Buku na Niondoskon ni Malekat bani si Johannes
1Dob ai huidah ma sada malekat na legan, na gogoh, turun hun nagori atas, marhiouhon hombun, halibitongan i atas uluni, bohini songon mata ni ari anjaha naheini songon basikah na humbani apuy.
2Ijolom do bani tanganni sada buku etek-etek na buha. Anjaha idogeihon do naheini siamun hu atas laut, anjaha nahei sambilouni hu tanoh.
3Mardilo-dilo ma ia maling songon singa na maraum; sanggah na mardilo-dilo ai ia, marhata ma na pitu longgur ai.
4Dob marhata longgur na pitu ai, sihol manurat ma ahu; tapi hubogei ma sora hun nagori atas mangkatahon, “Lak ma na hinatahon ni longgur na pitu in, ulang suratkon!”
5Dob ai ipagostong malekat na huidah jongjong i atas laut pakon tanoh ai ma tanganni dompak datas.
6Marbija ma ia marhitei Naibata na manggoluh ronsi sadokah ni dokahni, na dob manompa langit pakon isini, tanoh pakon sagala na i atasni ampa laut pakon na dong ibagas: Seng paganjangon be panorang,
7tapi bani panorang ni sora ni tarompit na sihol sompulon ni malekat na papituhon ai, ijai ma gok rusia ni Naibata, songon na dob hinatahon-Ni bani juakjuak-Ni, nabi-nabi ai.
8Ia sora na dob hubogei ai hun nagori atas, marsahap do use bangku, nini ma, “Laho ma, buat ma buku na buha ai, na i tangan ni malekat ai, na jongjong i atas laut pakon tanoh ai.”
9Dob ai huparayak ma malekat ai, huhatahon ma hubani ase ibere bangku buku ai. Jadi nini ma hu bangku, “Na ma, pangan ma, gabe paet do in bani boltokmu, tapi tobu do songon manisan ni lobah anggo bani pamanganmu.”
10Jadi hubuat ma buku ai hun tangan ni malekat ai anjaha hupangan ma ai; anjaha tobu do ai bani pamanganku songon manisan, tapi dob hupangan ai, gabe paet ma ibagas boltokku.
11Jadi ihatahon ma dompak ahu, “Maningon ulakanmu ope manjahai dompak suku pakon bangsa ampa hata age dompak buei raja-raja.”
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel