Tugah-tugah ni Sada Malekat hubani si Daniel Pasal Hasosakan na Sihol Masa bani Bangsani
1Patolu-tahunkon dob raja si Kores, raja ni Persia, roh ma sada hata pangungkabon hubani si Daniel, na margoran homa si Beltsasar. Sintong do hata ai, anjaha pasal hasunsahan banggal do ai. Iparuhurhon si Daniel ma ai, gabe iarusi ma pangungkabon ai.
2Bani panorang ai, ahu si Daniel, marhoru do tolu minggu dokahni.
3Seng mangan sipanganon na mantin ahu, gulei atap anggur pe seng montas hun pamanganku, anjaha tongon seng huminaki diringku paima salpu na tolu minggu ai.
4Bani ari dua puluh ompat bulan sada, sanggah bani topi ni bah banggal ai ahu, ai ma Bah Hidekel,
5mangkawah ma ahu, anjaha tonggor ma, huidah do sada dalahi na marpakeian linnen, anjaha margondit omas do ia bani binongeini.
6Ia badanni songon batu intan Tarsis do, bohini songon rupa ni hilap, matani songon rigapan na gara, tanganni pakon naheini marsinalsal songon tombaga na niogos, anjaha sora ni hatani songon sora ni jolma na mabuei.
7Pitah ahu do, si Daniel, na mangidah pangungkabon ai; ia dalahi na i lambungku seng ididah sidea pangungkabon ai; tapi tarsonggot tumang do sidea, gabe maporus ma sidea laho marponop.
8Jadi tading ma sahalak ahu, anjaha huidah do pangungkabon banggal ai: Seng dong be gogoh tading ibagas ahu, mubah do minar ni bohingku gabe marposi, anjaha seng be margolle ahu.
9Dob ai hubogei ma sora ni hatani; anjaha dob hubogei sora ni hatani ai, gabe tarhatos ma ahu, dabuh tangkob hu tanoh.
10Jadi tonggor ma, roh ma sada tangan manjamah ahu, gabe iurupi ma ahu manungkol diringku marhitei towod ampa tanganku.
11Nini ma hu bangku, “Ale Daniel, na hinaholongan ni Naibata, paruhurhon ma hata na sihol hatahononku bam; jongjong ma, ai na sinuruh do ahu sonari marayak ho.” Sanggah na hinatahonni ai hata ai bangku jongjong ma ahu, hitir-hitir.
12Dob ai nini ma hu bangku, “Ulang ho mabiar, ale Daniel, ai humbani ari na parlobei sanggah na isurahon ho sihol arusanmu ai anjaha ipaunduk ho uhurmu i lobei ni Naibatamu, domma itangihon hatamai, anjaha halani hatamai do ase roh ahu.
13Roh do malekat ni harajaon Persia manlawan ahu dua puluh sada ari dokahni; tapi tonggor ma, roh ma si Mikael, sada humbani kopala ni malekat ai, mangurupi ahu, jadi hupaturut ma ia manlawan malekat ni harajaon Persia ai.
14Roh do ahu sonari hubam laho pabotohkon bam pasal aha na sihol masa bani bangsamu bani ujung ni panorang; ai marhahonaan bani ari magira do pangungkabon ai.”
15Sanggah na hinatahonni ai hata ai bangku, hupaunduk ma bohingku dompak tanoh, anjaha sip do ahu.
16Jadi tonggor ma, roh ma sada na usih bani rupa ni jolma manjamah bibirhu. Jadi hubuha ma pamanganku anjaha huhatahon ma bani na jongjong i lobeihu, “Ham Tuan, boritan do ahu halani pangungkabon na roh bangku ai, anjaha seng be margogoh ahu.
17Sonaha ma pambahen ni juakjuak ni Tuanku marsahap pakon Tuanku; ai seng be margogoh ahu sonari, anjaha seng dong be hosah bangku?”
18Jadi ijamah parrupa na songon jolma ai ma ahu, anjaha ipargogohi ma ahu.
19Nini ma, “Ulang ho mabiar, ale hinaholongan ni Naibata! Damei ma bam, tenger ma uhurmu anjaha margogoh ma!” Jadi sanggah na marsahap ai ia bangku, margogoh ma ahu anjaha ningku ma, “Marsahap ma Tuanku, ai domma ipargogohi ham ahu.”
20Jadi nini ma, “Ai ibotoh ho ma aha halani ase roh ahu bam? Sonari sihol mulak ma ahu laho marporang dompak malekat ni Persia; anjaha dob salosei ai roh ma malekat ni Tanoh Gorik.
21Anjaha ise pe lang adong hasomanku laho mangimbang sidea ai, sobali si Mikael, malekatnima ai.”
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel