Alkitab Mobile SABDA
[VER] : [SIMALUNGUN]     [PL]  [PB] 
 <<  Lukas 15 >> 

Limbaga Pasal Biri-biri na Magou

1Somal do sijalo sohei ampa sipardousa roh hun dohor hu Bani, laho manangar hata-Ni.

2Jadi marungut-ungut ma halak Parisei ampa sibotoh surat, nini sidea ma, “Ijalo on do sipardousa anjaha rap mangan do Ia pakon sidea.”

3Gabe ihatahon Jesus ma limbaga on bani sidea,

4“Ise ma humbani nasiam sahalak parbiribiri saratus, anggo magou sada hunjai, na so manadingkon na siah puluh siah nari ai i parmahanan, laho mangindahi na so taridah ai, ronsi na jumpahsi ai?

5Anjaha dob jumpahsi, itampeihon ma ai bani abarani halani malas ni uhurni.

6Daskonsi ia hu rumahni, idilo ma martumpu huan-huanni ampa romban rumahni, nini ma bani sidea, ʻMarmalas ni uhur ma nasiam rap pakon ahu, halani jumpah ahu do biribiringku na magou ai.ʼ

7Huhatahon ma bani nasiam, usih hujai, buenan do malas ni uhur i nagori atas mangidah sada pardousa, na ra paubahkon uhurni, ase mangidah siah puluh siah parpintor, na so pala paubahkon uhur ni sidea.”

Limbaga Pasal Duit na Magou

8“Atap dong do nani naboru siparduit sapuluh rupiah, anggo magou sada hunjai, na so pagarahon palita, anjaha manapui rumahni, laho mangindahi duitni na magou ai, paima jumpahsi ai?

9Anjaha dob jumpahsi, idilo ma martumpu huan-huanni ampa romban rumahni, nini ma, ʻMarmalas ni uhur ma nasiam rap pakon ahu, ai domma jumpah ahu duitku na magou ai.ʼ

10Huhatahon ma bani nasiam, usih hujai do masa malas ni uhur i lobei ni malekat ni Naibata mangidah sahalak sipardousa, na paubahkon uhurni.”

Limbaga Pasal Anak na Magou

11Dob ai nini ma use, “Adong ma dua anak ni sada halak.

12Gabe ihatahon sianggian ai ma dompak bapani ai, ʻBapa, bere ham ma bangku humbani arta in, na sahira parbagiananku.ʼ Jadi ibagihon ma artani ai bani sidea.

13Anjaha seng pala piga ari i pudi ni ai, ipatumpu sianggian ai ma haganup parbagiananni ai, dob ai laho ma ia hu nagori na daoh, anjaha ijai ma iparbois-bois artani ai marhitei goluh na so marrantei.

14Dob iboiskon haganupan ai, masa ma lohei maningting i nagori ai, anjaha ia pe mulai ma marhahurangan.

15Jadi laho ma ia tondok bani sada halak parnagori ai, gabe isuruh ma ia marmahan babuy hu jumani.

16Ipindo uhurni do manggoki boltokni bani hulit-kulit ni indahan ni babuy ai, tapi seng dong na mamberesi bani.

17Jadi ipaulak ma uhurni hubagas, nini ma, buei ni in gajian ni bapa, na marlobih-lobih bani sipanganon, hape ahu, matei gayuran do ijon.

18Misir mando ahu marayak bapa, huhatahon ma hu bani, ʻHam bapa, domma mardousa ahu hu nagori atas ampa bamu.

19Seng talup be ahu goranon anakmu, bahen ham ma ahu songon sada halak gajian bamu.ʼ

20Jadi misir ma ia marayak bapani ai. Tapi daoh ope ia, domma itatap bapani ai ia, gabe maidop ma uhurni; marlintun ma ia manjumpahkonsi, irohop ma ia anjaha isummah.

21Marsahap ma anak ai bani, ʻHam bapa, domma mardousa ahu hu nagori atas ampa hu bamu, seng talup be goranon ahu anakmu!ʼ

22Tapi nini bapa ai ma dompak jabolonni, ʻBoan hanima ma pakeian sijengesan, anjaha pakeihon hanima ma ai bani! Bahen hanima ma sada tintin bani jari-jarini ampa sipatu bani naheini!

23Alop hanima ma anak ni lombu na pinamombur ai, anjaha sayat ma, ase mangan hita anjaha marmalas ni uhur.

24Ai na dob matei do anakkon gabe mulak manggoluh, na dob magou do ia, gabe jumpah use.ʼ Jadi marmalas ni uhur ma sidea.

25Tapi i juma do anak ni sikahanan ai. Jadi rohkonsi ia hun dohor hu rumah, ibogei ma sora ni musik ampa na manortor.

26Gabe idilo ma sahalak humbani jabolon ai, ipapangkei ma atap aha do na masa.

27Jadi nini ma hu bani, ʻDomma roh anggimu, jadi isayat bapanta do lombu pinamombur ai, halani jorgit do ia mulak.ʼ

28Jadi marah ma ia, anjaha seng ra roh hu rumah, gabe roh ma bapani mangajar-ajarisi.

29Tapi nini ma mambalosi bapani ai, ʻMartahun-tahun ma ahu mambalosi ham, anjaha seng ongga hulanggar parentahmu. Tapi anak ni hambing pe lang ongga ibere ham bangku, ase marmalas ni uhur ahu ampa huan-huanku.

30Hape rohkonsi anakmu, na mamboiskon artamu rap pakon boru jalang, gabe isayat ham do anak ni lombu na pinamombur in.ʼ

31Jadi nini ma hu bani, ʻAmbia, tongtong do ho rap pakon ahu, anjaha haganup na dong bangku in, ho do simadasi.

32Tapi patut do hita marmalas ni uhur anjaha marmegah-megah, ai na dob matei do anggimon gabe manggoluh, anjaha na dob magou do ia, gabe jumpah.” ʼ



 <<  Lukas 15 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel Single Panel