Ayub 9 (SIMALUNGUN)

[VER] : [SIMALUNGUN] [PL] [PB]

<< Ayub 9 >>

Balos ni si Job Bani si Bildad; Seng dong Atap Ise na Pintor i Lobei ni Naibata

1Dob ai nini si Job ma mambalosi,

2“Torang do hubotoh, sintong do sonai; anjaha sonaha ma tarbahen jolma in pintor i lobei ni Naibata?

3Anggo mardabuh-dabuh uhurni pakon-Si, humbani na saribu, sahali pe lang mangasup ia mambalosi-Si.

4Paruhur na pentar do Ia, anjaha surung Bani hagogohon. Ise ma na pahengkeng uhurni dompak-Si lanjar boi marsonang-sonang?

5Ia do na paosor dolog, seng ibagas botoh ni sidea. Ia do na pabalikkon ai ibagas ringis-Ni.

6Ia do na mambahen rebad tanoh on humbani iananni, meleng-eleng tiang partunggulni.

7Ia do na marsahap hubani mata ni ari gabe seng poltak, anjaha ihurung do bintang marhasoman tokan.

8Ia sandiri do na paherbang langit, anjaha mardalan Ia i atas gilumbang ni laut.

9Ia do na manjadihon bintang pariama pakon bintang sidongdong, bintang hala pakon bintang pardangsina.

10Ia do na mambahen habanggalon na so tardadap, ampa tanda halongangan na so tarbilangi.

11Tonggor ma, Ia montas hun lambungku, tapi lang huidah, Ia lopus hun lobeihu, tapi lang huahapkon.

12Anggo Ia manontapkon, ise ma na boi mangolati? Ise ma na pag mangkatahon Bani, ʻAha do na binahe-Mu in?ʼ

13Seng ra Naibata pahombunkon ringis-Ni, manombah do age siurupi si Rahab Bani.

14Sonaha ma boi balosanku Ia, tarpilihi ahu ma hata sibaloskononku Bani?

15Age pe pintor ahu, seng tarbalosi ahu Ia, maningon mangindo holong ni atei ahu humbani Siuhum ahu.

16Anggo dilo-dilo ahu, anjaha itangihon ahu, lanjar seng iparhatongon uhurhu, na dob tinangihon-Ni ai sorangku.

17Ai iropuki do ahu marhitei habahaba, anjaha ipabuei ugahku seng marhala;

18seng ilopas ahu pahosahkon, tapi ibosuri do ahu bani hapaeton.

19Anggo pasal sigogohan do, Ia ma ai; anggo pasal uhum do, ise ma na boi mangaduhon-Si?

20Age pintor ahu, pamanganku sandiri do mamapai ahu; age pe lang marsalah ahu, dong do tong na simbei tuduhkonon-Ni.

21Seng dong pamandangon ahu; seng masuk hira bangku hosahku, sobalan ma ahu bani goluh on.

22Dob do hape ganup, halani ai ningku do, ʻRap imasabkon do na so marpipot ampa siparjahat.ʼ

23Anggo sompong lonsing-lonsing-Ni mamunuh, tawa do Ia mangidah pandoleian ni jolma na so marpipot.

24Domma iondoskon tanoh on bani tangan ni parjahat, ipapitung do mata ni panguhumni; anggo seng Ia mambahen ai, tor ise ma?

25Dorasan do ari-aringku salpu humbani siparlintun; habang do ai, seng sampang mangidah hadoharon.

26Podas do ai salpu songon solu hotang, songon haluhuy na manangkis sorohanni.

27Anggo huhatahon, ʻHulupahon ma hasombuhonku, hupadaoh ma posi ni bohingku, minar ma bohingku!ʼ

28Mintor bajoraon ma ahu halani sitarononku, halani hubotoh, seng tumaram seng marpipot ahu hatahononmu.

29Siparsalah do ahu, mase ma anggo sonai nunutonku loja soya-soya?

30Age pe huparidi diringku bani salju, anjaha hupaborsih tanganku marhitei sabun,

31usobkonon-Ni do ahu hubagas rawang, anjaha magigi pakeianku mangidah ahu.

32Ai seng jolma Ia songon ahu, gabe tarbalosi ahu Ia, gabe rap hanami laho hu paruhuman.

33Seng dong sipanolahi i tongah-tongahnami, na mangampeihon tanganni bennami na dua.

34Sai ipadaoh ma namin humbangku simambu-Ni, anjaha songgot-songgot-Ni ulang ipambibiari ahu,

35ase boi ahu marsahap Bani, seng pala mabiar; tapi seng sonai ope ahu nuan, lang tenger uhurhu.

<< Ayub 9 >>

Bahan Renungan: SH - RH - ROC