Kuasa ni Hata ni Naibata; Alep = A
1Martuah ma halak na daulat marparlahou, na mardalan bani titah ni Jahowa.
2Martuah ma halak na manramotkon hasaksian-Ni, na mangindahi Ia humbani gok ni uhurni.
3na so mangkorjahon hajahaton, tapi na mardalan bani dalan-Ni.
4Domma itonahkon Ham parentah-Mu, ase dalankononkon ai pongkut.
5Sai totap ma namin langkahku, laho mandalankon aturan-Mu.
6Tongon, seng anjai tarbador ahu, anggo hupardimata ganup aturan-Mu.
7Sai pujionku do Ham humbani putih ni uhurhu, anggo huguruhon titah-Mu na pintor in.
8Sai dalankononku do uhum-Mu, sai ulang ma tadingkon Ham ahu.
Bet = B
9Marhitei aha do boi borsih langkah ni sada garama? Marhitei na iramotkon hata-Mu.
10Humbani gok ni uhurhu do Ham hupindahi, ulang ma paturut Ham ahu kahou humbani parentah-Mu.
11Ibagas uhurhu do husimpan hata-Mu, ase ulang mardousa ahu Bamu.
12Sai tarpuji ma Ham Jahowa, ajarhon Ham ma bangku aturan-Mu!
13Marhitei bibirhu do hubaritahon sagala titah-Mu, na luar humbani pamangan-Mu.
14Marmalas ni uhur do ahu bani dalan ni hasaksian-Mu, lobih humbani sagala habayakon.
15Sai hupingkir-pingkiri do aturan-Mu, anjaha pardimatahononku dalan-Mu.
16Aturan-Mu do na huhamalaskon, seng lupa ahu bani hata-Mu.
Gimel = G
17Bahen Ham ma na madear bani juakjuak-Mu, ase manggoluh ahu, anjaha hudalankon hata-Mu.
18Sai buha Ham ma matangku, ase huidah halongangan ni undang-undang-Mu.
19Panginsolat do ahu i tanoh on, sai ulang ma ponopkon Ham parentah-Mu hu bangku.
20Madotei do uhurhu, halani siholan bani titah-Mu bani ganup panorang.
21Ipalumba Ham do halak na jungkat, sai hona papa do na manimbil humbani parentah-Mu.
22Buat Ham ma humbangku habadoron pakon hahirion, ai hudalankon do hasaksian-Mu.
23Age pe hundul na sangap-sangap manriah mangimbang ahu, sai uhum-Mu do ipingkiri juakjuak-Mu,
24Tongon hasaksian-Mu do malas ni uhurhu, gabe panuturi bangku.
Dalet = D
25Longkot do tonduyhu bani orbuk pagoluh Ham ma ahu romban hubani hata-Mu.
26Domma hubaritahon dalanku anjaha itangihon do ahu, podahkon Ham ma bangku sagala aturan-Mu.
27Paruhuri Ham ma ahu pasal pardalan ni aturan-Mu, ase hupingkir-pingkiri halongangan-halongangan-Mu.
28Maseda do uhurhu halani marhoru, pajongjong Ham ma ahu romban hubani hata-Mu.
29Dalan ladung padaoh Ham humbangku, anjaha marhitei titah-Mu idopi Ham ma ahu.
30Dalan hasintongan do hupilih, titah-Mu do huhasiholi.
31Longkot do ahu bai hasaksian-Mu, Ham Jahowa, ulang ma paila Ham ahu.
32Dalan ni parentah-Mu do dalanku, ai ipalumbang Ham do uhurhu.
He = H
33Patuduh Ham ma bangku, ale Jahowa, pardalan ni uhum-Mu, ase hudalankon ai ronsi ujungni.
34Paruhuri Ham ma ahu ase huramotkon undang-undang-Mu, anjaha hudalankon ai humbani gok ni uhur.
35Sai togu Ham ma ahu bani dalan ni parentah-Mu, ai ai do na huharosuhkon.
36Sai pasurdung Ham ma uhurhu dompak hasaksian-Mu, ulang dompak paruntungan
37Palembang Ham ma matangku humbani na mangkawahkon na so margagan, sai pagoluh Ham ma ahu marhitei hata-Mu.
38Patotap Ham ma bani juakjuak-Mu bagah-bagah-Mu. ai ma bani halak sihabiari Ham.
39Sai padaoh Ham ma hahirion na huhabiari, ai na madear do titah-Mu.
40Tonggor ma, ihasiholi uhurhu do aturan-Mu, sai pagoluh Ham ma ahu halani hapintoron-Mu.
Vau = H
41Sai sogop ma bangku idop ni uhur-Mu, ale Jahowa, sonai hatuahon-Mu romban hubani bagah-bagah-Mu,
42ase boi balosanku halak na pahiri ahu, ai tenger do uhur hubani hata-Mu.
43Ulang ma buat Ham hata hasintongan in humbani pamanganku, ai titah-Mu do na huarapkon.
44Sai ramotkononku do undang-undang-Mu tongtong, tongon, ronsi sadokah ni dokahni.
45Sai mardalani bani na lumbang ma ahu, ai parentah-Mu do na hupindahi.
46Sai sahapkononku do hasaksian-Mu i lobei ni raja-raja, anjaha seng maila ahu.
47Sai marmalas ni uhur do ahu bani parentah-Mu, huhaholongi do botul.
48Hupaherbang do tanganku bani parentah-Mu na huhaholongi, anjaha hupingkir-pingkiri do aturan-Mu.
Sain = S
49Sai ingat Ham ma hata na bani juakjuak-Mu, na binahen-Mu gabe pangarapanku.
50On do na pasabou uhurhu ibagas hadoyukonku: bagah-bagah-Mu do na pagoluhkon ahu.
51Sai iapas-apasi halak na jungkat do ahu, tapi seng manlembang ahu humbani undang-undang-Mu.
52Idingat uhurhu do titah-Mu na humbani na basaia, ale Jahowa, jadi sabou ma uhurhu.
53Parah do gilangku mangidah halak parjahat, sitadingkon undang-undang-Mu.
54Doding do bangku ganup aturan-Mu, ibagas rumah panginsolatanku.
55Sai hudingat do borngin goran-Mu, ale Jahowa, anjaha hudalankon do undang-undang-Mu.
56On do na dob ondos bangku, ai ma manramotkon aturan-Mu.
Chet = Ch
57Rupeihu do Ham, ale Jahowa, domma hupadankon marimbagaskon hata-Mu.
58Humbani gok ni uhurhu do hupindahi bohi-Mu, ma idop ma uhur-Mu bangku romban hubani bagah-bagah-Mu.
59Hupingkir-pingkiri do dalanku, gabe hupaulak do langkahku hubani hasaksian-Mu.
60Tarolos do ahu anjaha seng hupadokah-dokah, laho mandalankon parentah-Mu.
61Siding ni halak parjahat manlioti ahu, tapi seng lupa ahu bani undang-undang-Mu.
62Tongah borngin puho do ahu laho mamuji Ham, halani titah-Mu na pintor in.
63Hasoman do ahu bani sagala na mangkabiari Ham, sonai age bani sagala sidalankon aturan-Mu.
64Idop ni uhur do manggoki tanoh on, Ham Jahowa, ajarhon Ham ma bangku aturan-Mu.
65Na madear do ibahen Ham bani juakjuak-Mu, ale Jahowa, romban hubani hata-Mu.
66Hauhuron pakon habotohon ma ajarhon Ham bangku, parentah-Mu do na huhatengerhon.
67Paima lape marsitaronon ahu kahou do ahu, tapi sonari hata-Mu do na huirikkon.
68Dear do Ham anjaha sibahen na madear, ajarhon Ham ma hu bangku uhum-Mu.
69Ipatubuh-tubuh halak na jungkat do ladung dompak ahu, tapi hupardiatei do aturan-Mu humbani gok ni uhur.
70Seng marpangahap uhur ni sidea songon taboh-taboh, tapi malas do uhur hubani undang-undang-Mu.
71Hadearon na bangku na marsitaronon ai ahu, ase uhum-Mu huguruhon.
72Rahanan do bangku titah ni pamangan-Mu, humbani omas atap pirak na marribu-ribu.
Jod = J
73Tangan-Mu do manjadihon pakon na paulihon ahu; paruhuri Ham ma ahu ase huguruhon parentah-Mu.
74Halak na mangkabiari Ham mangidah ahu gabe malas ma uhurni, ai hata-Mu do na huarapkon.
75Hubotoh do, ale Jahowa, pintor do titah-Mu, anjaha ibagas hasintongan-Mu do ipatunduk Ham ahu.
76Sai idop ni uhur-Mu ma na mangapoh ahu, romban hubani bagah-bagah-Mu na bani juakjuak-Mu.
77Sai sogop ma hu bangku holong ni uhur-Mu, ase manggoluh ahu, ai titah-Mu do malas ni uhurhu.
78Sai maila ma halak na jungkat, ai iodoh-odoh sidea do ahu seng marhala; tapi anggo ahu aturan-Mu do na hupingkir-pingkiri.
79Sai mulak ma hu bangku halak na mangkabiari Ham, Pakon na mambotoh hasaksian-Mu.
80Sai pitah ma uhur hubani uhum-Mu, ase ulang tarbador ahu.
Kat = K
81Horahan do tonduyhu bani hatuahon-Mu, hata-Mu do na huarapkon.
82Kawah do matangku mangkasiholi bagah-bagah-Mu, nini, “Antigan pe apohon-Mu ahu?”
83Tongon, songon gusi hulingkuling na hona timus do ahu; tapi seng lupa bani uhum-Mu.
84Sadia dokah nari ma ari-ari ni juakjuak-Mu? Antigan pe dabuhon-Mu uhum bani na marburu ahu?
85Ihurak halak na jungkat do godung bangku, ai ma halak na so domu bani titah-Mu marparlahou.
86Sagala parentah-Mu sintong do; ipardakdak sidea do ahu seng marhala, urupi Ham ma ahu.
87Narus-narus ma bois ahu ibahen sidea i nagori on; tapi anggo ahu seng hutadingkon aturan-Mu.
88Domu hubani idop ni uhur-Mu sai pagoluh Ham ma ahu, ase huramotkon hasaksian ni pamangan-Mu.
Lamed = L
89Ronsi sadokah ni dokahni do, ale Jahowa, hata-Mu; totap do in i nagori atas.
90Marsundut-sundut do hasintongan-Mu; Ham do na pajonam ai i tanoh on, jadi totap ma.
91Domu hubani aturan-Mu totap do ai ronsi sadari on, ai ganupan ai juakjuak-Mu do.
92Ambit lang titah-Mu na pahinsah uhurhu, domma magou ahu halani hadoyukonku.
93Ronsi sadokah ni dokahni seng lupa ahu bani aturan-Mu, ai marhitei ai do ahu ipagoluh Ham.
94Bamu do ahu, paluah Ham ma ahu, ai aturan-Mu do na hupindahi.
95Sai igompangi halak parjahat do ahu laho mansedahon ahu; tapi anggo ahu hasaksian-Mu do huparimbagaskon.
96Bani haganup, age naha dearni dong do ujungni huidah; tapi anggo titah-Mu seng marpunsa.
Mem = M
97Holong tumang do uhur hubani titah-Mu; manipat ari do hupingkiri ai.
98Pentaran do ahu maruhur humbani munsuhku ibahen parentah-Mu, ai tongtong do ai mangkasomani ahu:
99Pandeian do ahu humbani sagala gurungku, ai hasaksian-Mu do hupingkir-pingkiri.
100Maruhuran do ahu humbani partua-partua, ai aturan-Mu do huparuhurhon.
101Humbani sagala dalan na masambor sai huambang do naheihu, ase tarbalosi ahu hata-Mu.
102Seng manlembang ahu humbani titah-Mu, ai Ham do na mamodahi ahu.
103Tobuni in hata-Mu bani langit-langitku, tobunan humbani manisan bani pamanganku.
104Halani aturan-Mu do mambahen maruhur ahu, halani ai magigi do ahu bani sagala dalan ladung.
Nun = N
105Hata-Mu do rigapan bani naheihu, anjaha panondang bani dalanku.
106Domma marbija ahu anjaha pasaudonku do ai, sai dalankononku do titah-Mu na pintor in.
107Marsitaronon tumang do ahu, ale Jahowa, pagoluh Ham ma ahu domu hubani hata-Mu.
108Harosuhkon Ham ma, ale Jahowa, galangan na humbani pamanganku; ajarhon Ham ma bangku titah-Mu.
