Alkitab Mobile SABDA
[VER] : [SIMALUNGUN]     [PL]  [PB] 
 <<  Mazmur 90 >> 

Elek-elek ni Jolma na Laho Salpu in i Lobei ni Naibata na Manongtong in

1Tonggo ni si Musa, juakjuak ni Naibata. Ale Tuhan, Ham do haporusannami marsundut-sundut.

2Paima tubuh dolog-dolog, paima iadongkon tanoh pakon dunia on, domma adong hinan Ham, ale Naibata, humbani sadokah ni dokahni ronsi sadokah ni dokahni.

3Suang do jolma in gabe orbuk ibahen Ham, Nimu, “Mulak ma hanima, ale anak ni jolma!”

4Ai saribu tahun bani pangidah-Mu doskon ari nantuari na dob salpu do ai, songon sada horin borngin-borngin.

5Iayub Ham do sidea, salpu songon nipi do sidea. Songon poyon-poyon na maratah do sidea:

6sogod martumbor anjaha marbunga, hape bodari melus anjaha maloslos.

7Tongon, bois do hanami halani ringis-Mu, anjaha binahen ni gila-Mu magou do hanami.

8Ipatalar Ham do hajahatonnami i lobei-Mu, anjaha dousanami na ponop bani haliharon ni bohi-Mu.

9Tongon, salpu do ganup ari-arinami ibahen ringis-Mu, anjaha tahun-tahun ni goluhnami masab songon sada hoih.

10Tahun ni goluhnami sibar pitu puluh do, anggo margogoh das ualuh puluh tahun; bueinan do ai marhangaluton anjaha marhasunsahan, ai podas tumang do ai salpu, songon na habang do hanami.

11Ise ma na mananda banggal ni ringis-Mu, anjaha ise ma na marhabiaran Bamu domu hubani gajag ni gila-Mu?

12Ajari Ham ma hanami mamilangi ari-arinami, ase dapotan uhur na pentar hanami.

13Marpangulaki ma uhur-Mu, Ham Jahowa! Sadiha dokah nari? Maidop ma uhur-Mu bani juakjuak-Mu.

14Pabosur Ham ma hanami sogod-sogod bani idop ni uhur-Mu, ase boi marolob-olob anjaha marmalas ni uhur hanami bani ganup ari-ari ni goluhnami.

15Pamalas Ham ma uhurnami nansa dokah ni ari niarsik-Mu hanami, nansa dokah ni tahun hamagouan na nidageinami.

16Patalar Ham ma sagala horja-Mu bani juakjuak-Mu, ampa hamuliaon-Mu bani ginomparni.

17Sai sogop ma hu banta habasaron ni Tuhan Naibatanta, anjaha ipatotap ma horja ni tanganta, tongon, sai ipatotap ma horja ni tanganta.



 <<  Mazmur 90 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel Single Panel