Limbaga Pasal Sijolom Anakkunsi na Geduk
1Ihatahon ope homa bani susian-Ni ai, “Adong ma sada halak na bayak, anjaha adong do sada sijolom anakkunsi bani. Tarbogei ma hu bani, na iparbois-bois sijolom anakkunsi ai do artani.
2Jadi idilo ma ia, nini ma hu bani, ʻAha do in, na hutangar pasal ho? Patuduh ma paretongan ni na hinorjahonmu! Ai seng tarbahen be ho sijolom anakkunsi.ʼ
3Jadi marpingkir ma sijolom anakkunsi ai ibagas uhurni, ʻAha ma sibahenonku, ai lopaskonon ni tuanku mando ahu humbani horjangku? Manangkul seng dong gogohku, mangindo-indo mela do ahu.
4On ma tene sibahenonku, ase ijalo sidea ahu hu rumah ni sidea, anggo lopas ahu humbani horjangkai.ʼ
5Jadi sada-sada ma idilo sagala paridouan ni tuanni ai hu lobeini, nini ma hubani na parlobei roh ai, ʻSadiha utangmu bani tuanta?ʼ
6Balosni, ʻSaratus gusi minak.ʼ Jadi nini ma hu bani, ʻOn ma surat ni utangmu, podaskon hundul anjaha suratkon ma lima puluh!ʼ
7Bani na legan use ihatahon, ʻIa ho, sadiha do utangmu?ʼ Nini ma, ʻSaratus sumpit omei.ʼ Ihatahon ma hu bani, ʻOn ma surat ni utangmu, suratkon ma ualuh puluh!ʼ
8Jadi ipuji tuan ai ma sijolom anakkunsi paruhur na geduk ai, halani pentar ni pambahenanni ai. Ai pandeinan do anak ni dunia on humbani anak haliharon in marsaor pakon hasomanni sauhur.
9Ahu pe, huhatahon ma bennima, pindahi hanima ma bannima huan-huan marhitei mammon na geduk in, ase anggo bois in, ijalo hanima hubagas ianan sisadokah ni dokahni.
10Anggo hatengeran ni uhur halak bani na otik, hatengeran ni uhur do ia age bani na buei, anjaha anggo geduk ia bani na otik, geduk do homa age bani na buei.
11Anggo seng hatengeran ni uhur hanima pasal mammon na geduk in, ise ma na ra mangondoskon bannima arta na tongon ai?
12Anjaha anggo seng hatengeren ni uhur hanima pasal barang ni halak na legan, ise ma na ra mamberehon bannima na dong Bennami.
13Seng tarbalosi sada jabolon dua tuan, sogamanni do na sada, haholonganni do na sada nari; hombaranni do na sada, anjaha mapas bani na sada nari. Seng tarbalosi hanima Naibata rap pakon mammon.”
Pasal Hapintoron ni Halak Parisei ampa Sibotoh Titah
14Haganupan ai itangar halak Parisei, na surakah bani duit, gabe irisa-risai sidea ma Ia.
15Jadi nini ma dompak sidea, “Ia nasiam, ipapintor-pintor nasiam do diri nasiam i lobei ni jolma, tapi itanda Naibata do uhur nasiam, ai na timbul bani jolma, ai do hagigi bani Naibata.
16Sibar si Johannes do titah in ampa nabi-nabi. Hunjai nari iambilankon ma Ambilan Na Madear pasal Harajaon ni Naibata, anjaha haganup do halak marompot sihol masuk hubagas.
17Tapi urahan do salpu langit ampa tanoh humbani sada titik ni titah in magou.
18Parbangkis do ganup na manirangkon parinangonni anjaha ibuat na legan; parbangkis do homa na mambuat naboru na sinirangkon ni dalahini ai.”
Halak na Bayak ampa si Lasarus na Masombuh
19“Adong ma sada halak na bayak, na marpakeian beledu sigerger ampa hiou putih na alus, ari-ari do ia marpesta.
20Tapi adong ma sada halak na masombuh, na margoran si Lasarus, tibal-tibal i lobei ni labah ni na bayak ai; gok bayoh do angkulani.
21Iparsinta uhurni do mangankon rima-rima, na mardabuhan humbani meja ni halak na bayak ai; tapi baliang do na roh mandilati bayohni ai.
22Matei ma halak na masombuh ai, anjaha iboan malekat ma ia hu abingan ni si Abraham. Matei ma homa na bayak ai, lanjar itanom ma,
23anjaha hun nagori toruh ai, iananni mandagei na parngit ai, mangkawah ma ia hu babou, gabe ididah ma bani na daoh si Abraham ampa si Lasarus i abinganni.
24Jadi dilo-dilo ma ia, nini ma, ʻAle ompung Abraham! Idop ma uhurmu bangku, suruh ham ma si Lasarus manornobkon ujung ni jari-jarini bani bah, laho palamlam dilahku, ai borit do huahap ibagas apuy on.ʼ
25Tapi nini si Abraham ma, ʻIngat ma, Ambia, na dob ijalo ho na madear, sanggah manggoluh ho, tapi anggo si Lasarus on na maparngit do. Anggo nuan apohon ma ia ijon, tapi mandagei na parngit mando anggo ho.
26Ambah ni ai, lombang bagas do holangkolangnami ampa hanima, ase ulang boi halak na hunjon hujin, anjaha na hunjin pe seng boi mandipar bennami hujon.ʼ
27Nini ma use, ʻAnggo sonai do, hupangindo ma bamu ompung, suruh ham ma ia hu rumah ni bapa,
28ai adong ope lima nari saninangku, ase ipalumba sidea, ase ulang dihut sidea masuk bani ianan na parngit on.ʼ
29Tapi nini si Abraham ma, ʻAdong do bani sidea surat ni si Musa ampa nabi, ai ma itangihon.ʼ
30Jadi nini ma, ʻLang sonai, ompung Abraham; tapi ambit adong sahalak humbani na dob matei roh marayak sidea, sai na paubahon ni sidea do uhur ni sidea.ʼ
31Tapi ibalosi ma, ʻAnggo seng itangihon sidea si Musa pakon nabi-nabi, seng anjai balosan ni sidea, age adong na puho humbani na matei.ʼ”
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel