon bodari iagou, iropuki sidea; magou do sidea sadokah ni dokahni, seng dong na mansahapkon.

21Ai lang, anggo iparreong ma lampolampo ni goluh ni sidea, matei ma sidea, tapi seng ibagas hapentaran.”

<< Ayub 4 >>

Bahan Renungan: SH - RH - ROC