Alkitab Mobile SABDA
[VER] : [SIMALUNGUN]     [PL]  [PB] 
 <<  Roma 3 >> 

Adong do Hasurungan ni Jahudi

1Ase aha ma hasurungan ni Jahudi, anjaha aha ma gunani parsunaton ai?

2Buei do, ibagas haganup. Parlobei, ondosan ni hata ni Naibata do sidea.

3Ai sonaha? Anggo seng porsaya deba, mintor halani na so porsaya ai ma sidea gabe seda habujuron ni Naibata?

4Seng sonai. On do tene, parsintong do Naibata, tapi parladung do haganup jolma, songon na tarsurat in, “Ase pintor Ham bani hata-Mu, anjaha monang Ham ibagas panguhumon-Mu.”

5Tapi anggo hagedukonta mambahen jongjong hapintoron ni Naibata, aha ma sihatahononta? Ai na so adil ma Naibata, anggo ipadalan ringis-Ni? Sahap hajolmaon do sahapkai.

6Seng sonai. Ambit sonai, ija ma taruhum Naibata dunia on?

7Tapi anggo ladungku pabanggal habonaron ni Naibata gabe hasangapon-Ni, mase uhumon-Ni ope ahu songon pardousa?

8Ai lang dearan ma horjahon hita na masambor ase roh na madear? Patut do hona uhum halak sisonai ai.

Haganup do Jolma Pardousa

9Ase sonaha ma? Marhasurungan do hita? Otik pe lang. Domma hupatorang: Halak Jahudi pe atap halak Gorik, rap ginomgoman ni dousa do,

10songon na tarsurat in: Seng dong na pintor, sahalak pe lang.

11Seng dong na maruhur, seng dong na pindah-pindah bani Naibata.

12Haganup do manlembang, rap na so margagan do sidea; seng dong sihorjahon na madear, sahalak pe lang.

13Tanoman na ngangang do tolonan ni sidea, dilah ni sidea mansahapkon ladung; bisa ni ulog darih do i toruh ni bibir ni sidea.

14Gok do babah ni sidea bani bura-bura ampa hata podou.

15Hinsah do nahei ni sidea manduruskon daroh.

16Hamagouan ampa hamarsikon do ibagas dalan ni sidea,

17ia dalan hadameion in, seng ibotoh.

18Seng dong biar dompak Naibata ibagas pangidah ni sidea.

19Tapi ibotoh hita do, bani na ginomgoman ni titah in do haganup hata ni titah in, ase sip sagala pamangan, anjaha marsalah ganup sindunia on i lobei ni Naibata.

20Ai marhitei na mangkorjahon titah seng adong jolma na dapotan hapintoron i lobei ni Naibata. Ai marhitei titah panandaion bani dousa do roh.

Pamintorion ni Naibata Marhitei Haporsayaon

21Tapi sonari domma torang hapintoron ni Naibata, sedo hun bani titah, songon sinaksihon ni titah in ampa nabi-nabi,

22ai ma hapintoron ni Naibata, na das marhitei haporsayaon bani Jesus Kristus hubani haganup na porsaya.

23Ai seng dong ubahni, sabonar haganup do sidea mardousa, anjaha seng dong sipujion i lobei ni Naibata.

24Gabe ipintori do sidea marhitei silayak-layak halani idop ni uhur-Ni, hinorhon ni panobusion na ibagas Kristus Jesus.

25Ia do ipajongjong Naibata gabe hitei pardearan marhitei haporsayaon bani daroh-Ni ai, laho patalar hapintoron-Ni, halani domma isalpuhon dousa sapari ibagas sabar ni uhur-Ni,

26laho patalar hapintoron-Ni bani panorang sonari, ase pintor Ia, anjaha ipintori na porsaya bani Jesus.

27Ase adong ope siunsagahononkon? Seng dong be ai. Marhitei titah ja do? Marhitei titah horja do? Lang, tapi marhitei titah haporsayaon in do.

28Ase on do ijolom uhurta: Marhitei haporsayaon do ipintori jolma, sedo marhitei na mangkorjahon titah.

29Ai pitah Jahudi do simada Naibata? Ai lang dihut do bangsa sipajuh begu-begu? Nai ma tongon, dihut do bangsa sipajuh begu-begu!

30Ai sada do Naibata na mamintori na tarsunat marhitei haporsayaon ni sidea ampa na so marsunat halani haporsayaon ni sidea.

31Ase na manrumbakkon titah do hita halani haporsayaon in? Seng sonai, tapi na pajongjongkon titah in do hita.



 <<  Roma 3 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel Single Panel