109Tongtong do ibagas parmaraan tonduyhu, tapi seng huhalupahon undang-undang-Mu.
110Sai itaon halak parjahat do siding bangku, tapi seng manlembang ahu humbani aturan-Mu.
111Hasaksian-Mu do hubahen pusakangku sadokah ni dokahni, halani malas ni uhurhu do ai.
112Huungkab do uhurhu laho mangkorjahon aturan-Mu, tongtong ronsi sadokah ni dokahni.
Samech = S
113Magigi do uhur hubani halak simolei-olei, tapi holong do uhur hubani titah-Mu.
114Parlingodan ampa gantarhu do Ham, hata-Mu do na huarapkon.
115Surut ma humbangku, ale halak parjahat; sihol dalankononku do parentah ni Naibatangku.
116Tungkoli Ham ma ahu romban hubani bagah-bagah-Mu ase manggoluh ahu; anjaha ulang ma paila Ham ahu ibagas pangarapanku.
117Jolom Ham ma ahu, ase maluah ahu, gabe aturan-Mu ma tongtong hukawahkon.
118Itulak Ham do ganup halak na manirpang humbani uhum-Mu, ai ladung do na piningkiran ni sidea.
119Songon tasik ni bosi do ihira Ham sagala parjahat na i tanoh on, halani ai do ase huhaholongi hasaksian-Mu.
120Manorgi do ambulungku halani biarni mangidah Ham, gobir do uhurhu mardingat paruhuman-Mu.
Ain = A
121Hudalankon do uhum pakon hapintoron, ulang ma ondoskon Ham ahu hubani na mangodoh-odoh ahu.
122Apiti Ham ma juakjuak-Mu bahen hadearonni; ulang ma itokoh-tokoh halak na jungkat ahu.
123Siholan do matangku mangkawah dompak pangurupion-Mu, ampa dompak bagah-bagah-Mu na pintor in.
124Bahen Ham ma bani juakjuak-Mu romban hubani idop ni uhur-Mu; anjaha aturan-Mu ajarhon Ham ma bangku.
125Juakjuak-Mu do ahu, paruhuri Ham ma ahu, ase huarusi hasaksian-Mu.
126Domma jumpah panorangni bani Jahowa mandalankon uhum; domma seda ibahen sidea titah-Mu.
127Halani ai holong do uhur hubani parentah-Mu, lobih humbani omas ampa humbani omas pitah.
128Halani ai do ase sintong ahu marparlahou romban bani ganup aturan-Mu, anjaha magigi ahu bani dalan ladung.
Pe = P
129Halongangan do hasaksian-Mu, halani ai do ase ijolom tonduyhu ai.
130Panangkasion bani hata-Mu do na paliharhon, anjaha na mamparuhuri halak na bulus.
131Hupangangang do pamanganku, hosah-hosah do ahu, ai parentah-Mu do na huhasiholhon.
132Dompakkon Ham ma ahu anjaha maidop ma uhur-Mu bangku, romban hubani na patut bani ma mangkaholongi goran-Mu.
133Sai patotap Ham ma langkahku bani bagah-bagah-Mu, anjaha ulang ma paturut Ham hajahaton manrajai ahu.
134Paluah Ham ma ahu humbani odoh-odoh ni jolma, ase huramotkon aturan-Mu.
135Sai sondangkon Ham ma bohi-Mu bani juakjuak-Mu, anjaha ajarhon Ham ma bangku uhum-Mu.
136Iluh na marpansur do mabaor humbani matangku, halani na so saud idalankon titah-Mu.
Zade = Z
137Pintor do Ham, ale Jahowa, anjaha sintong do uhum-Mu.
138Domma itonahkon Ham hasaksian-Mu ibagas hapintoron, anjaha ibagas hasintongan botul.
139Pongut ni uhurhu do mamboiskon ahu, ai ihalupahon lawanku do hata-Mu.
140Pitah tumang do hata-Mu, holong do uhur ni juakjuak-Mu bani.
141Etek do ahu anjaha madorun, tapi seng lupa ahu bani aturan-Mu.
142Hapintoron-Mu pintor do ai ronsi sadokah ni dokahni, anjaha hasintongan do undang-undang-Mu.
