Alkitab Mobile SABDA
[VER] : [SIMALUNGUN]     [PL]  [PB] 
 <<  Ezra 6 >> 

1Dob ai iparentahkon Raja Darius ma, ase ibahen pamareksaan i Babel, i rumah arsip, ianan panimpanan ni surat-surat pardingatan,

2jadi jumpah ma i Akmeta, i benteng na i tanoh Madai, sada surat na margulung, sonon do hata na tarsurat ijai,

3“Bani tahun parlobei ni panrajaion ni Raja Kores, iparentahkon Raja Kores ma pasal rumah ni Naibata na i Jerusalem. Maningon pajongjongon do rumah panumbahan ai use bani iananni, bahen panggalangan ni galangan sisayaton pakon galangan situtungon; onom puluh asta do bahenon gijangni anjaha onom puluh asta ia bolagni;

4marbatu na binarbar tolu ristei anjaha hayu sanristei; harugian hujai hun kas harajaon do buaton.

5Ambahni ai homa parugas omas pakon pirak na hun rumah ni Naibata hinan, na binuat ni si Nebukadnesar hun rumah panumbahan na i Jerusalem, anjaha binobanni hu Babel, maningon paulakon do, pasuangon hu rumah panumbahan na i Jerusalem, hubani iananni hinan; maningon hu rumah ni Naibata do ai nahkonon.

6Halani ai, ham alo Tatnai, panrajai i tanoh, na i dipar ni bah banggal, pakon si Setarbosnai, na i dipar ni bah banggal, padaoh ma dirimu hunjai;

7paturut ma mardalan horja na bani rumah panumbahan ai; paturut ma panrajai ni Juda pakon pangintuai ni halak Juda pajongjongkon rumah ni Naibata bani hajongjonganni hinan.

8Ambahni ai domma huparentahkon pasal sibahenon nasiam hubani pangintuai ni halak Juda, laho pajongjongkon rumah ni Naibata; harugian hujai, sigalaron hubani halak ai, gok ma anjaha seng mutir-mutir, buaton humbani arta ni harajaon, ai ma humbani pandapotan ni nagori, na i dipar ni bah banggal.

9Anjaha atap aha na porlu: Lombu poso-poso, biribiri tunggal, anak ni biribiri sigalangkonon bani Naibata sigomgom langit, gandum, garam, anggur atap minak, sibereon ma ai hubani sidea domu hubani pangkatahon ni malim na i Jerusalem, siap arian, ulang marnarotap,

10ase tarbahen sidea manggalangkon galangan na misbou bani Naibata sigomgom langit, lanjar mangindo parhorasan bani raja in ampa bani anakni.

11Ambahni ai on ope parentah humbangku; atap ise na mangubah haputusan on, maningon buaton ma sada tiang humbani rumahni, anjaha hujai ma ia gantungkononni, anjaha rumahni ai gabe panimbunan ni tompoh-tompoh bahenon.

12Tapi anggo Naibata, na mambahen jonam goran-Ni ijai, sai ipantunggalingkon ma raja atap bangsa, na pag mardas tangan, laho mangubah atap parseda rumah ni Naibata na i Jerusalem. Ahu, Raja Darius do na mambahen parentah on; podas ma ipasaud on.”

Pardob ni Horja ai; Pamongkoton pakon Pesta Paskah na Parlobei

13Jadi podas ma ipasaud si Tatnai, panrajai na i dipar ni bah banggal, pakon si Setarbosnai ampa hasoman ni sidea parentah ai, romban hubani hata, na hinatahon ni Raja Darius.

14Jadi mintor itoruskon pangintuai ni halak Juda ma pajongjongkon ai, anjaha dob ma, romban hubani hata ni Nabi Haggai pakon Sakaria, anak ni si Iddo. Dob do ibahen sidea horja ai, romban hubani hata ni Naibata ni Israel, romban hubani parentah ni si Kores pakon si Darius ampa si Artasasta, raja ni Persia.

15Jadi dob ma rumah panumbahan ai ari tolu bulan Adar, paonom-tahunkon dob manrajai Raja Darius.

16Dob ai marpesta ma halak Israel, malim, halak Levi, ampa halak na legan, na mulak hun habuangan, laho mangondoskon rumah panumbahan ai hubani Naibata marhasoman malas ni uhur.

17Sanggah na mangondoskon rumah panumbahan ai sidea bani Naibata, igalangkon sidea ma saratus lombu tunggal, dua ratus biribiri tunggal, ompat ratus anak ni biribiri, anjaha sapuluh dua hambing tunggal bahen galangan pardousaon, mangihutkon bilangan ni marga ni halak Israel.

18Anjaha iranggi sidea ma malim ai mangihutkon horin ni sidea, anjaha halak Levi ai mangihutkon horin ni sidea hubani horja parsombahon bani Jahowa i Jerusalem, romban hubani na tarsurat ibagas buku ni si Musa.

19Anjaha bani ari sapuluh ompat bulan sada marpesta Paskah ma halak na mulak hun habuangan ai.

20Ai domma iuras malim pakon halak Levi diri ni sidea bei; ganup do sidea pansing. Jadi isayat sidea ma biribiri Paskah ai hubani ganup halak na mulak hun habuangan ai, hubani sanina ni sidea, malim ai, ampa hubani sidea sandiri.

21Jadi ipangan halak Israel, na mulak hun habuangan ai ma ai, sonai homa ganup halak na papulig dirini humbani habutakon ni bangsa sipajuh begu-begu, na i nagori ai, laho manombah Jahowa, Naibata ni Israel.

22Anjaha marpesta ruti na so niigaran ma sidea pitu ari dokahni marhasoman malas ni uhur; ai domma ipasurdung Jahowa uhur ni raja Assur dompak sidea, gabe itumpaki sidea ibagas horja bani rumah ni Naibata, ai ma Naibata ni Israel.”



 <<  Ezra 6 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
© 2010-2021
Alkitab.SABDA.org

Android.SABDA.org
SABDA.mobi
Bantuan
Single Panel

Laporan Masalah/Saran