Parbangkit ni si Gideon Gabe Panguhum
1Dob ai ihorjahon halak Israel ma sogam ni uhur ni Jahowa, gabe iondoskon Jahowa ma sidea hu tangan ni halak Midian, pitu tahun dokahni.
2Halani parah ni pangodoh ni tangan ni halak Midian bani halak Israel, gabe ibahen sidea ma bani sidea parlingodan i dolog, i liang pakon i huta na marbatar-batar dompak halak Midian.
3Ai martidahkonsi halak Israel mintor roh do halak Midian, Amalek pakon halak na hun hapoltakan manosak sidea.
4Ibahen ma parlampolampoanni i tongah-tongah ni sidea, anjaha iagou gogoh ni tanoh ai das hu Gaza, anjaha seng dong itebai sipanganon bani halak Israel, age biribiri, lombu atap halode pe.
5Ai roh do sidea tangkog rap pakon pinahanni ampa lampolamponi, anjaha parrohni ai marbuei-buei do songon balang; seng tarhira buei ni sidea pakon unta ni sidea; roh do sidea laho mansedahon.
6Jadi musil tumang ma halak Israel halani halak Midian ai. Jadi doruh-doruh ma halak Israel hubani Jahowa.
7Dobkonsi doruh-doruh halak Israel bani Jahowa halani halak Midian ai,
8jadi isuruh Jahowa ma sahalak nabi marayak halak Israel, nini ma dompak sidea, “Sonon do hata ni Jahowa, Naibata ni Israel, ʻAhu do na patangkog hanima hun tanoh Masir, anjaha na paluarhon hanima hun rumah parjabolonan;
9Ahu do na paluahkon hanima hun tangan ni halak Masir pakon hun tangan ni ganup halak na mangkilang hanima, Huusir do sidea hun lobei-lobeinima, anjaha Huberehon tanoh ni sidea hu bennima.ʼ
10Anjaha domma Huhatahon bennima, ʻAhu do Jahowa, Naibatanima, ulang ma sombah hanima naibata ni halak Amori, simada tanoh niianannima, tapi seng itangihon hanima sorang-Ku.ʼ”
11Dob ai roh ma malekat ni Jahowa, anjaha hundul i toruh ni baringin na i Ofra, rupei ni si Joas, halak Abieser, sanggah mardogei gandum si Gideon, anakni ai bani pangilangan anggur, laho mamonopkon ai i lobei ni halak Midian.
12Jadi ipatalar malekat ni Jahowa ma dirini hu bani, anjaha nini ma dompaksi, “Ihasomani Jahowa do ham, ale puanglima na gogoh!
13Nini si Gideon ma hu bani, ʻSantabi, tuannami, anggo ihasomani Jahowa do hanami, mase ma mangonai ganupan on bennami?ʼ Ija do sagala halongangan, na binaritahon ni ompungnami hu bennami, sanggah na hinatahon ni sidea, ʻAi lang Jahowa do na patangkog hita hun Masir?ʼ Tapi sonari domma ibuangkon Jahowa hanami anjaha iondoskon do hanami hu tangan ni halak Midian.
14Dob ai idompakkon Jahowa ma ia, anjaha ihatahon, ʻLaho ma ho ibagas hagogohonmon, paluah ma halak Israel hun tangan ni halak Midian.ʼ Ai lang Ahu do na marsuruh ho?
15Nini ma hu bani, ʻSantabi, tuannami, marhitei aha ma ahu paluahkon halak Israel?ʼ Tonggor ma, hanami na saompung do sietekan bani marga Manase, anjaha ahu do sianggian i rumah ni bapa.
16Nini Jahowa ma hu bani, ʻAhu do mangkasomani ho, halani ai maningon taluhononmu do halak Midian, songon na manaluhon sada halak tumang.ʼ
17Jadi nini ma hu bani, ʻAnggo tongon do dapotan idop ni uhur ahu i lobei-Mu, patuduhkon Ham ma bangku sada tanda, paboa Ham do na marsahap pakon ahu.ʼ
18Ulang ma misir Ham hunjon, paima mulak ahu Bamu, mamboan galangan sigalangkononku i lobei-Mu. Jadi nini ma, ʻIjon pe Ahu paima mulak ho.ʼ”
19Dob ai masuk ma si Gideon, anjaha ihoseihon ma anak ni hambing sada pakon ruti na so niigaran humbani saefa nitak; inahkon ma gulei ai hubagas tapongan anjaha kuahni ai hubagas mangkuk, dob ai iboan ma ai hu bani, hu toruh ni baringin ai, anjaha iidangkon.
20Nini malekat ni Naibata ai ma hu bani, “Buat ma gulei in pakon ruti na so niigaran in, nahkon ma in hu atas ni batu on, anjaha useihon ma kuahni ai hu atasni.” Jadi ibahen ma sonai.
21Dob ai ituldukkon malekat ni Jahowa ma tungkot na ibagas tanganni ai, anjaha isinggur ma gulei pakon ruti na so niigaran ai bani ujung ni tungkot ai; kaluar ma apuy hun batu ai mangankon gulei pakon ruti na so niigaran ai; dob ai lingod ma malekat ni Jahowa humbani panonggorni.
22Jadi ibotoh si Gideon ma, malekat ni Jahowa do hape, gabe nini ma, “Ham Tuhan Jahowa! Domma huidah hape malekat ni Jahowa padumpar bohi.
23Tapi nini Jahowa ma hu bani, ʻDamei ma bam! Ulang ho mabiar, seng matei ho.ʼ”
24Dob ai ipajongjong si Gideon ma ijai sada anjapanjap bani Jahowa, anjaha ibahen ma goranni: Jahowa do haluahon. Adong ope anjapanjap ai ronsi sadari on i Ofra, rupei ni halak Abieser ai.
25Bornginni ai nini Jahowa ma hu bani, “Buat ma sada lombu tunggal ni bapamu pakon lombu tunggal paduahon na marumur pitu tahun, parreong ma anjapanjap ni Baal ni bapamu anjaha roboh ma tiang sisombahon na i lambungni ai.
26Dob ai pajongjong ma sada anjapanjap bani Jahowa, Naibatamu i atas ni hubuan ai anjaha atur dear-dear, dob ai buat ma lombu tunggal na paduahon ai anjaha galangkon ma galangan situtungon, sobanni ai ma hayu ni tiang sisombahon sirobohonmai.”
27Dob ai iarahkon si Gideon ma sapuluh halak jabolonni anjaha ibahen ma songon na hinatahon ni Jahowa hu bani. Tapi halani mabiar ia hubani ginompar ni bapani pakon hubani parhuta ai mandalankon ai arian, gabe borngin ma ibahen.
28Dob puho parhuta ai girah sogod, tonggor ma, domma mareong anjapanjap ni Baal ai, domma iroboh tiang sisombahon na i lambungni ai anjaha domma igalangkon lombu tunggal na paduahon i atas ni anjapanjap na pinajongjong ai.
29Dob ai nini sidea ma samah sidea, “Ise do na mambahen on? Dob ipareksa anjaha isungkun, gabe dong ma halak na mangkatahon, ʻSi Gideon, anak ni si Joas do na mambahen in.ʼ
30Jadi nini parhuta ai ma bani si Joas, ʻBoan ma anakmin hudarat; maningon matei ia bunuhon, halani na pinarreongni ai anjapanjap ni Baal, anjaha halani na nirobohni ai tiang sisombahon na i lambungni ai.ʼ
31Tapi nini si Joas ma dompak sagala halak na manginggotisi ai, ʻNasiam ma gakni manlawan mangkopkop Baal? Barang sihol nasiam manolongsi? Barang ise na manlawan mangkopkop Baal, maningon matei sogod on. Anggo naibata do ia, ia ma manlawan mangkopkop dirini, dompak halak na marreongkon anjapanjapni.ʼ
32Jadi bani ari na sada ai, igoran halak ma ia si Jerubbaal, halani nini halak, ʻPaturut ma Baal manlawansi, halani na nireongkonni ai anjapanjap ai.ʼ”
33Haganup halak Midian, pakon halak Amalek ampa halak parhapoltakan roh ma sidea rap, idipari sidea ma Jordan anjaha marsaran ma sidea i habungan Jesreel.
34Jadi isorapi Tonduy ni Jahowa ma si Gideon; isompul ma tarompit mangarahkon halak Abieser mangirikkonsi.
35Isuruh ma homa suruhanni bani ganup marga Manase laho mangarahkon sidea mangirikkonsi. Sonai homa isuruh ma suruhanni hubani halak Asser, Sebulon pakon Naftali, anjaha sidea pe roh ma mangirikkonsi.
36Dob ai nini si Gideon ma dompak Naibata, “Anggo Ham ma tongon na sihol paluahkon halak Israel marhitei tanganku, songon na hinatahon-Mu ai,
37tonggor ma, huherbangkon ma bobak ni biribiri on i pardogeian on. Anggo pitah bobak on do marnamur anjaha horah ganup tanoh na inggot, jadi hubotoh ma, Ham ma tongon na sihol paluahkon halak Israel marhitei tanganku, songon na hinatahon-Mu ai.”
38Jadi jumpah ma sonai, ai dob puho ia patarni ai, iporoh ma bobak ai, gabe dapotsi ma namur gok sada batil.
39Dob ai nini si Gideon ma dompak Naibata, “Ulang ma marringis Ham mangidah ahu, anggo marsahap ahu sahali nari gelah; palopas Ham ma ahu, pitah sahali nari mando, mambahen parlajouan pakon bobak ni biribiri on; pitah bani bobak on ma horah, tapi i atas ni ganup tanoh ai inggot, marnamur.”
40Jadi ibahen Naibata ma sonai bornginni ai; ai pitah bani bobak ai do horah, tapi bani ganup tanoh ai marnamur do.
<< Hakim-hakim 6 >>
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel