Alkitab Mobile SABDA
[VER] : [SIMALUNGUN]     [PL]  [PB] 
 <<  Ibrani 12 >> 

Mangkawah dompak Jesus; Sabar ibagas Parlajouan

1Ase, halani domma songon hombun buei ni saksi manginggoti hita, tadingkon hita ma sagala na paboratkon ampa dousa na manrahuti hita, anjaha marsabar ni uhur ma hita marlintun bani parlumbaan na adong i lobeita.

2Ibagas ai mangkawah ma hita dompak Jesus, sipungkah ampa sidobkon haporsayaon in, na manaronkon parsilang ai, gantih ni malas ni uhur na i lobeini, anjaha seng ihira hailaon ai, gabe hundul i siamun ni paratas ni Naibata.

3Ingat nasiam ma Ia, na manaronkon parlawanon na sonai dompak-Si humbani pardousa, ase ulang marnaloja nasiam, mandolei uhur nasiam.

4Bani paruntolon nasiam mangimbang dousa, seng ongga ope tiris daroh nasiam maruntol.

5Ai domma lupa nasiam bani sipaingat, na hinatahon bani nasiam songon na bani anak, “Ale anakku, ulang ma hampung uhurmu bani pangajarion ni Tuhan in, anjaha ulang ma mandolei anggo ipinsang,

6ai iajar Tuhan in do na hinaholongan ni uhur-Ni, anjaha ilonsing do anak na niain-Ni.

7Sabar ma nasiam, gabe pangajarion do on bani nasiam, ai anak-Ni do nasiam ijai ihira Naibata. Ai ija ma adong anak na so niajar ni bapani?

8Ai anggo seng hona ajar nasiam, songon na dob mangonai ai bani haganup, anak salong-salongan ma nasiam ai, seng anak na botul.

9Ambah ni ai, bapanta pardagingon do sipangajar banta, anjaha mabiar do hita bani sidea; ai lang patut ma lambin marunduk ni uhur hita bani Bapa ni Tonduy, ase manggoluh hita?

10Ai anggo sidea, tongkin do hita iajar domu hubani partimbangan ni sidea, tapi Ia, hubani na marguna banta do, ase parrupei hita bani hapansingon-Ni.

11Sagala pangajaran tongon, sanggah hamamasani seng malas ni uhur, tapi pusok ni uhur do ai ahapkonon, tapi use ihorhon ai do buah hapintoron na marisi damei bani sagala na dob tarlatih ibagas ai.”

Mangkaporluhon Damei ampa Hapansingon; Halani Mardingat Bagah-bagah ai

12Halani ai, pagostong nasiam ma tangan na galek-galek, anjaha patotap nasiam ma towod na hitir-hitir.

13Papintor nasiam ma dalan sidalanan ni nahei nasiam ase ulang puhei nahei na repat in, tapi malum ma namin.

14Porluhon nasiam ma ase mardamei nasiam hubani haganup halak anjaha margoluh na mapansing, halani anggo seng sonai, seng boi idahon ni atap ise Tuhan in.

15Jaga nasiam ma ase ulang adong na liah bani idop ni uhur ni Naibata, ase ulang martumbor urat na paet, na mangkorhon hasunsahan anjaha buei halak butak ibahen.

16Ulang ma adong siparriah-riah atap na marhabutakon songon si Esau, na manjualhon hak sikahanan halani sipanganon na otik.

17Ai ibotoh nasiam do dobni, sanggah na sihol teanonni pasu-pasu ai namin, itulak do ia; ai seng jumpahsi be panorang paubahkon uhur age pe mariluh-iluh ia mangindohon.

18Ia sijumpahkonon nasiam ai sedo na tarjamah, apuy na gajag, barang na golap, barang na lotir, barang haba-haba,

19barang parhata ni tarompit ampa sora ni hata, pala mangelek-elek na mambogeisi, ase ulang hubani sidea ipadompak hata ai;

20ai seng tartahan sidea parentah ai, na mangkatahon, “Age pinahan, anggo dais hu dolog ai, maningon matei do pargijigon.”

21Pala do ihatahon si Musa halani jangin ni na nididahni ai, “Mabiar do ahu anjaha hitir-hitir.”

22Tapi Dolog Sion in do iparayak nasiam ampa huta ni Naibata na manggoluh in, ai ma Jerusalem na i nagori atas ai, ampa malekat na marlaksa-laksa ai, ampa humpulan pesta,

23ampa kuria ni na parlobei tubuh ai, na dob tarsurat i nagori atas, ampa Naibata, siuhum haganup, ampa tonduy ni parpintor na dob gokan dear ai,

24ampa Jesus, Siholang ni parpadanan na baru ampa daroh, na pinispiskon ai, parsora sidearan humbani daroh ni si Abel.

25Jaga ma nasiam, ulang das itulak nasiam Ia, na marsahap in. Ai anggo seng maluah sidea, halani ijua sidea na palumbahon sidea i tanoh on, lambin sonaha ma hita, anggo itundali hita Ia, na hun nagori atas in?

26Tanoh on do idugur sora-Ni ijia, tapi sonari marlumba-lumba do Ia, “Duguron-Ku do sahali nari, seng pitah tanoh on, dihut do nagori atas.”

27Hata na mangkatahon “Sahali nari” patuduhkon na mubah ma na tardugur on, in ma na tinompa on, ase totap na so tardugur ai.

28Halani ai, mangkatahon tarima kasih ma hita, ai ijalo hita do harajaon na so tardugur, anjaha ibagas ai iidangi hita ma Naibata domu hubani rosuh-Ni, marhasoman hormat ampa biar,

29ai apuy na mangankon do Naibatanta.



 <<  Ibrani 12 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel Single Panel