Paraturan domu hubani Goluh Siap Ari
1Dob ai marsahap ma Jahowa hubani si Musa, nini ma,
2Hatahon ma hubani ganup tumpuan ni halak Israel, “Maningon pansing do hanima, ai pansing do Ahu, Jahowa, Naibatanima.
3Ganup hanima maningon mabiar do bani inangni ampa bani bapani anjaha maningon ramotkononnima do ari Sabat-Ku, ai Ahu do Jahowa, Naibatanima.
4Seng bulih dompakkononnima gana-gana anjaha seng bulih paulionnima bennima naibata tuangan, ai Ahu do Jahowa, Naibatanima.
5Anjaha anggo igalangkon hanima galangan pardameian bani Jahowa, maningon sintong do panggalangkononnima ijai, ase gabe harosuh hanima.
6Maningon panganonnima do ai bani ari ai sanggah igalangkon hanima ai ampa patarni ai; anjaha sagala na tading ronsi ari patoluhon maningon tutungon do ai ibagas apuy.
7Anggo ipangan ope hunjai bani ari patoluhon, hagigi do ai, seng tarharosuhkon ai.
8Barang ise na mangankon hunjai, mangonai ma bani hajahatonni ai, halani na binutakanni ai na pinapansing ai bani Jahowa, anjaha maningon rotapkonon do hosahni hun tongah-tongah ni bangsani.
9Anggo ipariamai hanima ladangnima, ulang ma bois ipariamai hanima jumanima das hu duruni, anjaha ulang be ituriangi hanima panabiannima ai.
10Anjaha pohon anggurnima pe ulang ma bois-bois ibuat hanima, anjaha ulang ma tangtangi hanima pohon anggurnima, paturut hanima ma ai bani halak na miskin ampa bani halak panginsolat; Ahu do Jahowa, Naibatanima.
11Seng bulih hanima manangko, barang marladung, barang marsioto-otoan.
12Seng bulih hanima mambijahon na so tongon marhitei goran-Ku, gabe butak ibahen hanima marhitei ai goran ni Naibatanima ai Ahu do Jahowa.
13Seng bulih odoh-odohonmu barang rampokonmu hasomanmu. Upah ni halak siparombou seng bulih tahan-tahanonmu ronsi patarni.
14Seng bulih buraanmu halak na nengel anjaha seng bulih nahkononmu parjombaan i lobei ni halak na mapitung, tapi maningon habiaranmu do Naibatamu, ai Ahu do Jahowa.
15Seng bulih papeolonnima uhum i paruhuman; seng bulih martonggor jumbak, halak na masombuh idoruni, ia halak na sangap iapiti; maningon pintor do panguhummu bani hasomanmu.
16Seng bulih ho manukas-nukasi i tongah-tongah ni bangsamu, anjaha seng bulih ho jongjong marsaksi dompak daroh ni hasomanmu, ai Ahu do Jahowa.
17Seng bulih ho mardomdom bani hasomanmu ibagas uhurmu; maningon pasingatonmu do hasomanmu, ase ulang mardousa ho halani ia.
18Seng bulih balaskononmu na jahat, barang mardomdom ho bani anak ni hasomanmu sabangsa, tapi maningon haholonganmu do hasomanmu jolma doskon dirimu, ai Ahu do Jahowa.
19Maningon ramotkononnima do paraturan-Ku: Seng bulih paturutonmu pinahanmu marboru-boru pakon pinahan na legan masam; seng bulih mardua masam bonih saburhononmu bani jumamu, anjaha seng bulih pakeionmu pakean na pinauli humbani dua masam bonangni.
20Anggo ihasomani sada dalahi modom sada naboru, jabolon ope ia ai, anjaha domma martunangan bani dalahi na legan, tapi lape hona tobus barang ipaluah ia, maningon uhumon do sidea; tapi seng marutang hosah sidea, halani na so maluah ai ope ia.
21Maningon boanon ni dalahi ai do sada biribiri tunggal bani Jahowa hu lobei ni lampolampo partumpuan ai, bahen galangan parsalahan,
22anjaha malim ai na mambahen pardearan bani i lobei ni Jahowa marhitei biribiri tunggal, galangan parsalahan ai, halani dousa na binahenni ai; jadi sasap ma dousa na hinorjahonni ai.
23Ia dob masuk hanima hu tanoh ai, anjaha isuan hanima ijai bagei-bagei ni hayu marbuah na boi sipanganon, bahen hanima ma bani buahni songon na bani sibur-sibur; tolu tahun dokahni songon na marsibur-sibur ma ai hira hanima, seng bulih panganonnima ai.
24Bani tahun paompatkon pansing ma sagala buahni ai, gabe galangan puji-pujian ma ai bani Jahowa.
25Tapi palima-tahunkon bulih ma panganonnima buahni ai, ase lambin tambah buahni bennima. Ahu do Jahowa Naibatanima.
26Seng bulih panganonnima atap aha pe na dob marsaor pakon daroh. Seng bulih horjahononnima partondungon atap panjahaion.
27Seng bulih suhuronnima ulunima lepong inggot, anjaha seng bulih ritiponnima ujung ni gumisnima.
28Seng bulih raokannima angkulanima halani mateian, atap ibahen hanima tanda-tanda bani badannima; Ahu do Jahowa.
29Seng bulih butakanmu borumu marhitei na mangojursi gabe boru jalang, ase ulang gok parriah-riahon tanoh in, anjaha gabe gok hajahaton tanoh in.
30Maningon ramotkononnima do ari Sabat-Ku, anjaha marhabiaran hanima bani ianan-Ku na mapansing in; Ahu do Jahowa.
31Seng bulih dompakkononnima dirinima hubani paniaran barang hubani halak sipartondung, seng bulih sungkunonnima sidea, gabe butak holi hanima marhalanihon ni sidea; Ahu do Jahowa, Naibatanima.
32Maningon jongjong do ho i lobei ni halak na ubanon, anjaha maningon pasangaponmu do halak na matua, anjaha maningon habiaranmu do Naibata; Ahu do Jahowa.
33Anggo manginsolat sada halak dagang i lambungnima, i tanohnima, seng bulih odoh-odohonnima ia.
34Songon sada halak parnagori in i tongah-tongahnima, maningon sonai do age halak panginsolat i tongah-tongahnima; maningon haholonganmu do ia songon dirimu, ai halak dagang do age hanima hinan i tanoh Masir; Ahu Jahowa Naibatanima.
35Seng bulih geduk pandalankonnima bani panguhumion, bani ukuran sibar-sibar, timbangan atap suhat-suhat pe.
36Maningon timbangan na sintong, batu timbangan na sintong, efa na sintong ampa hin na sintong do pakeionnima; Ahu do Jahowa, Naibatanima, na mambobai hanima luar hun tanoh Masir.
37Halani ai ramotkon hanima ma ganup parentah-Ku ampa paraturan-Ku anjaha horjahon hanima ma domu hujai, Ahu do Jahowa.”
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel