Aturan Partongahjabuan ni Boru Panean
1Dob ai roh ma hun dohor kopala ni mar sasaompung humbani ginompar ni halak Gilead, anak ni si Makir, anak ni si Manase, ai ma humbani ginompar ni si Josep, anjaha marsahap ma sidea i lobei ni si Musa pakon i lobei ni sagala kopala pambobai ni halak Israel mar sasaompung,
2nini sidea ma, “Domma martonah Jahowa hubani tuannami, ase iberehon tanoh in hubani halak Israel pakon parbagianan marhitei ruji-ruji; anjaha domma itonahkon Jahowa hinan hubani tuannami, ase iberehon parbagianan ni si Zelofat, saninanami ondi hubani boruni.
3Tapi anggo laho sidea hubani sada halak humbani marga ni halak Israel na legan ai, gabe habuatan ma parbagianan ni sidea humbani parbagianan ni ompungnami, anjaha itambahkon hubani parbagianan ni marga halahoanni ai, gabe moru ma parbagianannami mangirikkon ruji-ruji hinan.
4Anjaha anggo masa ma tahun parolob-oloban bani halak Israel, jadi tambahonkonni ma parbagianan ni sidea hubani marga halahoan ni sidea ai, jadi moru ma humbani parbagianan ni marga ni ompungnami parbagianan ni sidea.”
5Dob ai nini si Musa ma hubani halak Israel, romban hubani hata ni Jahowa, “Sintong do hata ni halak marga Josep ai.
6On do hata na tinonahkon ni Jahowa pasal boru ni si Zelofehad, ʻBulih do sidea laho hubani ise harosuh ni uhurni, tapi maningon hubani hasoman samarga ni bapa ni sidea do sidea laho,
7ase ulang habuatan parbagianan ni halak Israel humbani marga na sada hubani marga na legan; ai ganup halak Israel maningon bani do longkot parbagianan ni marga ni ompungni.ʼ
8Ase ganup boru na manean parbagianan humbani marga ni halak Israel, maningon laho do ia hubani sada halak humbani ginompar ni bapa ni sidea, ase ganup halak Israel boi manean parbagianan ni bapani,
9ase seng habuatan parbagianan ni marga na sada hubani marga na legan; maningon ganup do halak Israel longkot bani parbagiananni bei.
10Romban hubani na tinonahkon ni Jahowa hubani si Musa, sonai do ibahen boru ni si Zelofehat,
11ai laho do si Mahala, si Tirsa, si Hogla, si Milka pakon si Noah, boru ni si Zelofehat ai hubani anak ni bapanggi ni sidea.
12Laho do sidea tongon hubani ginompar ni si Manase, anak ni si Josep, jadi totap ma parbagianan ni sidea ai bani ginompar ni bapani.”
13Ai ma ganup tonah pakon aturan, na tinonahkon ni Jahowa marhitei si Musa hubani halak Israel i pamah Moab, i lambung ni Jordan, tontang ni Jeriko.
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel