Alkitab Mobile SABDA
[VER] : [SIMALUNGUN]     [PL]  [PB] 
 <<  Mazmur 105 >> 

Puji-pujian halani Panogu-noguon ni Jahowa bani Bangsa-Ni

1Puji nasiam ma Jahowa, dilo ma goran-Ni, pabotohkon nasiam ma pambahenan-Ni i tongah-tongah ni bangsa-bangsa!

2Dodingkon nasiam ma Ia, dodingkon ma puji-pujian Bani, sahapkon nasiam ma ganup horja halongangan-Ni in.

3Marmogah-mogah ma nasiam ibagas goran-Ni na pansing in; marmalas ni uhur ma sagala sipindahi Jahowa.

4Pindahi nasiam ma Jahowa pakon hagogohon-Ni, pindahi nasiam ma tongtong bohi-Ni.

5Paingat-ingat nasiam ma sagala halongangan na binahen-Ni, tanda halongangan-Ni pakon uhum niluarhon ni pamangan-Ni,

6nasiam, ale ginompar ni si Abraham, juakjuak-Ni in, nasiam, ale anak ni si Jakob, na pinilih-Ni in!

7Ia Jahowa, Ia do Naibatanta, sab do bani dunia on uhum-Ni.

8Idingat do tongtong padan na binahen-Ni, hata na niluarhon-Ni hubani marribu-ribu sundut,

9ai ma padan binahen-Ni bani si Abraham ampa bulawan-Ni bani si Isak.

10Ipajongjong do ai bani si Jakob gabe aturan, bani Israel gabe padan sadokah ni dokahni;

11nini, “Hu bam do berehonon-Ku tanoh Kanaan; gabe tean-teanan tanoh parbagiananmu.”

12Sanggah seng sadiha ope bilangan ni sidea, otik hansa anjaha panginsolat ijai;

13marbungkas-bungkas humbani bangsa hu bangsa, humbani sada harajaon hu harajaon na legan,

14seng ibere age sahalak mangarsik sidea, ipapai do tene raja-raja marhalanihon ni sidea:

15Nini, “Ulang kahua hanima halak na niminakan-Ku, ulang bahen hanima na jahat bani nabing-Ku.”

16Sanggah na ipamasa lohei bani tanoh in, anjaha na binolahkon-Ni sagala parbohalan ni sipanganon.

17Isuruh ma sada halak parlobei ni sidea, ai ma si Josep na tarjual songon jabolon.

18Naheini igari bosi janah borgokni irantai bosi

19paima das nidok ni hata-Ni, gabe saud hata ni Jahowa.

20Isuruh raja ma na paluahkonsi, sirajai bangsa-bangsa mangkatahon paluahon ia;

21ipabangkit ma ia gabe tuan i rumahni, ampa panggomgom bani sagala artani,

22laho mangajari gamot-gamotni mangihutkon rosuhni, ampa mamodahkon hauhuron bani pangintuai-pangintuai.

23Dob ai roh ma Israel hu Masir, manginsolat ma si Jakob i tanoh ni si Ham.

24Ibahen ma bangsa-Ni ai manggargar tumang, gogohan humbani imbangni.

25Ipagoling ma uhur ni sidea laho mandomdomi bangsa-Ni, mambahen akal-akal bani juakjuak-Ni.

26Dob ai isuruh ma si Musa, juakjuak-Ni ai, pakon si Aron, na pinilih-Ni ai.

27Ipamasa sidea ma partanda ni Jahowa i tanoh Masir ampa halongangan i tanoh ni si Ham.

28Iparoh ma na golap gabe lotir ma, tapi seng iparuhurhon sidea hata-Ni.

29Ipaubah do bah ni sidea gabe daroh, gabe matei ma sagala dengke ni sidea.

30Gumayom ma tiktikan i tanoh ni sidea, pala das hu kamar ni raja-raja ni sidea.

31Marsahap ma Ia, jadi marrohan ma siranggang, rongit bani sab nagori ni sidea.

32Itongos do bani sidea udan sira-sira, gok jirlam ni apuy do tanoh ni sidea.

33Iparseda ma pohon anggur pakon hayu ara ni sidea, marponggolan do hayu bani sab nagori ni sidea.

34Marsahap ma Ia, marrohan ma balang ampa tamponok na so habilangan,

35jadi ipampangani ma sagala suan-suanan i tanoh ni sidea, iboiskon ma gogoh ni juma ni sidea.

36Ibogbog ma sagala bunga-tubuh i nagori ni sidea, pamungkah ni gogoh ni sidea ganupan.

37Dob ai iboan ma sidea mandarat marnah omas pakon pirak, seng dong humbani marga ni sidea na targompang.

38Malas ma uhur ni Masir dob haluar sidea, ai sogop do bani sidea biar mangidah Israel.

39Ipaherbang ma hombun manrongkob bani sidea, sonai apuy laho paliharhon borngin.

40Mangindo sidea, gabe iparoh ma leto, anjaha ipabosur ma sidea mangan ruti na hun nagori atas.

41Ibuha ma dolog batu, jadi marbaoran ma bah, mardalan i halimisan songon binanga,

42halani idingat do hata-Ni na pansing in, ai ma na hubani si Abraham, juakjuak-Ni in.

43Ipadarat do bangsa-Ni ai ibagas malas ni uhur, na pinilih-Ni ai marhasoman olob-olob.

44Ibere ma bani sidea tanoh ni sipajuh begu-begu

45ase iramotkon sidea aturan-Ni, anjaha iparlahouhon titah-Ni. Haleluya!



 <<  Mazmur 105 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel Single Panel