Alkitab Mobile SABDA
[VER] : [SIMALUNGUN]     [PL]  [PB] 
 <<  Kejadian 43 >> 

Parbingkat ni Anak ni si Jakob Paduahalihon hu Tanoh Masir Rap pakon si Benjamin

1Lambin parahni ma lohei ai i nagori ai.

2Jadi dob bois ipangan sidea gandum na binoban ni sidea ai hun tanoh Masir, nini bapa ni sidea ma hubani sidea, “Ulaki hanima ma mangaldung banta otik sipanganon.”

3Dob ai nini si Juda ma mambalosisi, “Gomos do hata ni halak ai hu bennami, ʻSeng anjai idahonnima be bohingku, anggo lang odor hanima rap pakon angginima ai.ʼ

4Anggo ipabingkat ham angginami in rap pakon hanami, tuad pe hanami mangaldung sipanganon bamu.

5Tapi anggo lang ipabingkat ham ia, seng tuad hanami, ai domma pala ihatahon halak ai hu bennami, ʻSeng anjai idahonnima be bohingku anggo lang odor hanima rap pakon angginima ai.ʼ”

6Nini si Israel ma, “Mase ma bahenonnima na masambor hu bangku marhitei na patugahkon hubani halak ai, na adong ope angginima in?”

7Nini sidea ma mambalosi, “Sai na isungkuni halak ai do pasal hanami ampa pasal gomparanta, nini do, ʻManggoluh ope bapanima? Adong ope angginima?ʼ Jadi ipatugah hanami ma hu bani haganup sonaha na sabotulni. Sonaha ma pambotohnami, na sihol hatahononni, ʻBoan hanima ma tuad angginima ai?ʼ”

8Nini si Juda ma hubani si Israel, bapani ai, “Palopas ham ma ambia on misir rap pakon ahu, ase laho hanami, ase manggoluh hita, ulang matei, age hanami, age ham, sonai homa anaknami.

9Ahu ma manjamini, hun tanganku ma tungguonmu ia; anggo lang huboban ia bamu, anjaha hupajongjong ia i lobeimu, marsapata hu bangku ma ham lalab.

10Ai ambit lang marabat hanami, domma pala dua hali hanami mulak.”

11Dob ai nini si Israel, bapa ni sidea ai ma hubani sidea, “Anggo na maningon do sonai, bahen hanima ma sonon: Boan hanima ma buah siharganan ni tanoh on ibagas sumpitnima bahen siluahnima hubani halak ai, otik minak na morum, otik manisan, gotah pakon hamonan, pakon buah na legan.

12Dua lompit ma boban hanima duit; boan hanima ma mulak duit na pinaulak hubagas babah ni sumpitnima; ra na lepak do ai.

13Boban hanima ma homa angginima in, misir ma hanima mangulaki marayak halak ai.

14Naibata pargogoh na so tarimbang in ma mangidopi hanima i lobei ni halak ai, ase ilopas mulak saninanima na tading ai ampa si Benjamin. Tapi anggo ahu, songon halak na popor mando ahu.”

Mangulaki Marhoru Anak ni si Jakob

15Ase iboan sidea ma siluah ondi pakon duit lompit dua ampa si Benjamin, dob ai misir ma sidea tuad hu Masir, jadi das ma sidea hu lobei ni si Josep.

16Jadi dob iidah si Josep odor do sidea pakon si Benjamin, nini ma hubani siramotkon rumahni, “Arahkon ma halak ai hu rumah, sayat ma sada pinahan anjaha hoseihon, ai maningon mangan halak ai rap pakon ahu tongah ari on.”

17Ibahen juakjuak ai ma songon na hinatahon ni si Josep, iarahkon ma halak ai hu rumah ni si Josep.

18Mabiar tumang ma halak ai, halani na binoban ai sidea hu rumah ni si Josep. Nini sidea, “Halani duit, na tarihut hubani siboanonta ondi do gatni, mambahen na iarahkon hita hu rumah on, ase adong hitei bani mangimbang ampa mandorab hita, mambahen hita gabe jabolon ampa mambuat halodenta ai.”

19Idohori sidea ma siramotkon rumah ni si Josep ai, iparsahapkon sidea ma ia i labah ni rumah ai,

20nini sidea ma, “Santabi, tuannami, na roh do hanami na baruon mangaldung sipanganon.

21Dob das hanami hu parbornginan, iungkab hanami ma sumpitnami, tonggor ma, ijai do ganup duitnami tampei ibabah ni sumpitni bei. Jadi iboban hanami ma ai mulak,

22anjaha iboan hanami do homa duit na legan, laho mamboli sipanganon. Lang ibotoh hanami atap ise do na mannahkon ai hu siboanonnami.”

23Nini ma mambalosi, “Tenger ma uhur nasiam, ulang nasiam mabiar! Naibata nasiam ampa Naibata ni bapa nasiam do na mannahkon arta na ponop hubagas sumpit nasiam; domma hujalo ia duit nasiam ai.” Dob ai ipadarat ma si Simeon anjaha iboban hubani sidea.

24Iarahkon ma sidea hu rumah ni si Josep, ibere ma bah, ase iburihi sidea nahei ni sidea, ibere ma homa gagaton hubani halode ni sidea.

25Ipasirsir sidea ma sibere-bere ai managam parroh ni si Josep tongah ari, ai domma ibogei sidea na mangan ai sidea ijai.

Hasortaon ni si Josep bani sidea

26Jadi dob roh si Josep hu rumah, iboan sidea ma hubagas, hubani si Josep, sibere-bere na i tangan ni sidea ai, lanjar manrogop ma sidea hu bani, pala das hu tanoh.

27Dob ai isungkun si Josep ma atap na jorgit-jorgit do sidea, nini ope, “Jorgit ope bapanima na matua, na tinarsingatannima ai? Manggoluh ope ia?”

28Nini sidea ma, “Jorgit ope jabolonmu, bapanami ai, manggoluh ope ia.” Dob ai manrogop ma sidea hu bani.

29Mangkawah ma si Josep, iidah ma si Benjamin, anggini ai, hasomanni sainang, nini ma, “On do angginima sianggian ia na tinarsingatannima hu bangku?” Nini ma use, “Idop ma uhur ni Naibata bam, ambia!”

30Dob ai tarolos ma si Josep laho, halani sihol ni uhurni mangidah anggini ai, ipindahi ma iananni tangis; masuk ma ia hu kamarni, tangis ma ia ijai.

31Dob ai isuhapi ma bohini, kaluar ma ia use, iodohkon ma uhurni, nini ma, “Idangkon hanima ma sipanganon in!”

32Jadi iidangkon sidea ma sipanganon ai, pulig hubani si Josep, pulig hubani saninani, anjaha pulig hubani halak Masir na rap mangan pakonsi, halani seng malo halak Masir rap mangan pakon halak Heber, ai pantang do ai bani halak Masir.

33Hundul ma sidea i lobei ni si Josep, sikahanan mangihutkon hasikahanonni, sianggian mangihutkon hasianggianonni, gabe longang bei ma sidea marsinonoan.

34Iangkat siparugas ma sipanganon berean hun lobei ni si Josep, anjaha ibere ma ai hubani sidea; tapi lima hali nasa rupei ni ganup sidea ai do rupei ni si Benjamin. Jadi minum ma sidea anjaha marmalas ni uhur pakonsi.



 <<  Kejadian 43 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel Single Panel