Alkitab Mobile SABDA
[VER] : [SIMALUNGUN]     [PL]  [PB] 
 <<  Lukas 17 >> 

Pasal Parsangsian ampa na Marsisasapan Dousa

1Ihatahon ma hubani susian-Ni ai, “Seng tarbahen lang roh parsangsian, tapi bursik ma na parohkonsi.

2Dearan do bani halak sisonai ai, igantungkon losung batu bani borgokni anjaha inongnongkon ia hu laut, humbani na sangsi ibahen sahalak na etek-etek on.

3Jaga hanima ma dirinima! Anggo mardousa hasomanmu, pagolpa ma ia, jadi anggo ipaubah uhurni, sasap ma dousani.

4Anjaha porini pitu hali ia ibagas na sadari marsalah dompak ho, anjaha pitu hali ia roh hubam mangkatahon, ʻJora ma ahu,ʼ maningon sasaponmu do ai.”

Pangindoan ni Apostel ase Itambahi Haporsayaon ni Sidea; Limbaga Pasal Jabolon Siparugas

5Dob ai nini apostel ai ma dompak Tuhan in, “Tambahi Ham ma haporsayaonnami!”

6Jadi nini Tuhan in ma, “Anggo adong haporsayaonnima na sabatu ni loharum, boi do hatahononnima bani hayu ara on, ʻMorbat ma ho, anjaha tarsuan ma ho hu laut!ʼ Gabe balosanni do hanima.

7Porini adong hun bannima na marjabolon, sipaninggala atap siparmahan pe ai, mintor hatahononni ma hu bani, sanggah mulak ia hun juma, ʻPodas ma roh hujon, hundul ma ho mangan!ʼ

8Tapi ai lang hatahononnima do hu bani, ʻPatorsa sipanganonku, mamonting ma, idangi ma ahu mangan ampa minum, dob ai pe ase mangan anjaha minum ho!ʼ

9Mintor martarima kasih ma ia hubani jabolon ai, halani ihorjahon na niaturhoni ai!

10Sonai do homa hanima, anggo domma ihorjahon hanima ganup na pinarentahkon bannima, hatahon hanima ma, ʻJabolon na so margagan do hanami, sibar horja na patut do hansa ilahoi hanami.ʼ”

Ipamalum Jesus Sapuluh Halak na Gadamon

11Sanggah mardalan Ia dompak Jerusalem, ibontas ma parbalogan ni Samaria ampa Galilea.

12Sanggah na laho masuk Ia hubagas sada huta, ijumpahkon sapuluh halak na gadamon ma Ia, na jongjong mandaoh-daoh.

13Ipagomos sidea ma sorani, nini ma, “Jesus, Guru, idop ma uhur-Mu bannami!”

14Dob ididah sidea, nini ma, “Laho ma nasiam, patuduhkon nasiam ma diri nasiam bani malim!” Anjaha sanggah na laho ai sidea, gabe susi ma sidea.

15Sada humbani sidea, dob ididah na dob malum ia, mulak ma, lanjar ipuji do Naibata marhasoman sora na gogoh.

16Marrogop ma ia hu lobei ni Jesus, mangkatahon tarima kasih Bani. Anjaha halak Samaria do ai.

17Tapi nini Jesus ma mambalosi, “Ai lang sapuluh do sidea na dob malum ai? Ija do na siah nari?

18Ai seng dong hape na ra mulak pasangapkon Naibata, sobali halak na legan bangsa on?”

19Lanjar nini ma hu bani, “Jongjong ma ham, laho ma! Haporsayaonmu do na paluahkon ham!”

Tanda-tanda ni Parroh ni Jesus Paduahalihon

20Isungkun Parisei ma Ia, “Antigan ma roh Harajaon ni Naibata?” Jadi nini ma mambalosi sidea, “Seng marpanrantam idahon parroh ni Harajaon ni Naibata.

21Anjaha seng tarhatahon, ʻTonggor ma ijon do!ʼ atap, ʻijai do!ʼ Ai i tongah-tongah nasiam do Harajaon ni Naibata.”

22Dob ai nini ma hubani susian-Ni ai, “Na roh ma arini, siholan ma hanima sihol mangidah sada ari ni Anak ni Jolma in, tapi seng idahonnima ai.

23Anjaha hatahonon ni sidea do bannima, ʻTonggor ma, ijai do! Tonggor ma, ijon do!ʼ Ulang ma laho hanima hujai anjaha ulang ma irikkon!

24Ai songon hilap na mardejep, na mambahen siang langit hun ujung hu ujung, sonai do pasal Anak ni Jolma in bani arini ai.

25Tapi maningon buei do lobei taronon-Ni; ambukkonon ni na sasundut on do Ia.

26Songon na masa bani panorang ni si Noak, sonai do masa bani panorang ni Anak ni Jolma in.

27Mangan minum do sidea, mambuat boru anjaha palahohon boru, das bani panorang ni si Noak masuk hubagas parau ai; jadi roh ma bah na sumbang ai mamboiskon sidea haganup.

28Songon na masa bani panorang ni si Lot: Mangan minum do sidea, mamboli anjaha manjual, manuan anjaha pajongjong rumah.

29Tapi bani panorang parlaho ni si Lot hun huta Sodom, turun ma udan apuy pakon hirtah hun babou, laho mamboiskon sidea haganup.

30Sonai ma masa bani ari ai, talarhonsi Anak ni Jolma in.

31Ise bani ari ai i atas tayub, anjaha ugas-ugasni adong ibagas rumah, ulang ma pala ia turun laho mangalop ai; anjaha na i juma pe ulang ma pala mulak.

32Ingat ma parinangon ni si Lot.

33Magouan hosah ma na sihol paluahkon hosahni, tapi na magouan hosah, ai do na pagoluhkonsi.

34Huhatahon ma bannima, ʻBani na saborngin ai adong ma dua halak sapodoman, sada ijalo, na sada nari itadingkon do.

35Rap manduda ma dua naboru, sada ijalo, tapi na sada nari itadingkon do.

36Adong ma dua halak i juma, sada ijalo, tapi na sada nari itadingkon do.ʼ”

37Jadi nini sidea ma mambalosi-Si, “Ija ma ai Tuhan?” Jadi nini ma bani sidea, “Ija adong bangkei, hujai do martumpu kawak.”



 <<  Lukas 17 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel Single Panel