Alkitab Mobile SABDA
[VER] : [SIMALUNGUN]     [PL]  [PB] 
 <<  Matius 17 >> 

Marsangap Tuhan Jesus i Atas Dolog

1Dob salpu onom ari, iarahkon Jesus ma si Petrus ampa si Jakobus ampa si Johannes saninani ai, iboan ma sidea pulig hu sada dolog na gijang.

2Jadi mubah ma rupa-Ni ididah sidea, bohi-Ni marsinalsal songon mata ni ari, anjaha hiou-Ni lopak songon na lihar.

3Anjaha tonggor ma, taridah ma bani sidea si Musa ampa si Elias, marsahapi pakon-Si.

4Jadi iparsahapkon si Petrus ma Jesus, nini ma, “Sonang ni in ijon! Anggo marosuh Ham, hupauli ma ijon tolu lampolampo, sada Bamu, sada bani si Musa, anjaha na sada nari bani si Elias.”

5Mangkatahon ai ope ia, tonggor ma, roh ma sada hombun na lihar manlinggomi sidea, anjaha tarbogei ma sada sora hun hombun ai, na mangkatahon, “On do Anak haholongan-Ku, marosuh do uhur-Hu Bani, tangihon hanima ma Ia!”

6Manangar ai susian ai, manrogop ma sidea anjaha mabiar tumang.

7Jadi roh ma Jesus bani sidea, ijamah ma sidea, nini ma, “Jongjong ma, anjaha ulang ma mabiar!”

8Tapi sanggah mangkawah sidea, seng dong atap ise ididah sidea ijai sobali Jesus tumang.

9Sanggah tuad ai sidea hun dolog ai, iparentahkon Jesus ma hubani sidea, nini ma, “Ulang ma patugah-tugah hanima na nididahnima ai atap bani ise pe, sadokah seng puho ope Anak ni Jolma in humbani na matei.”

10Jadi isungkun susian-Ni ai ma Ia, “Mase ma ihatahon sibotoh surat paboa maningon roh do lobei si Elias?”

11Nini ma mambalosi sidea, “Tongon, maningon roh do si Elias, laho patorsahon haganup.”

12Tapi Huhatahon ma bennima, “Domma roh si Elias, tapi seng itanda sidea ia, uhur-uhur ni sidea do ibahen sidea bani.”

13Jadi iarusi susian ai ma, si Johannes Pandidi do hape, na hinatahon-Ni ai bani sidea.

Ipamalum Tuhan Jesus Sada Halak na Ubagon

14Dob das sidea hubani halak na mabuei ai, roh ma sada halak marsombah hu Bani, anjaha nini ma,

15“Tuhan, idop ma uhur-Mu mangidah anakku.” Ubagon do ia, parah tumang iahap. Gati do ia jomba hubagas apuy, anjaha gati homa hubagas bah.

16Domma huboan namin ia bani susian-Mu, tapi seng tarpamalum sidea ia.

17Jadi nini Jesus ma mambalosi, “E bangsa, na so porsaya anjaha na jahat! Sadiha dokah nari Ahu rap pakon hanima? Sadiha dokah nari anjuon-Ku hanima? Boan hanima ma ia hujon.”

18Jadi isorgang Jesus ma ia, gabe luar ma sibolis ai hun bani, anjaha jorgit ma ia humbani panorang ai nari.

19Dob ai pulig ma iparayak susian ai Jesus, nini ma, “Mase ma lang mangasup hanami mangusirsi?”

20Jadi nini Jesus ma dompak sidea, “Halani otik ni haporsayaonnima do! Ai tongon do na Huhatahon on bennima: Anggo adong haporsayaonnima na sabatu ni losabi, hatahononnima do bani dolog an: Mosor ma hunjon hujai, gabe saud do mosor ai, anjaha seng dong na so boi bahenonnima.”

21Tapi anggo na samasam on, seng ra mandarat, anggo seng marhasoman tonggo ampa parpuasaon.

Ilumbahon Jesus Pasal Sitaronon-Ni Paduahalihon

22Sanggah martumpu sidea i Galilea, nini Jesus ma hubani sidea, “Ondoskononkon ma Anak ni Jolma in hubagas tangan ni halak,

23gabe bunuhon ni sidea ma Ia, dob ai pagoluhon do Ia bani ari patoluhon.” Jadi pusok tumang ma uhur ni sidea.

Igalar Jesus Guguan bani Rumah Panumbahan

24Jadi dob das sidea hu huta Kapernaum, roh ma situnggu guguan rumah panumbahan hubani si Petrus, nini ma, “Ai seng manggalar guguan rumah panumbahan Gurunima in?”

25Nini ma, “manggalar do.” Sanggah na masuk ia hu rumah, i lobei Jesus ma manungkun hu bani, nini ma, “Sonaha do ninuhurmu, Simon? Raja-raja na i tanoh on, humbani ise do sidea manjalo guguan atap balasting? Hun bani anakni do atap humbani halak na legan do?”

26Dob ihatahon si Petrus, “Hun bani halak na legan do,” gabe ihatahon Jesus ma hu bani, “Ase, seng hona anggo anak!

27Tapi, ase ulang marah sidea halani hita, laho ma ho mangkail hu tao, dob ai sintak ma dengke na parlobei mangankon, anjaha buha ma babahni, gabe dapot ho ma ijai sada rupiah. Ai ma buat, anjaha bere ma ai bani sidea bahen guguanta.”



 <<  Matius 17 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel Single Panel