Alkitab Mobile SABDA
[VER] : [SIMALUNGUN]     [PL]  [PB] 
 <<  Bilangan 20 >> 

Parmatei ni si Miryam

1Dob ai das ma halak Israel, ganup tumpuan ai tene hu halimisan Sin bani bulan sada, anjaha marsaran ma bangsa ai i Kades; matei ma si Miryam ijai, lanjar itanom ijai.

Dousa ni si Musa pakon si Aron

2Dob ai hurangan bah ma tumpuan ai, jadi rongom ma sidea roh marayak si Musa pakon si Aron.

3Ipungkah bangsa ai ma partinggilan dompak si Musa, nini sidea ma, “Ambit rotap ma namin hosahnami sanggah na matei saninanami i lobei ni Jahowa.

4Mase ma arah-arahonnima kuria ni Jahowa hu halimisan on, ase matei hanami ijon rap pakon pinahannami?

5Anjaha mase ma arahkononnima hanami tangkog hun Masir, laho mamboan hanami bani ianan na masambor on? Seng dong ijon gandum, hayu ara barang hayu anggur barang hayu dalima; gari bah inumon seng dong jumpah.”

6Dob ai laho ma si Musa pakon si Aron hun lobei ni kuria ai, hu labah ni lampolampo partumpuan ai, anjaha marrogop ma sidea. Dob ai taridah ma hamuliaon ni Jahowa bani sidea.

7Dob ai nini Jahowa ma hubani si Musa,

8“Buat ma tungkot ai, patumpu ma kuria in, ho pakon abangmu si Aron, dob ai parsahapkon hanima ma dolog batu ai, i lobei ni mata ni sidea, ase ibere bahni; sonai ma paluaronmu bah hun dolog batu ai hubani sidea; sonai ma bereonmu minum kuria in pakon pinahanni.”

9Dob ai ibuat si Musa ma tungkot ai hun lobei ni Jahowa, songon na tinonahkonni ai hu bani.

10Ipatumpu si Musa pakon si Aron ma kuria in hu lobei ni dolog batu ai, anjaha nini ma hubani sidea, “Bogei ma, nasiam sipanggeori! Tarpaluar do bah bani nasiam hun dolog batu on?”

11Dob ai ipagostong si Musa ma tanganni anjaha ibogbog ma dolog batu ai marhitei tungkotni ai dua hali; jadi luar ma bah buei tumang, gabe minum ma kuria ai ampa pinahanni.

12Dob ai nini Jahowa ma hubani si Musa pakon hubani si Aron, “Halani na so porsaya ai hanima Bangku, laho papansingkon Ahu namin i lobei ni halak Israel, halani ai seng be hanima mangarahkon kuria on das hu tanoh, na dob Hulayak-layakkon bani sidea namin.”

13Ai ma Bah Meriba, halani ijai itinggili halak Israel Jahowa, anjaha Ia papansing diri-Ni i tongah-tongah ni sidea.

Lang Ilopas Halak Edom Sidea Mamontas hun Tanoh ni Sidea

14Dob ai isuruh si Musa ma suruhanni hun Kades marayak raja ni halak Edom, “Sonon do hata ni anggimu halak Israel, ʻIbotoh ham do ganup sitaronon na idagei hanami;

15sonaha ompungnami tuad hu tanoh Masir, anjaha hanami dokah marianan i tanoh Masir, anjaha bajan do pangarsik-arsik ni halak Masir bennami pakon bani ompungnami.ʼ

16Jadi doruh-doruh ma hanami bani Jahowa, gabe itangar ma soranami, anjaha isuruh sada malekat, anjaha iarahkon ma hanami luar hun Masir; anjaha tonggor ma, domma i Kades hanami nuan, sada huta bani parbalogan ni tanohmu.

17Mahua palopas ham ma hanami mamontas hun nagorimu. Lang pe hanami mardalan hun ladang barang pohon anggurmu, anjaha lang pe iinum hanami bah hun parigi; dalan na bolon in pe idalani hanami, lang pe manirpang hanami hu siamun barang hu sambilou, paima salpu ibontas hanami nagorimu.”

18Tapi nini raja ni Edom ma hu bani, “Seng bulih bontasonmu nagoringku, ase ulang luar ahu mangimbang ho marhasoman podang.”

19Dob ai nini halak Israel ma hu bani, “Dalan na bolon in pe dalanannami, anjaha anggo iinum hanami humbani bahmu, hanami pakon pinahannami, igalar hanami pe in; pitah mamontas, mardalan nahei do hanami, seng dong na legan.”

20Tapi nini ma, “Seng bulih bontasonmu!” Anjaha luar ma raja ni Edom mangolat sidea rap pakon buei balani ni gopas marsinjata.

21Ase sonai ma pangengkar ni raja ni Edom palopas halak Israel mamontas hun nagorini, jadi manlembang ma halak Israel manlembangisi.

Parmatei ni si Aron

22Dob ai bingkat ma sidea hun Kades, gabe das ma ganup kuria ni halak Israel hu Dolog Hor.

23Dob ai nini Jahowa ma hubani si Musa pakon hubani si Aron, i bona ni Dolog Hor, bani parbalogan ni tanoh Edom,

24“Patumpuon ma anggo si Aron hubani bangsani, seng bulih ia masuk hu tanoh, na dob Hubere bani halak Israel, halani na ilanggar hanima hatang-Ku i lambung ni Bah Meriba.

25Arahkon ma si Aron pakon si Eleasar, anakni ai, anjaha bobanon ma sidea tangkog hu Dolog Hor;

26tanggali ma pakeanni ai humbani si Aron, anjaha sorungkon ma ai hubani si Eleasar, anakni ai; patumpuon ma si Aron hubani bangsani anjaha matei ijai.”

27Jadi ibahen si Musa ma songon na tinonahkon ni Jahowa, tangkog ma sidea hu Dolog Hor, ituludkon ganup na sakuria ai.

28Dob ai itanggali si Musa ma pakean ai humbani si Aron, anjaha isorungkon ma ai hubani si Eleasar, anakni ai; jadi matei ijai ma si Aron i pakpak ni dolog ai. Dob ai tuad ma si Musa pakon si Eleasar hun dolog ai.

29Jadi dob ididah ganup kuria ai na dob matei do hape si Aron, gabe itangisi ganup ginompar ni halak Israel ma si Aron, tolu puluh ari dokahni.



 <<  Bilangan 20 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel Single Panel