Alkitab Mobile SABDA
[VER] : [SIMALUNGUN]     [PL]  [PB] 
 <<  Mazmur 74 >> 

Tonggo Tangis-tangis Pasal Parseda ni Rumah Panumbahan

1Doding podah humbani si Asap. Mase ma, Ham Naibata, itulak Ham hanami lalab, gajag ringis-Mu dompak biribiri na pinarmahan-Mu?

2Sai ingat Ham ma kuria-Mu, na binangkuhon-Mu humbani sapari nari, na tinobus-Mu gabe bangsa parbagianan-Mu; Dolog Sion on, na niianan-Mu.

3Tujuhon Ham ma langkah-Mu dompak na dob dokah maseda in, haganup do iparseda munsuh i rumah na pansing in.

4Marsurak do imbang-Mu bani ianan partumpuan, ipajongjong sidea do mandera bahen partinandaan.

5Songon halak na mangalbangkon hapakni i harangan laho manrimbas hayu anak, sonai do sidea idahon;

6hapak pakon martil do ipangantukkon sidea bani uhir-uhiran-Mu, ase mangkaseda;

7isurbuy sidea do rumah-Mu na pansing in, ibutaki sidea ianan ni goran-Mu das ronsi onjolanni.

8Nini sidea do ibagas uhurni, “Boiskon hita ma haganup.” Domma isurbuy sidea haganup rumah panumbahan i nagori on.

9Partanda bennami seng dong ididah hanami be, seng dong be nabi, anjaha seng ibotoh hanami atap piga dokah on.

10Piga dokah nari, Ham Naibata, sai mapas munsuh in? Maningon pahirion ni munsuh mando goran-Mu lanjar?

11Mase ma itarik Ham tangan-Mu? Mase ma marlompit tangan Ham?

12Tapi Rajangku do Naibata humbani nabasaia, Ia do mambahen haluahon i tanoh on.

13Ham do mambolah laut marhitei gogoh-Mu, irosaki Ham do ulu ni naga ibagas bah.

14Ham do manrosaki ulu ni naga, ibere Ham do ai panganon ni binatang na i halimisan.

15Ham do parohkon bah tubuh pakon bah banggal, Ham do pahorah bah banggal na so ongga horah.

16Ham do simada arian pakon borngin; Ham do pajonamkon na lihar pakon mata ni ari.

17Ham do manotapkon parbalogan ni tanoh; Ham do mangadongkon musim logou ni ari pakon musim udan.

18Ingat Ham ma: Munsuh do na pahirihon in, Ham Jahowa, ampa bangsa na oto mangapasi goran-Mu.

19Ulang ma padas Ham hosah ni kuhuy-Mu bani binatang; ulang ma lalab lupa Ham bani goluh ni siminik-Mu na marsik in.

20Dingat Ham ma padan in; ai gok pangkilangon do longkit-longkit ni nagori on.

21Ulang ma paturut Ham bador halak na niodoh-odoh; lopas Ham ma halak na masombuh pakon na madoyuk mamuji goran-Mu.

22Jongjongkon Ham ma, ale Naibata, dalankon Ham ma kuasa-Mu! Ingat Ham ma parpahiri ni na oto in Bamu.

23Ulang ma lupa Ham bani parsurak ni munsuh-Mu, bani oga-oga ni imbang-Mu na tongtong martimburak in.



 <<  Mazmur 74 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel Single Panel