Ipaulgap si Ester Partahi-tahion ni Si Haman
1Jadi dob roh raja ai pakon si Haman, laho marmangan-mangan hubani si Ester, puang-bolon ai,
2nini raja ai ma homa dompak si Ester bani ari paduahon ai, sanggah na minum anggur ai sidea, “Aha do na pinangindomu, ale Puangbolon Ester? Sai bereonku do ai bam. Aha do tongon sura-sura ni uhurmu? Ronsi satongah ni harajaonku, sai na pasaudon do ai!”
3Dob ai nini Puangbolon Ester ma mambalosi, “Anggo na tongon do jumpahan idop ni uhur ahu i lobeimu, ale rajanami, anjaha anggo dear uhur ni raja in, mahua pagoluh ham ma hosahku romban hubani pangindoanku, sonai homa bangsangku romban hubani elek-elekku.
4Ai domma tarjual hanami, ahu pakon bangsangku, ase boisonkon, bunuhon ampa parnalangonkon. Ambit porini tarjual hanami pitah songon jabolon dalahi atap jabolon naboru, sai na pasiponku do ai; ai seng marnidok ope siandungonnami ai, laho manunsahi raja in marhalanihon ni ai.”
5Dob ai nini Raja Ahasveros ma dompak Puangbolon Ester, “Ai ise ma ai anjaha ija ma ia, na marsura-sura mambahen na sonai ibagas uhurni?”
6Ibalosi si Ester ma, “Imbang anjaha munsuh ai? Si Haman, na jahat on do.” Dob ai malitonduy ma si Haman i lobei ni raja ai ampa i lobei ni puangbolon ai.
7Jongjong ma raja ai ibagas ringisni humbani na minum anggur ai, lanjar laho ma ia hu pohon na i lambung ni rumah ai. Tapi torus jongjong do si Haman mangindohon hubani Puangbolon Ester andohar ipagoluh hosahni, ai domma torang ididah, na dob iputuskon raja ai pasogopkon hamagouan bani.
Targantung si Haman
8Dob ai sanggah mulak raja ai hun pohon na i lambung ni rumah ai hubagas rumah parminuman anggur ai, ijombahon si Haman ma dirini tudu hu atas bantal hundulan ni si Ester, gabe ihatahon raja ai ma, “Sihol do homa hape butakanni puangbolon in i lambungku, ibagas rumahku sandiri?” Dob luar hata ai humbani pamangan ni raja ai, mintor irongkop sidea ma bohi ni si Haman.
9Dob ai nini si Harbona ma, sada halak humbani juakjuak, na marugas bani raja ai, “Ambahni ai, tiang na pinasirsir ni si Haman bani si Mordahai, na mambahen maluah raja in marhitei hatani, domma homa ipajongjong ibagas rumah ni si Haman, lima puluh asta gijangni.” Dob ai nini raja ai ma, “Gantungkon hanima ma ia hujai!”
10Jadi igantungkon sidea ma si Haman bani tiang na dob pinajongjongni hinan bani si Mordahai. Dob ai mahombun ma ringis ni raja ai.
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel