Alkitab Mobile SABDA
[VER] : [SIMALUNGUN]     [PL]  [PB] 
 <<  Daniel 2 >> 

Nipi ni Raja Nebukadnesar Pasal Harajaon Dunia na Ompat ai

1Bani tahun paduahon, dob gabe raja si Nebukadnesar, marnipi ma si Nebukadnesar; rusak tumang do uhurni, gabe lang ra tarpodom be ia.

2Jadi ihatahon raja ai ma mandilo sagala na pentar-pentar, sipartondung, datu-datu ampa halak Kasdim, laho patugahkon bani raja ai pasal nipini ai. Ase roh ma sidea anjaha jongjong i lobei ni raja ai.

3Nini raja ai ma dompak sidea, “Marnipi do ahu, tarsonggot tumang uhurhu, sihol do botohonku pasal nipi ai.”

4Jadi nini halak Kasdim ai ma dompak raja ai, “Sai manggoluh ma ham rajanami. Pajojor ham ma nipi ai bani juakjuakmu, ase ipatugah hanami aha artini ai.”

5Nini raja ai ma mambalosi halak Kasdim ai, “On do hatangku bannima, anggo seng ipatugah hanima bangku nipi ai pakon artini, maningon toktokon do hanima, anjaha rumahnima ai gabe ianan ni tompoh-tompoh do bahenon.

6Tapi anggo ipatugah hanima nipi ai pakon artini, jaloonnima do humbangku sibere-bere, upah ampa hasangapon banggal. Halani ai patugah hanima ma bangku nipi ai pakon artini.”

7Ibalosi sidea ma ia paduahalihon, “Ipatugah raja in ma nipi ai bani juakjuakni, ase ipatugah hanami artini ai.”

8Nini raja ai ma mambalosi, “Torang do hubotoh, na paganjang-ganjang panorang do hanima, halani domma ibotoh hanima haputusan na dob hubahen.

9Ai ma anggo seng tarpatugah hanima bangku nipi ai, sada mando uhuman sipadalanon bannima. Marsada ni uhur do hanima laho mangkatahon hata ladung ampa sipaoto-oto bangku, paima marubah panorang. Patugah hanima ma bangku nipi ai, ase hubotoh atap na boi do tarpatorang hanima bangku arti ni nipi ai.”

10Nini halak Kasdim ai ma mambalosi raja ai, “Seng dong jolma i atas ni tanoh on, na tarbahen pasaudkon pangindoan ni raja in, anjaha seng ongga adong raja, na timbul atap na markuasa pe, na mangindo sisonai ai humbani na pentar-pentar, sipartondung atap humbani halak Kasdim pe.

11Pangindoan ni raja in na maholtu do in, anjaha ise pe lang na boi patorangkon in bani raja in sobali naibata-naibata, na so marianan i tongah-tongah ni jolma.”

12Gabe manggila tumang ma raja ai marhalanihon ni ai, isuruh ma bunuhon sagala na pentar na i huta Babel.

13Jadi mardalan ma parentah ai, maningon bunuhon sagala halak na pentar; ipindahi sidea ma homa si Daniel pakon hasoman-hasomanni ai laho mambunuh sidea.

14Jadi marbalos ma si Daniel ibagas torang ni uhur ampa hapentaran hubani si Ariok, kopala ni pangawal ni raja ai, na dob luar, laho mamunuh sagala halak na pentar, na adong i Babel,

15nini ma hubani si Ariok, puanglima ni raja ai, “Mase ma sonin koras ni parentah ni raja in?” Jadi ipatugah si Ariok ma pasal ai hubani si Daniel.

16Jadi masuk ma si Daniel, ielek-elek ma raja ai, ase ibere panorang bani, andohar boi ia patugahkon arti ni nipi ai bani raja ai.

17Dob ai mulak ma si Daniel hu rumahni, anjaha ipatugah ma na masa ai bani hasomanni si Hananya, si Misael, ampa si Asarya,

18anjaha ihatahon ma sidea mangindo idop ni uhur humbani Naibata na i surga pasal rusia ai, andohar ulang hona bunuh si Daniel pakon hasomanni ai rap ampa halak na pentar ai, na adong i Babel.

19Jadi talar ma rusia ai bani si Daniel marhitei panonggoran sanggah borngin. Jadi ipuji si Daniel ma Naibata na i surga.

20Nini si Daniel ma, “Pinuji ma goran ni Naibata sadokah ni dokahni, ai Ia do simada hapentaran pakon hagogohon.

21Ia do na paubah panorang ampa musim; Ia do na paturun raja-raja ampa na pabangkitkon; Ia do sibere hapentaran bani halak na pentar ampa habotohon hubani halak na maruhur.

22Ia do na patalarhon na bagas pakon na ponop; ibotoh do atap aha ibagas na golap, anjaha Bani do marianan na lihar ai.

23Bamu do, Ham, Naibata ni ompungku, hupadas tarima kasih ampa puji-pujian; ai ibere Ham do bangku hapentaran ampa hagogohon, anjaha ipatugah Ham do bangku nuan, aha na ipindo hanami hun Bamu, ai ipabotohkon Ham do bennami na pinindo ni raja ai.”

24Dob ai laho ma si Daniel marayak si Ariok, na dob pinarentahkon ni raja ai, laho mamunuh sagala na pentar na i Babel, nini ma dompaksi, “Ulang ma bunuh ham sagala na pentar na adong i Babel; boan ham ma ahu hu lobei ni raja in, ase hupatugah arti ni nipi ai bani raja in.”

25Jadi tarolos ma si Ariok mamboan si Daniel hu lobei ni raja ai, nini ma hu bani, “Domma jumpah ahu sada halak humbani halak Jahudi na tarbuang in, na boi patugahkon arti ni nipi ai hu bani raja in.”

26Nini raja ai ma dompak si Daniel, na margoran homa si Beltsasar, “Boi do tongon patugahonmu bangku nipi na huidah ai pakon arti ni ai?”

27Nini si Daniel ma mambalosi raja ai, “Ia rusia, na sinungkun ni raja in, seng dong na boi patorangkon ai bani raja in, age halak na pentar, age datu-datu, age partondung atap sibotoh parhalaan pe.

28Tapi adong do Naibata i surga, Sipatalar rusia; Ia do na patugahkon bani Raja Nebukadnesar atap aha na sihol masa. Ia nipi ampa panonggoran, na nididahmu bani podomanmu, on do ai:

29Roh do bamu ale rajanami, sanggah na modom ham bani podomanmu, pingkiran pasal atap aha do na sihol masa; jadi roh ma Sipatalar rusia ai pabotohkon bamu, atap aha na sihol masa.

30Jadi hu bangku ma ipatalar rusia ai, sedo halani na pentaran ahu marimbang sagala halak na manggoluh, tapi ase talar do bani raja in pasal artini ai, anjaha ase ibotoh ham pingkiran na marhusor ibagas uhurmu.

31Marpanonggoran do ham, ale rajanami, anjaha ididah ham do sada gana-gana. Ia gana-gana ai, banggal sahalian do anjaha marsinalsal tumang, jongjong do ai i lobeimu anjaha majangin do idahon.

32Ulu ni gana-gana ai humbani omas pitah do, tontonni pakon botokanni humbani pirak, boltokni pakon binongeini humbani tombaga,

33hae-haeni humbani bosi, anjaha naheini deba humbani bosi, deba humbani tanoh liat.

34Sanggah ikawahkon ham ope ia, ididah ham ma mungkit sada batu hun babou, na so niungkit ni tangan ni jolma, jadi ijombai ma gana-gana ai tontang ni naheini na humbani bosi ampa tanoh liat ai, lanjar maropuk do ai ibahen.

35Ia bosi, tanoh liat, tombaga, pirak ampa omas ai, maropuk do ai haganup, gabe doskon lamlam hinabangkon ni logou hun pardogeian; seng dong jumpah be iananni. Tapi batu na manjombai gana-gana ai, gabe dolog batu na banggal do ai, anjaha igoki do sab dunia on.

36Ai ma nipi ai, sonari patugahonnami ma bani raja in artini ai.

37Ham rajanami, raja ni raja-raja, haondosan ni harajaon, hagogohon, kuasa ampa hamuliaon ibahen Naibata na i surga,

38anjaha hadasan ni jolma manisia ipabangkit Naibata, binatang na i talun ampa manuk-manuk na i awang-awang, atap ija pe ai marianan, ham na niangkatni manrajai haganup, ham do ulu omas ai.

39Dob salpu ham roh ma sada harajaon na legan, toruhan marimbang ham; dob ai harajaon na patoluhon, na humbani tombaga, na manggomgom haganup tanoh on.

40Ia harajaon na paompatkon ai, toguh do songon bosi; songon bosi, na manropuki anjaha na manrosaki haganup, sonai do ropukonni anjaha rosakanni haganupan ai.

41Ia nahei pakon jari-jari ni nahei na nididahmu ai, deba humbani tanoh liat, deba nari humbani bosi, tugah-tugah ni harajaon na binagi do ai; tapi deba humbani hatoguhon ni bosi ai tading do ibagas ai, usih songon na nididahmu bosi marsaor pakon tanoh liat ai.

42Songon jari-jari ni nahei ai, deba humbani bosi, deba nari humbani tanoh liat, sonai do harajaon ai, deba togap, deba rampok.

43Songon na nididahmu ai bosi marsaor tanoh liat, sonai do marsipadomuan sidea marhitei na marsibuatan boru, tapi seng anjai marsada sidea, usih songon bosi na so boi sada pakon tanoh liat ai.

44Tapi bani panorang ni raja-raja ai, pajongjongon ni Naibata na i surga ai ma sada harajaon, na so tarpatunduk ronsi sadokah ni dokahni, anjaha kuasa-Ni ai pe seng padason ai bani bangsa na legan; ropukan-Ni do sagala harajaon ai anjaha boiskonon-Ni do ai, tapi totap do anggo ai ronsi sadokah ni dokahni,

45ai ma usih songon nididahmu ai, mabungkar batu ai hun dolog ai, na so niungkit ni tangan ni jolma, gabe iropuki bosi, tombaga, tanoh liat, pirak pakon omas ai. Naibata na banggal ai do na pabotohkon bani raja in, atap aha na sihol masa. Ia nipi ai sintong do ai, anjaha sintong do homa artini ai.”

46Dob ai manrogop ma Raja Nebukadnesar, marsombah hubani si Daniel, anjaha iparentahkon ma mamboan galangan ampa na misbou bani.

47Nini raja ai ma hubani si Daniel, “Tongon, Naibatamu do Naibata ni sagala naibata, anjaha Tuhan ni sagala raja-raja, Sipatalar sagala rusia; ai ham do na boi patalar rusia on.”

48Jadi ipatimbul raja ai ma si Daniel, ibere do hubani buei sibere-bere na banggal-banggal, anjaha ipabangkit do ia gabe panrajai i propinsi Babel ampa gabe kopala ni sagala halak na pentar na adong i Babel.

49Anjaha ipabangkit raja ai do homa si Sadrak, si Mesak ampa si Abednego halani pangindoan ni si Daniel, gabe wakilni manggomgom propinsi Babel. Totap do anggo si Daniel i rumah bolon ai.



 <<  Daniel 2 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel Single Panel