143Hasosakan ampa hasunsahan do mangonai bangku, tapi parentah-Mu do na huhamegahkon.
144Pintor do hasaksian-Mu ronsi sadokah ni dokahni; paruhuri Ham ma ahu, ase manggoluh ahu.
Kop = K
145Dilo-dilo do ahu humbani gok ni uhur, balosi Ham ma ahu, ale Jahowa, sihol ramotkononku do aturan-Mu,
146Dilo-dilo do ahu Bamu, paluah Ham ma ahu! sai dalankononku do hasaksian-Mu.
147Paima buha siang dilo-dilo do ahu; bani hata-Mu do ahu mangarap.
148Puho do ahu sanggah marhorin parrunda; bagah-bagah-Mu do hupingkir-pingkiri.
149Sai tangihon ma sorangku romban hubani idop ni uhur-Mu, ale Jahowa, domu hubani uhum-Mu, pagoluh Ham ma ahu.
150Madohor ma halak parjahat sipardakdak ahu; daoh do sidea humbani titah-Mu.
151Dohor do Ham, ale Jahowa, hasintongan do sagala parentah-Mu.
152Domma dokah hubotoh pasal hasaksian-Mu; ipajonam Ham do ai ronsi sadokah ni dokahni.
Resch = R
153Tatap Ham ma hadoyukonku anjaha paluah Ham ma ahu! Ai seng lupa ahu bani undang-undang-Mu.
154Tinggilhon Ham ma partinggilanku, anjaha tobus Ham ma ahu; pagoluh Ham ma ahu romban hubani bagah-bagah-Mu.
155Daoh do humbani halak parjahat haluahon, ai seng ipindahi sidea aturan-Mu.
156Banggal do holong ni uhur-Mu, ale Jahowa; pagoluh Ham ma ahu romban hubani titah-Mu.
157Buei do halak na marburu pakon na mangimbang ahu, tapi seng manimbil ahu humbani hasaksian-Mu.
158Mangidah halak na marbalik magigi do uhurhu, halani na so idalankon sidea hata-Mu.
159Tonggor Ham ma, aturan-Mu do na huhaholongi, ale Jahowa; pagoluh Ham ma ahu romban hubani idop ni uhur-Mu.
160Rimpun ni hata-Mu ai ma hasintongan, ronsi sadokah ni dokahni do uhum-Mu na pintor in.
Schin = Sch
161Raja-raja do na marburu ahu seng marhala; tapi hata-Mu tumang do ihabiari uhurhu.
162Marmalas ni uhur do ahu halani hata-Mu, songon halak na dapotan buei taban-taban.
163Sogam do uhur hubani ladung anjaha huhagigihon do ai, tapi holong do uhur hubani undang-undang-Mu.
164Pitu hali ibagas sadari hupuji Ham, halani uhum-Mu na pintor in.
165Damei na sumurung do rupei ni halak na mangkaholongi titah-Mu, seng anjai tartolsu sidea.
166Mangarap do uhur hubani pangurupion-Mu, ale Jahowa; parentah-Mu do hubalosi.
167Iramotkon tonduyhu do hasaksian-Mu, anjaha holong tumang do uhur hubani ai.
168Huramotkon do aturan-Mu pakon hasaksian-Mu, ai talar do i lobei-Mu sagala dalanku.
Tau = T
169Paturut Ham ma dilo-dilongku das i lobei-Mu, ale Jahowa, paruhuri Ham ma ahu romban hubani hata-Mu.
170Sai das ma elek-elekku hu Bamu, paluah Ham ma ahu romban hubani bagah-bagah-Mu.
171Sai mabaor ma puji-pujian humbani bibirhu, halani iajarhon Ham do bangku aturan-Mu.
172Sai idodingkon dilahku ma hata-Mu, ai pintor do sagala parentah-Mu.
173Sai tangan-Mu ma na mangurupi ahu, ai aturan-Mu do na hupilih.
174Siholan do ahu bani hatuahon-Mu, ale Jahowa. anjaha titah-Mu do na huhamegahkon.
175Sai manggoluh ma tonduyhu anjaha ham ma ipuji; titah-Mu ma na mangurupi ahu.
176Kahou do ahu songon biribiri na magou, pindahi Ham ma juakjuak-Mu, ai seng lupa ahu bani parentah-Mu.
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel