Hagoluhan ni Malim pakon Halak Levi
1Ia malim, halak Levi ai pakon haganup marga Levi, seng bulih dapotan parbagianan barang siteanon rap pakon Israel; sagala galangan apuy bani Jahowa pakon parbagiananni hinan, ai do panganon ni sidea.
2Seng dong parbagianan ni sidea i tongah-tongah ni sanina ni sidea; Jahowa do parbagianan ni sidea, songon na dob pinarbagah-bagahni bani sidea.
3Anjaha on do hak ni malim bani bangsa in, bani halak na manggalangkon galangan, barang lombu barang biribiri pe ai; maningon bereonni do hubani malim hae-hae lobei, osangni na dua ai pakon bituha bolon.
4Limbuah humbani gandummu, minakmu pakon limbuah humbani ambulu ni biribirimu maningon bereonmu do hu bani.
5Ai domma ipilih Jahowa Naibatamu ia humbani haganup margamu, ase ia jongjong marugas marhitei goran ni Jahowa, ia pakon anakni sadokah maggoluh.
6Anjaha anggo roh halak Levi humbani sada huta, panginsolatanni ai, humbani ganup Israel, anjaha roh ia humbani gok ni uhurni hu ianan na sihol pilihon ni Jahowa,
7jadi bulih do ia marugas ibagas goran ni Jahowa Naibatani, songon haganup saninani, ai ma halak Levi ai, na jongjong marugas ijai i lobei ni Jahowa.
8Maningon dos do bagian sipanganon bani sidea, sobali na jinaloni humbani panjualon ni ugas-ugas ni ompungni.
Titah Larangan Pasal Parnaibataon na Legan pakon Partondungon
9Ia dob masuk ham hu tanoh sibereon ni Jahowa Naibatamu bamu, seng bulih guruhononmu mangkorjahon sihagigihononkon, na hinorjahon ni bangsa sipajuh begu-begu.
10Seng bulih jumpah i tongah-tongah nasiam sada halak, na pabontaskon anakni barang boruni humbani apuy, barang halak partondung, barang sijujur ari, barang sipartabas, barang parsibalik mata,
11barang sibahen uti-utian, barang sibahen pangidahan, barang siparsungkun bani begu-begu, barang siparbegu ganjang.
12Ai magigi tumang do uhur ni Jahowa mangidah haganup halak na mangkorjahon na sonai; anjaha halani pambahenan hagigian ai usiron ni Jahowa Naibatamu do sidea hun lobeimu.
13Maningon gokan dear do ham i lobei ni Jahowa Naibatamu.
14Ia bangsa sipajuh begu-begu sisolukonmu ai, somal do sidea patangi-tangi hata-hata ni sijujur ari pakon partondung, tapi anggo nasiam, seng ilopas Naibata nasiam mambahen na sonai.
Bagah-bagah Pasal Nabi na Banggal in
15Nabi sada songon ahu on pajongjongon ni Jahowa Naibatamu hun tongah-tongahmu, humbani saninamu; Ia talup tangihonon nasiam,
16romban hubani na pinangindomu hubani Jahowa Naibatamu i Horeb, sanggah ari partumpuan ondi, nimu do, “Seng be tarpabogei-bogei ahu sora ni Jahowa Naibatangku, anjaha lang be tarpaidah-idah ahu apuy na bolon on, ase ulang matei ahu.”
17Dob ai roh ma hata ni Jahowa hu bangku, “Dear do hata na hinatahon ni sidea ai.
18Ahu ma pajongjongkon bani sidea sada Nabi hun tongah-tongah ni sanina ni sidea, songon ho, anjaha Ahu ma mamberehon hatang-Ku hubagas pamanganni, gabe hatahononni ma hubani sidea sagala na Hutonahkon ai bani.
19Jadi barang ise na so ra manangihon hatang-Kai, sagala sihatahononni ibagas goran-Ku, tuntuton-Ku do ai humbani.
20Tapi anggo dong sada nabi na pagijang uhurni mangkatahon sada hata ibagas goran-Ku, na so Huparentahkon hatahononni, barang na marsahap ibagas goran ni naibata na legan, maningon marutang hosah nabi na sonai ai.”
21Anjaha anggo nini ham ibagas uhurmu, “Hunja ma botohonnami hata, na so hinatahon ni Jahowa?”
22Anggo marsahap sada nabi ibagas goran ni Jahowa, hape lang jadi hata ai anjaha lang roh, ai ma hata na so hinatahon ni Jahowa, mangunsagahkon hajungkaton do nabi sisonai ai mangkatahon ai, ulang pala mabiar ham mangidahsi.
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel